Alla Itolae Nusa 27

Kena petu sae me kena Ishake intua peneka kai mataije selu moneka, ikoti loko eni nanae mena Esau be, “Auku anae.” Eleki Esau iralake be, “Mula amaku.”

Eleki Isake ibeteke loko Esau be, “Arekwa, au ntua peneka, kai au rekwa auku petu kena au matare mo.

Hoko arana amu busule kai esi lamere, eleki akeu nikwa aklaline inai sae eteku me neu.

Amoale ntentele lupe piasare au suka kanele eleki arilukele ete au leke au kanele leke au mata mosare, au kotie loko Alla leke Iriluke misete ete ale.”

Po kena Ishake ibeteke ete Esaure, Ripka ilenele. Hoko kena Esau ikeu me neu kena nikwa aklaline ete amaije,

Ripka ibeteke loko eni nanae Yakupe be, “Kuanae, lene mimise! Minare au lene amamu ibeteke ete Esau be,

‘Akeri aklaline inai sae eteku kai amoaele ntentele ete au leke au kanele leke au mata mosare, au riluke misete ete ale me TUHANE oaIje.’

Hoko kuanae alene loko saisa rebe au ulake ale kena onore.

Akeu loko iteki pipi kai dombaru, arana pipi anai lua rebe nkopane, leke au moale ntentele ete amamu lulu isukare.

Eleki akerie ete amamu leke ikanele, leke imata mosare, ikotie loko Alla leke Iriluke misete ete ale.”

Eleki Yakupe ibeteke loko inai Ripka be, “Po Esau nanakwalaije mbulu, yo nanakwalakue mbulu mo.

Ya pine amaku isanakwa nanakwalauke eleki irekwa be au lemakeni, hoko namake au supu misete mo po au supu kutuke.”

Po inai ralakeni be, “Auku anae, kaplalemu yake. Tatike pine au supu kutuke esi susate. Lene loko auku lepate. Keu rana pipiaru lomei!”

Hoko Yakupe ikeu rana pipia meru, irilukelu ete inai, eleki inai moaele ntentele lulu amai sukare.

Eleki Ripka irana eni nanae mena Esau eni lapune rebe misete titinai rebe hnoukele me lumare eleki iulake eni nanae muli Yakupe ialikele.

Kai pipi anaije esi usaije, ikopa Yakupe balaije kai eni mokane rebe mbulu more kenae.

Eleki iriluke manane ntelete kai roti rebe ionore ete Yakupe.

Yakupe ikusu loko amai kai ikoti be, “Amaku!” Eleki amai ralake be, “Mula, auku anae, ale sire mere?”

Yakupe ibeteke loko amai be, “Au meije Esau, amu anae menare. Au ono lulu ama abeteke ete aure peneka. Ama abetu kai rue leke akane aklaline rebe au supure leke akotie oko Alla leke Iriluke misete ete au.”

Isake ibeteke loko eni nanae mere be, “Kuanae! Asupu aklaline nunu kuate pe.” Eleki iralake amai be, “Le TUHANE, Alla rebe tatu lokoIje, Itapa au.”

Eleki Isake ibeteke loko Yakupe be, “Kuanae, lomei tehaike au leke au sanakwa nanakwalmue, be ale mere Esau pibe mo.”

Yakupe itehaike amai, eleki amai sanakwa nanakwalije, kai ibeteke be, “Namue saka Yakupe po balamue mbulu saka Esau.”

Hoko Isake irena Yakupe mo, le Yakupe balaije mbulu lupe kwalini Esau. Po kena iono kena ikotie loko Alla leke Iriluke misete eteije,

itneu suike lekwe be, “Ale, Esau tinai o?” Eleki iralake be, “Tinai!”

Eleki Isake ibeteke be, “Riluke aklaline mere lomei leke au kane aklaline rebe asupure, leke au kotie loko Alla leke Iriluke misete ete ale.” Yakupe iriluke aklaline mere ete amai, eleki amai kanele, kai ikeri kai anggure ete amai, eleki amai kinue.

Eleki amai ibeteke lokoi be, “Kuanae, lomei tetea leke ata au.”

Yakupe itehaike amai eleki iata amai. Kena Isake iata Esau eni lapune esi boine, iriluke misete ete Yakupe. Isake ibeteke be, “Kuanare eni lapune esi boine ntele lupe neu rebe TUHANE Iriluke misete etele esi boine.

Alla Iriluke misete ete ale saka ulane etetu bei ndete lanite. Iriluke tapela nkopana bei mei nusa meije etemu! Iriluke ganduma kai anggura boka titinai etemu!

Tamata bei negara bokala esi lene lokomu kai esi tatu lokomu. Aono elaka ete kwalimu kai betamusi kai inamu eni tamataru esi lene lokomu. Sire pine ikutuke ale, hoko isupu kutuke leneka. Sire pine riluke misete ete ale, hoko isupu misete leneka.”

Kena Isake ikotie loko Alla leke Iriluke misete ete Yakupe pela, kai uke isiri bei amai Isake, kwaline Esau ileu bei maka nikwa aklaline.

Esau imoae manane ntelete eleki ikerie ete amai. Ibeteke ete amai be, “Amaku, betu kai kane aklaline rebe au supue meije leke amaku akotie loko Alla, leke Iriluke misete ete au.”

Po amai itneu be, “Ale mere sire?” Iralake be, “Au meije amu anae mena Esau.”

Hoko Isake khutukeni titinai kai ibeteke be, “Minare sire pine isupu aklaline eleki ikerie ete au pende? Kena aluake mosare, au kane pusu peneka. Kai au kotie loko Alla leke Iriluke misete etei peneka, kai misete mere etei eti pela.”

Kena Esau ilene amai eni lepate mere, kaplalei titinai hoko irani ela titinai. Ibeteke loko amai be, “Amaku, kotie loko Alla leke Iriluke misete ete au lekwe!”

Eleki amai ibeteke lokoi be, “Kwalimu iluake lomei, ilemake au hoko au kotie loko Alla leke Iriluke misete rebe suke ete ale, riluke etei peneka.”

Esau ibeteke be, “Eni nane Yakupe tinai le ilemake au rebai lua peneka. (Yakupe esi natire lemake). Auku hake kwete menare iranae, kai meije irana suike misete rebe amaku akotie loko Alla leke Alla Iriluke ete aure. Amaku, misete makete bei Alla ete aure sae moneko?”

Eleki Isake iralake be, “Au kotie loko Alla leke kwalimu iono elake ete ale peneka, kai pusue kwalini kai betaisi, esi ono tamata makerike etei peneka, kai au riluke gandume kai anggure etei, hoko sasaisa kena au kotie loko Alla lele leke Irilukele ete ale sae moneka.”

Esau iombe, “Amaku, Alla Iriluke misete makete saisa moneko? Amaku akotie loko Allah leke Iriluke misete makete ete au noma.” Kai Esau irani ela titinai.

Amai iralakeni be, “Otoi rebe arue kenare esi tapele nkopa mo kai ulane tetu rame kena mo.

Ahidupe pela peture bei amu sarire kai aono tamata makerike ete kwalimu. Po sepo alelieni hoko asupu tie bei eni kbasare.”

Esau laleije tiake Yakupe le misete rebe suke isupure, Alla Irilukele ete Yakupe peneka, hoko ilepa ete ruai be, “Lau mo amaku imata neka hoko kena petu susa lokoije elia pende au bunu Yakupe.”

Eleki kena Ripka irekwa be Esau lalei kena ibunu Yakupe hoko iulake koti Yakupe eleki ibeteke lokoi be, “Kwalimu Esau lalei tiake ale hoko lalei kena ibunumu.

Hoko kena meije alene lokoku! Aakneka kena naya loko betaku Labane ndi Harane,

kai arue kaini mikua kwila mina eti kwalimu laleije tiake alere,

kai eni nasute ete alere sirike mina pine au ulake tamata kena esi keu ranamu. Le au suka kena luami mata hlele lomai mo.”

Eleki Ripka ibeteke loko Isake be, “Au suka selu Esau eni bina tamata Heta meiju moneka, sepo Yakupe lekwe irana bina bei tamata Heta meiju hoko mise lesire au mata noma.”