Alla Itolae Nusa 24
Abrahame intua titinai peneka kai TUHANE Iriluke misete etei kena sasaisa neka.
Kena petu sae me, Abrahame ibeteke loko eni tamata makerike rebe iono elake kena ature pusue eni taneiaru be, “Atolae balamu mpe lebu ainueku esi tlelare.
Eleki ala loko TUHANE, Alla rebe Ikbasae lanite kai tapele be anikwa bina ete auku anae Isake bei bina mei tape Kanane meije mo.
Suke akeu ndi auku negarare, anikwa bina etei bei auku luma mataije.”
Eleki tamata makerike mere, itneu Abrahame be, “Sepo bina beluke mere isuka keu bei eni lumare mo, kai ilomei kai au mei negara meije mo hoko elia? Suke au keri amu anare lori amu negarare o?”
Po Abrahame iralake be, “Yake! Au kotie, keri auku anae meije lori yake.
Au rekware TUHANE Alla Iulake Eni malaekate tapa ale leke asupu bina sae bei negara ndire ete auku anare. TUHANE, Allah rebe Ikbasae lanite, Ikeri au bei amaku eni lumare, kai bei kwaliku kai betaku esi negarare peneka, kai Ila lokoku peneka be Iriluke negara meije ete auku anubuaru.
Po sepo bina mere isuka lomei kai ale mo hoko mula mo, kai ala meije etola kena ale mo. Masike elika lekwe po akeri kuanare lori yake.”
Eleki tamata makerike mere itolae balaije mpe lebu Abrahame ainueije esi tlelare, kai ila be saisa rebe Abrahame ikotiele, ionoe.
Eleki irana Abrahame eni taneia rebe esi beline elake kai ibuake kena unta inai butu esa, eleki ikeu lori kota rebe kena Nahore eri rue sare, irue kenare. Kota mere eme otoi Mesopotamia esi sapleuke utara.
Kena itehaike kotare peneka, iono eni untaru rue tehaike prigi sae me kotare esi muline. Kena mere kmau peneka, olase kena binaru esi luake me prigi kena keri kwele.
Eleki tamata makerike mere ikotie loko Tuhane be, “TUHANE, Auku ntuane Abrahame eni Alla, Atapa au leke auku makerike meije esupu hasile kena petu meije noma! LaleMu mise ete auku ntuane Abrahame noma!
TUHANE, Arekwa au kele tehaike prigi meije, totonai bina beluka bei ndau kotare esi luake keri kwele neka.
Namake au beteke loko sae beisi be ruluke eni hlau buine leke iono au kinu mina. Sepo iralake be kinu, kai auku untaru ionolu kinu lekwe, hoko ile mere bina rebe Tuhane Atilukeni ete Isake, rebe Amu tamata makerike. Sepo eono ele mere hoko au rekware Tuhane laleMu mise ete auku ntuane Abrahame.”
Kena eri kotie sa, bina beluke sae eni nane Ripka iluake me prigi mere. Ripkare Betuele eni nanae, inteki titinai kai intulu kai mokwai rebai sae mosa. Betuele amai kena Nahore kai inai kena Milka. Nahore mere kwalini kena Abrahame. Ripka ikeri hlau buini ndete malaije, ikeu me prigire, ikerie kwele kena eni hlau buine eleki iono kena ileu,
[tolong lihat ayat sebelumnya]
eleki Abrahame eni tamata makerike mere iakmete lokoi kai ibeteke be, “Kuanae, tapa au mina! Riluke kwele bei amu hlau buine noma leke au kinue.”
Bina beluke mere iralake be, “Ntuane, kinu.” Eleki iruluke eni hlau buine sosoli bei malaije eleki eri kerike hlau buine, iono tamata makerike mere ikinu.
Eleki kena bina mere iinuke Abrahame eni tamata makerike pela, ibeteke be, “Mise lesi, au keri kwele ete amu untaru leke ukinu.”
Eleki ihonike kwele bei me eni kwele buine kena binatanaru esi maka kinu lakwaije, eleki irulu suike nununu lope prigire eleki ikeri kwele kena iinuke untaru pusulu.
Kena mere Abrahame eni tamata makerike ilimese loko bina mere rame kai inoake be TUHANE Iriluke bina ete Isake mere piseo.
Eleki kena untaru kinu pela peneka, tamata makerike mere irana antin-antine mase, eleki itolae kena bina mere inuije. Kai irana bobala lua bei mase eleki itolae kena bina mere balaije.
Eleki ibeteke loko bina mere be, “Ale mere sire eni nanare? Kai ndau amamu eni lumare otoi sae kena au kai auku tamataru ami ntulu pibe mo?”
Eleki bina mere iralake be, “Amaku kena Betuele, Milka eni nanae rebe ruelei ete Nahore.
Kai ndau lumare otoi kena imi ntulure ndau kai tapoana bokala ndau lekwe kena untaru kane kai untulu kenae.”
Eleki tamata makerike mere itatu lope tapele loko TUHANE.
Kai ibeteke be, “Isike TUHANE, Abrahame eni Alla. Le laleMu mise ete Abrahame kai Aliku lalane ete au loko Abrahame eni kwali tauaru.”
Eleki bina mere ibala leu lorau luma, ialenake ete tamata ndau lumare.
Ripka meije eni betai me, eni nane Labane. Kena ilene betai Ripka ialenake pusue meru kai saisa rebe Abrahame eni tamata makerike ibeteke ete Ripka kai iselu antine-antine kena betai inuije kai bobale kena balaije, eleki Labane ibala lora loko Abrahame eni tamata makerike kai untaru nda prigi leine.
[tolong lihat ayat sebelumnya]
Kena Labane iroma nda loko tamata makerike mere eleki ibeteke lokoi be, “Mai, ale TUHANE Iriluke misete etemu. Anamake ete meije yake, mai keu lorau luma le au aknekae luma ete ale peneka kai otoi kena amu untaru peneka.”
Eleki tamata makerike mere ikeu lulu Labane kai ikusu me eni luma. Eleki Labane iulake tamata kena ruluke taneia rebe untaru kerire kai riluke manane ete unta meru. Eleki iulakesi rana kwele kena Abrahame eni tamata makerike mere kai eni tamataru esi koa lelale.
Eleki kena esi tola manane, Abrahame eni tamata makerike mere ibeteke be, “Au beteke naune rebe au kerire ete imi mosa hoko au kane mosa.” Eleki Labane ibeteke be, “Yele, abeteke naune mina.”
Eleki Abrahame eni tamata makerike mere ibeteke be, “Au meije Abrahame eni tamata makerike.
TUHANE Iriluke misete ete Abrahame kai Iono Abrahame eni taneiaru boka titinai. TUHANE Iriluke domba, pipi, sape, unta, keledai, uboka titinai kai perake, mase etei. Kai tamata makerike etei bokala, bina kai mokwai.
Eleki kena Abrahame intua peneka, Eni bina Sara iruele kwete mokwai esa etei kai Abrahame iriluke pusue taneia meru kena ikbasae peneka.
Eleki iulake au la etei leke au lene loko eni lepate. Hoko ibeteke loko au be, ‘Arana bina ete auku anare bei tamata Kanane rebe au rue kaise mo.
Po akeu loko auku kotare kai loko auku tamataru kena arana bina sae ete auku anare.’
Eleki au beteke loko Abrahame be, ‘Po tinake bina mere isuka keu kai au lomei mo piseo.’
Po ibeteke loko au be, ‘TUHANE rebe au lene lokoI rame, Iulake Eni malekate iliku lalane etemu leke arana bina sae bei mere ete auku anare bei auku kwalitauaru.
Po sepo bina mere eni luma toine esi tiei kena ikeu lulu ale mo hoko mula mo. Namake amu maka la meije etola kena ale mo.’
Eleki kena minae au roma nda prigire, eleki au kotie bei TUHANE be, ‘TUHANE, Abrahame eni Alla, Aono au supu bina ete Isake noma.
Aselu au kele tehaike prigi meije, hoko TUHANE, ele meije noma. Sepo bina sae iluake kena ikeri kwele pine au beteke lokoi be: Ruluke amu hlau buine leke au kinu.
Kai sepo iralake be: Yele, kai au inuke amu untaru. Hoko ile mere pine TUHANE Aonoi kena Abrahame eni nanae Isake eni bina.’
Eleki kena au kotie pela mosa yo Ripka iluake, ikeri kwele buini ndete malaije. Eleki irulu lope prigire kena ikerie kwele. Eleki au beteke lokoi be, ‘Ariluke kwele ete au leke au kinu mina.’
Eleki iruluke kwele buine eleki ibeteke loko au be, ‘Yele, akinu kai au inuke amu untaru.’ Eleki au kinu kai iono untaru ukinu.
Eleki au tneui be, ‘Ale mere sire eni nanare?’ Eleki iralake be, ‘Amaku kena Betuele rebe Milka iruelei ete Nahore.’ Eleki au tola antine-antine kena inuije kai bobale kena balaije.
Eleki au tatu lope tapele loko TUHANE, kai au isike TUHANE, Abrahame eni Alla rebe Iliku lalane misete eteku kena au luake loko Abrahame eni kwali tauaru ruami leke au rana ntuane amu anae binare ete Abrahame eni nanare.
Hoko kena meije sepo lalemi noa ntuane rebe au kerike eteije le imire kwali tau, eleki imi riluke imi nanae binare ete eni nanae mokwaije hoko beteke ete au. Po sepo mo, hoko beteke neka leke au nikwa lalane makete.”
Eleki Labane kai Betuele esi beteke be, “Pusue meije bei TUHANE hoko ami lepa sasaisa moneka.
Ripka imeije, hoko akerini neka kena iono bina ete Abrahame eni nanare lulu TUHANE Ibetekele.”
Eleki kena Abarahame eni tamata makerike mere ilene esi beteke ele mere, hoko itatu lope tapele loko TUHANE.
Eleki isirie pakiane beluke kai taneia bei perake kai mase ete Ripka kai ete binare inai kai betai, iriluke taneia miseta rebe esi beline elake.
Eleki esi rue kane sakesa kai esi ntulu ete mere. Eleki bobanu beleti esi betu, Abrahame eni tamata makerike mere ibeteke be, “Au leu loko Abrahame noma.”
Po Ripka betai kai inai esi beteke lokoi be, “Sebeiye Ripka irue kai ami miku ului esa pise petua butuesa mina. Eleki ikeu ne.”
Po Abrahame eni tamata makerike mere ibeteke be, “Imi tahane au yake le TUHANE Iono misete ete au peneka hoko au leu loko Abrahame noma.”
Eleki esi beteke be, “Hoko ite koti Ripka leke tneu ruai.”
Eleki esi koti Ripka kai esi tneui be, “Asuka kena keu sakesa kai amate meije neka pibe mosa?” Eleki ibeteke be, “Yele, au keu neka.”
Eleki esi tie Ripka kai eni tamata maka rakare esi keu kai Abrahame eni tamata makerike mere kai eni tamataru,
kai esi riluke misete ete Ripka, esi beteke be, “Ripka, ami kotie leke anebu boka titinai! Kai amu anubuaru esi rueke esi musuru esi kotaru!”
Eleki Ripka kai tamata bina makerikaru esi aknekae kena keu, eleki esi sa unta kena keu kai Abrahame eni tamata makerike mere. Ele mere hoko ikeri Ripka kena leu sakesa kaini.
Kena mere Isake ikeu bei me prigi Lahai-Roi, eleki irue me tape Negepe.
Kena kmau peneka Isake isiri kai ikekeu me otoi malene me otoi mere, eleki iselu unta bokala uluake.
Kena Ripka iselu Isake eleki irulu bei untare.
Eleki itneu Abrahame eni tamata makerike mere be, “Mokwai sire maka keu sapa ite ndire?”
Eleki iralake be, “Ndire tamata rebe au kerike eteije, rebe au kotie ale eteije.” Eleki Ripka irana obite nurui maka tasouke aolale eleki itasuke oalaleije.
Eleki Abrahame eni tamata makerike mere ialenake saisa rebe ionore ete Isake.
Eleki Isake ikeri Ripka ikusu me inai Sara matale eni tendare, eleki ikai Ripka ne. Isake lalei loko Ripka titinai hoko laleije noa inai Sara kuate moneka.