Alla Itolae Nusa 46

Israele kai eni lumatoinu esi keu lopai Mesire hoko isa kena kereta rebe Pirone inatue etesie. Isa sakesa kai eni nanaru esi binaru kai upuisi kai esi keri pusue esi taneiaru. Kena esi roma me Berseba ipala binatane ete Alla rebe amai Isake ihlaleke lokoIje.

Eleki kena kpeture Alla IaselukeNi loko Yakupe kai ibeteke lokoi be,

“Yakupe, Yakupe!” Eleki Yakupe iralake be, “Mula Tuhane.”

Eleki Alla Ibeteke be, “Aure, amamu eni Alla, rilamu yake kena keu lopai Mesire le Au ono amu anubua boka mpai Mesire.

Au ruaku pine rakamu kena keu lopai Mesire hoko Au ruaku lekwe pine Au leukemu kai amu anubuaru. Po mosare Yusupe pine tatike ikobue amu matamu inaije.”

Eleki Yakupe ikeu siba bei Berseba sakesa kai eni luma toinu. Hoko eni nanaru esi sakeni kena kereta rebe Pirone inatue etesi sakesa kai eni nanaru esi binaru kai upuisi.

Elemere hoko eni nanaru kai esi binaru kai upuisi bina mokai keu nesa lopai Mesire. Esi keri kai esi binatana piala kai esi taneia pusulu rebe esi supulu me Kanane. Eleki esi luake mpai Mesire.

[tolong lihat ayat sebelumnya]

Israele eni nanaru kai eni upuaru kai eni osiaru rebe rulu lopai Mesire kai eni upua kai osia rebe rue lesi mpai Mesire, esi nanaru:

Yakupe eni nanae menare Rubena.

Rubena eni nanaru kena Hanoke, Palu, Hesrone kai Karmi.

Simone eni nanaru kena Yemuela, Yamine, Ohate, Yakina, Sohara kai Saula. Inaise bei Kanane.

Lewi eni nanaru kena Gersone, Kehata kai Merari.

Yehuda eni nanaru kena Era, Onana, Sela, Perese kai Sera po Era kai Onana luasi mata ndi tape Kanane. Eleki Perese eni nanaru kena Hesrone kai Hamule.

Isakare eni nanaru kena Tola, Pua, Ayupe, kai Simrone.

Sebulone eni nanaru kena Sereta, Elona, kai Yahlela.

Mere kwetela rebe esi inasi kena Lea rebe irue lesi ete Yakupe me Padane-Arame kwete mokwaiya kai bina esa eni nane Dina kai upuisi kai osinisi. Hoko pususi kena sie butu telu lesini telu.

Gate eni nanaru kena Sipone, Hagi, Suni, Esbone, Eri, Arodi kai Areli.

Asera eni nanaru kena Yimna, Yiswa, Yiswi, Beria kai esi beta bina kena Sera, kai Beria eni nanaru kena Hebera kai Malkiela.

Mere kwetela rebe esi inasi kena Silpa tamata maka ulake rebe Labane irilukeni ete Lea. Labane mere Lea kai Rahela esi ama. Silpa iruele kwete bina kai mokwai ete Yakupe kai upuisi kai osinisi pususi kena butu esa lesini ne.

Yakupe eni bina Rahela eni nanae sie luaya Yusupe kai Benjamine.

Yusupe eni nana kena Manase kai Epraime ruele luasi me Mesire inasi kena Asnate Potipere imame me One eni nanae.

Benjamine eni nana kena Bela, Bekera, Asibela, Gera, Namane, Ehi, Rosi, Mupime, Hupime, kai Areta.

Mere kwetela rebe Rahela irue lesi ete Yakupe kai upuisi pususi kena sie butu esa lesini ata.

Dane eni nana kena Husime.

Naptali eni nana kena Yasela, Guni, Yesere kai Sileme.

Mere kwetela rebe inasi kena Bilha tamata maka ulake rebe Labane irilukeni ete eni nana bina Rahela, hoko iruele kwetela meru ete Yakupe kai upuisi pususi kena sie itua.

Pusue tamata rebe esi luake sakesa kai Yakupe me Mesire mere Yakupe eni nanaru, upuaru kai osiaru pususi kena butu ne lesini ne mere sae neheke eni nanaru esi binaru mo.

Yusupe eni nana rebe rue lesi etei me Mesire sie luaya. Hoko Yakupe eni lumatoini pususi rebe luake me Mesire pususi kena tamata butu itu.

Eleki Yakupe iulake Yehuda ikeu akmena loko Yusupe leke ibeteke kena Yusupe ikeu sapa amai. Eleki esi roma me tape Gosene.

Eleki Yusupe iaknekae eni keretare eleki ikeu loko amai Israele ndete Gosene. Kena itetue amaije inopa amai eni mokane kai irani takwali kena amai eni malaije.

Eleki Israele Ibeteke loko Yusupe be,

“Kena meije au matare mula mo le au selu suike oalalemue kai au rekwa be ara rue sa.”

Eleki Yusupe ibeteke loko amai kai kwalinisi be,

“Au keu loko ntuane Pirone leke au beteke kenai be, ‘Amaku kai amaku eni bina kai kwalikusi kai kwaliku esi bina kai esi anaru esi rue ndi Kanane esi luake lokoku.

Tamata meru esi pialae pipi, domba kai sape kai esi keri pusue esi taneiaru peneka.’

Eleki sepo Pirone ikoti imi pine itneu be imi makerike saisa?

Hoko imi ralake be, ‘Bei ami tone sa roma meije, amia meiju amiki makerike pialae binatane lupe akmena amiki ntuana menaru neka.’ Imi lepa ele mere leke imi supu rue me tape Gosene le tamata maka pialae pipi kai dombare tamata Mesire esi noake mere tamata ndopone.”