Alla Itolae Nusa 44
Eleki Yusupe iulake elake maka raka eni lumare be,
“Kute manane kena esi karunaru kai kute leuke esi kepenaru kena karune.
Kai auku oba bei perake kutele kena kwete mulire eni karune esi nanaije kai eni kepene kena sabe manane kute leukele lekwe.”
Eleki iono lulu Yusupe iulake.
Bobanu kasinake menaije esi tiesi leu kai esi keledairu lori Kanane.
Kena esi siri bei kota mere lau mosa Yusupe ibeteke loko elake maka raka eni lumare be,
“Sui lokosi sosoli. Kena asupuise, abeteke be, ‘Le mula pine ami ono misete imire, imi leukele kena tiare?
Oba bei perake rebe auku elake ikinu kenae kai iono nau kenare imi ndeale? Mere imi ono tiae.’”
Eleki esi sui loko Yusupe kwalinisi. Eleki kena esi tetua Yusupe kwalinisi, elake maka raka Yusupe eni lumare ibeteke Yusupe eni lepate etesi.
Hoko esi ralake be,
“Ntuane abeteke ele mere le mula? Ami ono sala ele mere mo.
Ntuane arekwa peneka be kepene rebe ami supu kena amiki karune esi laleije ami leuke suikele bei ndi Kanane ete ntuane ale, hoko ami ndeae amu elake eni mase pibe perake saisa mo pise o?
Bei ami meiju pine asupu oba perake mere kenai sebei imata neka kai ami maketaru ami kerike ete amu elake neka.”
Eleki ibeteke lokosi be,
“Yele imi lepate mere nkena po sire pine tetue obare kenaije sebei ikerike ete amiki elake neka yo imi maketaru imi keu rame le imi sala mo.”
Esi ruluke esi karunaru sosoli eleki esi buka esi karunaru.
Elake maka raka Yusupe eni lumare inikwa papelake karunaru mimise menai bei menare eti roma mulire. Eleki tetue oba perake mere kena Benjamine eni karune.
Hoko kaplalesi titinai eleki esi buake karunaru suike kena esi keledaiaru eleki esi leu suike lopai Mesire.
Kena Yehuda kai kwalinisi roma me Yusupe eni luma, Yusupe eri me eleki esi tatu beini roma tapele me oaije.
Yusupe ibeteke lokosi be,
“Saisa rebe imi onore? Imi rekwa be tamata ele mei aure, au ono nau yo le mula pine imi ono ele mere?”
Eleki Yehuda ibeteke lokoi be,
“Ami lepa sasaisa ete ntuane ale moneka, saisa rebe ami ralakele kai beteke be ami nkenare sae moneka? Alla Iaseluke amiki nsalale ete ntuane ale peneka. Hoko batuke supu oba perake kenaije mo po ami pusuma ono ntuana amu tamata maka ulake.”
Po Yusupe ibeteke lokosi be,
“Au ono ele mere mo po sire rebe tetue auku oba perake kenaije ikerike ete au yo imi maketaru imi leu kena misete loko imi ama.”
Eleki Yehuda itehaike Yusupe kai ibeteke lokoi be,
“Ntuane asuka au lepa totonai po nasuke au yake le ntuane ale lupe ntuane Pirone ruaije neka.
Ntuane atneu ami peneka be amiki ama kai kwali sae sa pibe moneka?
Eleki ami ralake ntuane ale be amiki ama me sa po intua peneka kai amiki kwali muli esa sa rebe ruelei kena ama intua peneka kai kwalini rebe luasi ina esare ime moneka lesike ruai hoko amiki ama iokini titinai.
Eleki ntuane abeteke loko ami be, ‘Keri kwalimi mulire loko au leke au selui.’
Po ami ralake ntuane ale be, ‘Amiki kwalire ikeu bei amiki amare mo le ikeu bei amiki amare hoko amiki amare imata neka.’
Eleki ntuane abeteke loko ami be, ‘Kwalimi mulire ilomei sakesa kai imi mo hoko imi selu suike au moneka.’
Eleki kena ami leu lori loko amiki ama ndi Kanane ami beteke pusue ntuane amu lepataru etei.
Kena manane rebe ami sabelu ami kane pusulu eleki amiki amare ibeteke loko ami be, ‘Imi keu lopai Mesire suike leke imi sabe iteki manane toto lekwe.’
Po ami ralake be, ‘Sepo amiki kwali mulire ikeu kai ami mo hoko ami keu lopai Mesire mo, le ami selu tamata rebe ikbasa mpai Mesire suike moneka sepo amiki kwali mulire ikeu kai ami mo.’
Eleki amiki amare ibeteke loko ami be, ‘Imi rekwa be auku bina Rahela iruele kwetela lua eteku,
hoko sae esa ikeu beiku peneka, au betinake binatanaru ukanei peneka eti roma meije au selu suikeni moneka.
Sepo kwetele meije imi ranai bei au lekwe, pine isupu susate me lalane hoko imi ono au bua putile meije rulu lope tamata matale esi otoi le nasite tiae.’
Hoko sepo ami luake loko ama pine amiki kwali mulire kaini mo, ele yo amiki amare irue suke sakesa kai amiki kwali mulire,
hoko tinai neka iselu kena kwetetele mere mo, hoko ibetinake imata peneka, hoko amia meiju pine ami ono amiki ama bua putile mere isusa titinai eti irulu lope tamata matale esi otoije.
Au meije pine au kotie kwetele meije bei ama be, ‘Sepo au leuke kwetele meije loko ama ale mo hoko au ono dosa ete ama ale eti pela.’
Elemere hoko au kotie bei ntuane ale leke au rue kena kerike ete ntuane ale seli amiki kwali mulire yo sebeiye amiki kwali mulire ileu sakesa kai kwalinisi neka.
Le au leu loko amaku elia yo kwaliku ileu sakesa kai ami mo? Au tahane mo kena selu amiki amare isupu nasite tiare.”