Alla Itolae Nusa 14
Kena mere Amrapele iono kamale me Sineare, Arioke iono kamale me Elasare, Kedorlaomere iono kamale me Elame kai Tideale iono kamale me Goyime.
Kamala meru esi lisa kai Sodome esi kamale Bera, Gomora esi kamale Birsya, Atma esi kamale Sinape, Seboime esi kamale Syemebere, kai Bela rebe esi nane saere Soare esi kamale.
Kamala lima rebe esi nanaru beteke pamulire esi lupuke lomai me Sidime esi kweune, rebe pamuli meije esi nane Meite Matale.
Le Kedorlaomere ikbasaesi musuna butu esa lesini lua peneka, po esi musuna butu esa lesini telure esi lisa kaini.
Eleki kena esi musuna butu esa lesini atare Kedorlaomere kai kamala rebe esi sakesa kaine kai esi solaluaru esi lisa suike eleki esi nabu tamata Repaime me kota Asiterot-Karnaime, tamata Susime me kota Hame, kai tamata Emime me kota Syawe-Kiryataime,
kai tamata Hori me esi ulate Edome, esi suisi roma El-Parane me otoi nsekile esi leine.
Eleki maka suia meru esi leu suike lomei En-Mispate, pamuli meije esi nane Kadese. Hoko esi rueke tape Amaleke kai esi nabu pusue tamata Amori rebe esi rue me Haseson-Tamare.
Eleki kamale Sodome, kamale Gomora, kamale Atma, kamale Seboime kai kamale Bela rebe esi nane saere Soare, esi siri kai esi lupuke esi solaluaru leke lisa kaisi me Sidime esi kweune,
Eleki esi lisa kai Elame esi kamale Kedorlaomere, Goyime esi kamale Tideale, Sineare esi kamale Amrapele, kai Elasare esi kamale Arioke. Hoko kamala lima esi lisa kai kamala ata.
Sidime mere esi prigi aspale papelake otoi. Kena kamale Sodome kai Gomora luasi naya bei lisa mere, luasi tetu kena prigire. Kai tamata rebe esi mata more esi naya lolete ulate babai.
Eleki kamala ata rebe esi lesire esi rana tamata Sodome kai Gomora esi taneiaru kai binatane pialaru kai esi mananaru pusulu eleki esi keu.
Hoko esi kerike Lote, Abrame kwalini eni nanare kai esi keri pusue eni taneiaru kai eni binatana pialaru le irue me Sodome.
Po ile sae me isupu naya bei lisare hoko ibeteke ete Abrame, tamata Ibrani mere, rebe irue tehaike Mamre eni ai tarbantina uweiju. Mamre mere tamata Amori, kwalini kena Eskole kai Anere. Teluise Abrame eni sopate.
Eleki kena Abrame ilene be kwalini eni nanare isipu kerike hoko ilupuke pusue eni tamata rebe lisa tekwa rebe ruelesi me eni tendare. Pusuise sie utuna telu lesi butu esa lesini kwalu. Eleki esi sui esi musuaru roma ndi kota Dane.
Kena esi kpeture Abrame ilarake eni tamataru totoini, eleki esi kusu lisa kaisi hoko esi suisi roma ndi kota Hoba, me kota Damsike esi sapleuke utare.
Hoko Abrame isupu rana suike taneia kai binatane piala rebe esi ranaule, kai kwalini eni nanae Lote kai eni taneiaru pusulu kai eni binatana pialaru, kai tamata binaya kai eni tamata maketa rebe esi supu kerike.
Eleki kena Abrame ileu bei lisa kai Kedorlaomere kai kamala maketaru, kamale Sodome ikeu sapa Abrame me Syawe esi kweune, rebe esi nane saere Kweune Kamale.
Eleki Melkisedeke, kamale Saleme, iliku roti kai anggure ete Abrame. Melkisedeke mere Alla rebe Ime otoi nanuke titinaije Eni imame.
Eleki iriluke misete ete Abrame hoko ibeteke be, “Alla rebe Eni kbasare ela titinai, rebe Itolae lanite kai tapele, Iriluke misete ete Abrame ale.
Holmate ete Alla rebe Ikbasa titinai, rebe Iono amu musuaru esi tetu beimu.” Eleki Abrame iriluke bei taneia kai binatane piala rebe ileukelu meru sabokae lara butu esa ete Melkisedeke.
Eleki kamale Sodome ibeteke loko Abrame be, “Arana taneia kai binatane piala rebe aleukelu meru ete ale neka, po riluke auku tamataru eteku.”
Po Abrame ibeteke loko kamale Sodome mere be, “Au la loko TUHANE, Alla rebe Ime otoi nanuke titinai, rebe Itolae lanite kai tapele be,
‘Au suka rana sasaisa bei amu taneiaru mo, masike tanei tone molupe aba kwalai sae pise sandale esi mekute lekwe po au rana mo.’ Leke abeteke be bei ale pine auku taneiaru boka yake.
Au suka rana sasaisa ete au ruaku mo. Batuke au trima saisa rebe auku tamataru esi pake pende. Sebeie auku sopate Anere, Eskole kai Mamre, esi rana erisi taneiaru neka.”