Alla Itolae Nusa 18
Eleki TUHANE IaselukeNi loko Abrahame suike me tehaike ai tarbantina uwei me Mamre, kena irue me eni tendare esi meture kena musute petu mere.
Kena Abrahame ibitike oalaleije, iselu sie telua esi kele lau beini titia. Eleki ibala sapasi kai itatu lokosi eti oalaleije kena tapele.
Kai ibeteke lokosi be, “Ntuana imi, sepo imi suka au layani imi hoko imi keu rame yamina, imi sili mei auku tendare mina.
Kai au rana kwele kena imi koa lelale kai rue tatike mei ai uwei meije.
Au rana roti ete imi leke imi kanele leke ktili suike. Eleki sebeie imi keu rame ne, le ntuana imi luake lokoku mei otoi meije peneka.” Eleki esi beteke lokoi be, “Yele, ami rapimu neka.”
Eleki Abrahame ikusu akmete me tendare kai ibeteke loko Sara be, “Rana terigu misete kiloa butu lua pise, leke pala roti ndoline nununu.”
Eleki Abrahame ibala loko eni binatanaru eleki irana sape anai nkopane rebe esi tinaije mutale. Iriluke ete eni tamata maka layani rebe kwete beluke sae leke imoae sosoli.
Mere pela, Abrahame irana susu, susu rebe hkulute laleke kai aklalina rebe moaule kai iriluke ete sie telua meru. Kena esi kane me ai uwei mere, Abrahame ruai li lokosi.
Eleki esi tneui be, “Amu bina Sara ietia?” Abrahame irlake be, “Impai tenda lalei.”
Eleki ile sae bei telusi ibeteke be, “Bulana sikwa suike Au luake lomei leneka, kena mere amu bina Sara iruele kwete mokwai.” Kena mere Sara ikele me meture esi leini me mulisu hoko ilene esi lepare.
Kena mere Abrahame kai Sara luasi ntua matabina peneka kai Sara isupu bulane moneka.
Hoko Sara imali me lalei kai ibeteke be Au matabina peneka hoko au ntulu kai auku mokwai leke supu kwetele saisa mone piseo? Kai auku mokwai lekwe intua peneka.
Eleki TUHANE Ibeteke loko Abrahame be, “Le mula pine Sara imali kai ibeteke be imatabina peneka hoko iruele kwetele monde?
Rebe tamata inoakele eono more, ete TUHANE eono. Hoko lupe minae Au beteke be bulana sikwa suike Au luake lomei, kena mere Sara iruele kwete mokwai.”
Sara rilai hoko ibeteke be, “Au mali mo.” Po TUHANE Ibeteke lokoi be, “Yele, minare amali.”
Eleki Abrahame eni tamua telu meru esi keu siba rame, Abrahame ibetesi roma me otoi sae, ete mere esi supu manouwe kota Sodome.
Eleki TUHANE Inoake me laleI be saisa rebe namake Ionore Ibunike bei Abrahame yake.
Le eni anubuaru esi ono bangsa elake kai esi kbasa kai beini pine Au riluke misete ete pusue tamata mei nusa.
Au bitikeni kena ipletae eni nanaru kai eni anubuaru leke esi lene lokoKu kai esi ono misete kai nkenale. Sepo esi ono lulu meru pusulu hoko Au ono saisa rebe Au talukele ete Abrahame.
Eleki TUHANE Ibeteke loko Abrahame be, “Tamata boka titinai esi lepae Sodome kai Gomora esi tiare peneka kai esi dosaru boka titinai peneka.
Bei mere hoko Au rulu lopere repeneka leke Au selu be tamata esi lepae meru tinai pibe mo, leke Au rekwae.”
Eleki sie luaya esi keu siba rame lope Sodome po Abrahame eri kele kai TUHANE.
Abrahame itehaike TUHANE kai itneu be, “TUHANE, Aatia tamata neunaru sakesa kai tamata nkenalaru neko?
Sepo me kota mere tamata nkenala butu lima me, hoko Aatia kota mere neko? Asebeie kota mere leke sie butu lima meru esi hlamate, mere saisa moneko?
TUHANE, Aono ele mere yake! Tamata nkenalaru Aatiasi sakesa kai tamata neunaru yake, le tamata nkenalaru esi ono saka tamata neunaru more pe! Hoko TUHANE Aono ele mere yake! Ale maka teu pakala kena pusue nusa meije hoko Ateu pakalare nkena more yelo?”
TUHANE Iombe, “Sepo Au supu tamata nkenala butu lima me kota Sodome, hoko bei sie butu lima meru, Au Atia kota mere mo.”
Eleki Abrahame ibeteke leneka be, “Tuhane, au kotie sala neka, le au nehe kuate kena lepa kai Ale rame sa, yo au meije batuke tamata neka, auku hake kena lepa kai Ale sae mo.
Sepo me kota mere tamata nkenale sie butu ata lesini lima me, hoko Aatia kota mere neko? Yo erulu batuke sie limaya bei butu limare.” TUHANE Iombe, “Sepo Au supu tamata nkenala butu ata lesini lima me kota mere hoko Au atia kota mere mo.”
Eleki Abrahame ibeteke lokoI lekwe be, “Sepo me kota mere batuke tamata miseta butu ata me, hoko elia?” TUHANE Iombe, “Bei sie butu ata meru, Au atia kota mere mo.”
Eleki Abrahame ibeteke lekwe be, “Tuhane, ono yake le au lepa rame sa! Sepo me kota mere tamata miseta butu telu me, hoko elia?” Tuhane Iombe, “Sepo Au supu tama miseta butu telu me kota mere, hoko Au atia kota mere mo.”
Eleki Abrahame ibeteke be, “Au kotie sala neka, le au lepa rame sa! Sepo me kota mere tamata miseta butu lua me, hoko elia?” Tuhane Iombe, “Bei sie butu lua meru, hoko Au atia kota mere mo.”
Eleki Abrahame ibeteke be, “Tuhane, ono yake le au lepa rebai esa mei sa! Sepo me kota mere tamata nkenala butu esa me, hoko elia?” Tuhane Iombe, “Bei sie butu esa meru, hoko Au atia kota mere mo.”
Eleki kena TUHANE Ilepa pelare, Ikeu bei Abrahame, kai Abrahame ileu me tendare ne.