Alla Itolae Nusa 38
Kena mere Yehuda ikeu bei eni kwalinisi, eleki irue kai tamata bei kota Adulame sae eni nane Hira.
Ete mere Yehuda iono ebe kai bina beluke sae bei Kanane, Sua eni nanae. Eleki ikai bina beluke mere kai intulu kaini.
Bina mere ikeu blublulu eleki iruele kwete mokwai sae, kai esi ono eni nane Ere.
Eleki bina mere ikeu blublulu suike, eleki iruele kwete mokwai sae, kai esi ono eni nane Onane.
Eleki bina mere iruele kwete mokwai suike leneka, kai esi ono eni nane Sela. Kena ruele kwetele mere Yehuda ime Kesipe.
Mere pela eleki Yehuda irana bina sae eni nane Tamare ete Ere, eni nanae menare kena eni bina.
Po Ere, Yehuda eni nanae mena mere, TUHANE Iselui neu hoko TUHANE Ibunui.
Eleki Yehuda ibeteke loko Onane be, “Akeu loko kwalimu mena Ere eni bina, antulu kaini seli kwalimu leke supu anubu ete kwalimu lulu iteki atate.”
Po Onane irekwa be namake anubua meru etei mo, hoko pela intulu kai kwalini eni binare, iono etetu me muli, leke iono anubu ete kwalini yake.
Po iono ele mere eono TUHANE Inasukeni hoko TUHANE Ibunui leneka.
Eleki Yehuda ibeteke loko Tamare be, “Aleu rue saka bina balu me amamu eni luma, eti auku anae Sela iela.” Ibeteke ele mere le rilai le yapine Sela isupu bunu saka kwalini luaru. Eleki Tamare ileu me amai eni luma ne.
Lomei, takwaline Yehuda eni bina imata. Yehuda eni binare Sua eni nanae. Eleki esi petua kena esi susa lokoije pela, Yehuda ikeu lori Timna loko tamata rebe esi ktoli eni dombaru esi buluiju, ikeu kai eni ebe Hira, tamata Adulame.
Kena Tamare ilene be amai tamoli, Yehuda ilori Timna kena ktoli eni dombaru esi buluiju,
hoko iseli eni pakeane balure kena pakeane makete. Iobi oalaleije kena obite kihati hlarane kai iobi uluije, eleki ikeu rue me metu kena kusu loko kota Enaime, panuhuke lalane lori Timnare. Tamare irekwa be Sela iela peneka, yo sae ino ikai kai mokwai beluke mere mosa.
Eleki kena Yehuda iselu bina mere, inoake be bina mere bina lalane, le iobi oalaleije.
Yehuda irekwa be mere eni nanae tamolire mo, hoko ilomei tehaikeni kai ibeteke lokoi be, “Au suka ntulu kai ale.” Eleki bina mere itneui be, “Sepo antulu kai au hoko ariluke saisa ete aure?”
Yehuda iralake be, “Namake au natue pipi tlai sae ete ale.” Tamare iralake be, “Yele, po suke atolae sasaisa ete au mina eti ntuana anatue pipi mere.”
Yehuda itneu be, “Asuka au tolae saisa eti au natue pipi tlai mere?” Tamare iralake be, “Amu cape meteraije kai esi mekute kai toane buai me balamu mere.” Eleki iriluke pusue meru ete bina mere, eleki intulu kaini. Eleki bina mere ikeu blublulu beini.
Eleki Tamare ikeleke kai ileu me luma ne. Ilesu eni maka obi oalale kai uluije eleki ialike eni pakea balure suike.
Petua ilaru lomei, eleki Yehuda inatue pipi tlai mere kai eni ebe Hira, tamata Adulame mere leke rana suike taneia rebe itolaelu kai binare, po itetue bina mere moneka.
Hira itneu tamata me Enaime be, “Bina lalane rebe piasare irue mei lalane leini ietia?” Esi ralakeni be, “Etemeije bina lalane sae mo.”
Hira ileu kai ibeteke loko Yehuda be, “Au tetue bina mere mo. Tamata esi beteke be ete mere bina lalane sae mo.”
Eleki Yehuda iombe, “Sebeie taneia meru etei neka, le sepo ite nikwa loko taneia meru rame hoko namake tamata esi ono asomie ite. Au atula kena seli bina mere peneka po atetueni mo.”
Eleki kasuke bulana telu suike Yehuda ilene be Tamare, Yehuda eni nanae tamolire iono bina lalane eti ikeu blublulu peneka. Hoko Yehuda ipletae tamata be, “Keri bina mere leke busai.”
Kena esi keri Tamare, iulake tamata kena beteke ete amai tamolire be “Au keu blublulure bei tamata rebe eni taneia meiju.” Inauke lekwe be, “Priksa be sire eni cape meterai kai esi mekute kai toane buai meije?”
Yehuda ipriksa taneia meru, eleki ibeteke be, “Bina mere isala mo. Tinai au sala, le au ono ikai kai auku anae Sela mo.” Eleki Yehuda intulu kai Tamare suike moneka.
Kena bina mere iono kena ruele kwetele nere pine rekwa be ikeu blublulu le kwetele ktebale.
Kai kena iruele kwetele, kwetele sae bei luasi isirie balaije, eleki bidane ikerikele, ilo kena aba kwalai lalakwe kai ibeteke be, “Kwetele meije isiri akmena.”
Kena kwetele mere ilihi balaije suike, eleki kwalini siri akmena, kwete mokwai. Bidane mere ibeteke be, “Aktili titinai kena atula siri lomei muli.” Hoko kwetele mere esi ono eni nane Perese.
Pela bei mere, eleki kwalini rebe balaije lo kena aba kwalai lalakwe isiri. Eleki esi ono eni nane Sera.