Alla Itolae Nusa 23
Sara irue musuna utune esa lesi butu lua lesini itu eleki imata ne.
Imata me Kiryat-Arba, mere Hebrone, me tape Kanane. Hoko Abrahame isusa titinai kai iranieni.
Eleki Abrahame ikeu bei eni bina rebe imata mere loko tamata Hetaru kai ibeteke kenasi be,
“Au meije tamata maka luake beluke rebe au rue kai imi, hoko au kotie bei imi leke imi abelie tapele otoi sae ete au noma, leke au hnouke auku bina kenae kai au onoe kena auku otoi maka hnouke tamata matale.”
Eleki tamata Hetaru esi beteke loko Abrahame be,
“Ntuane, alene loko ami. Ntuane ale mere kamale elake ete ami, hoko ahnouke amu bina kena amiki liane benai sae neka rebe misete. Le ami pusuma suka kena riluke ete ale kena lale ndinate leke ahnouke amu bina kenae.”
Eleki Abrahame itatu lope tapele me oaisu,
kai ibeteke lokosi be, “Sepo imi suka au hnouke auku bina ete meije hoko imi beteke ete Eprone, Sohare eni nana mokwaije,
leke iriluke eni liane benaije eteku kena auku otoi maka hnouke tamata matale. Liane benai mere eme eni ndinu me Makpelare esi hleuije. Mise lesire au riluke otoi mere esi beline etei ete meije, leke imi sasikele. Namake au seli esi beline pusu laleke. Au seli otoi mere esi beline leke eleue au.”
Kena mere Eprone ime sakesa kai tamata Hetaru meru esi lupu me kotare esi meture. Eleki ibeteke loko Abrahame be, “Ntuane, lene au beteke. Ndinu mere au riluke ete ale, kai liane benaije leke ahnouke amu bina kenae. Au riluke ete ale meije, auku tamataru esi sasikele.”
[tolong lihat ayat sebelumnya]
Eleki Abrahme itatu lokosi,
kai ilepa loko Eprone me tamata bokala meru oaisu be, “Sepo asuka hoko alene loko au. Au suka kena seli ndinu kai liane benaije, hoko arana esi beline bei au leke au hnouke auku bina kenae.”
Eleki Eprone ibeteke loko Abrahame be,
“Ntuane, tapele otoije esi beline kepe perake matai utuna ata, mere esi guna sasaisa ete luai mo. Hoko akeu hnouke amu bina kena neka.”
Eleki Abrahame isuka esi beline rebe Eprone ikotiele, eleki iseli kepe perake ete Eprone lulu rebe ibeteke mere. Ntuanaru esi lene esi belini mere lekwe. Esi beline kepe perake utuna ata. Eleki esi beu perake esi pake ukurane sakesa kai piasa tamata maka abeliaru esi pakele.
Hoko Eprone eni ndinu kai liane benai me Makpela me Mamre esi sapleuke lemataije sare, kai pusue aia kai aia rebe eono ote keholi ndinure eleue Abrahame.
Hoko pusue tamata Heta rebe esi ete mere, kai tamata rebe esi kusu siri kotare, pususi sasike tapele otoi mere, eleu Abrahame.
Eleki Abrahame ihnouke eni bina Sara kena liane benai me Makpela, me Mamre esi sapaleuke lemataije sa me tape Kanane. Mamre mera pamuli meije esi kotiele Heborone.
Ele mere hoko tamata Hetaru esi tapele otoi mere kai esi liane benaije eleu Abrahame kena eni otoi maka hnouke tamata matale.