Alla Itolae Nusa 12
Eleki TUHANE Ibeteke loko Abrame be, “Akeleke bei amu kota meije kai bei amu kwali tauaru kai bei kwalimu kai betamu tumutaru, kai akeu loko tapele rebe namake Au tiluke ete ale.
Namake Au ono anebu boka eti amu anubuaru esi ono bangsa elake, kai Au riluke misete ete ale kai Au ono tamata bokala esi isike amu nane leke ariluke misete ete tamata bokala.
Kai Au riluke misete ete tamata rebe esi ono misete ete ale,
kai Au kutuke tamate rebe esi kutuke ale.Kai bei ale pine,
Au riluke misete ete pusue tamata mei nusa.”Eleki Abrame ikeu lulu TUHANE Eni lepate eteije. Lote ikeu kaini lekwe. Kena Abrame ikeleke bei Harane mere eni musuna butu itu lesini lima.
Abrame ikeri kai eni bina Sara, kai kwalini eni nanae Lote, kai taneia kai binatane piala rebe esi supulu me Harane, kai eni tamata makerike rebe esi kerike etei me Harane. Esi keu eti esi luake me tape Kanane.
Hoko kena esi roma mpai Kanane, Abrame ikeue pusue tapele mere eti iroma ai tarbantine uwei me More tehaike Sikeme. Kena mere tamata Kananaru esi rueke tapele mere.
Eleki TUHANE IaselukeNi loko Abrame kai Ibeteke lokoi be, “Tapele meije Au riluke ete amu anubuaru.” Eleki Abrame ieleke otoi kena pala taneia rebe riluke ete TUHANE me otoi rebe TUHANE IaselukeNi lokoije.
Eleki iheti bei otoi mere lolete ulate babai, ndete kota Betele esi sapleuke lemataije sare. Ieleke tenda ete mere, hoko kota Betele esapleuke lemataije suni yo kota Ai esapleuke lemataije sa. Eleki ieleke otoi maka pala taneia rebe riluke ete TUHANE, kai itatu loko TUHANE.
Eleki Abrahame ikeu rame bei otoi mere lope tape Negepe.
Eleki susate manane kena otoi mere hoko Abrame ikeu lopai Mesire kena irue lupe tamata maka luake beluke mpai Mesire le susate manane me otoi mere ktili titinai.
Eleki kena lau mo ikusu Mesire nere ibeteke loko eni bina Sarai be, “Ale bina ntekite.
Sepo tamata Mesiraru esi selumu hoko esi beteke be, ‘Mere eni bina.’ Eleki esi bunu au yo sebeie ale.
Hoko abeteke be ale betaku, leke esi ono loko au mimise le ale, kai esi ono susate ete au le ale mo.”
Eleki kena abrame kai Sarai esi kusu Mesire, tamata Mesiraru esi selu be bina mere inteki titinai.
Eleki kena tamata makerika ete Pirone esi selu Sarai hoko esi isikeni ete Pirone, eti esi keri Sarai loko Pirone me eni luma.
Hoko Pirone itrima Abrame kena misete, le lalei loko bina mere. Kai Abrame isupu domba, sape, keledai tulene kai inai, kai unta, kai tamata makerike mokai kai bina.
Po TUHANE Iono makerake elake ete Pirone kai pusue eni luma toine, bei Sarai, Abrame eni bina mere.
Eleki Pirone ikoti Abrame kai ibeteke lokoi be, “Aono saisa ete au ele meije? Le mula pine abeteke ete au be meije amu bina more?
Le mula pine abeteke be ile betamu eti au ranai kena auku binare? Rana amu bina lome, kai imi keu!”
Eleki Pirone iulake sie ilaru esi keu bete Abrame, ikeu sakesa kai eni bina kai eni taneiaru kai binatane pialaru pusulu.