Andung-Andung 3
Ahu ma apala baoa panginonaan ni pardangolan binahen ni linsinglinsing ni rimasna.
Nunga ditogu jala diadu ibana ahu tu haholoman, ndada tu hatiuron.
Holan ahu do na tinuju ni tanganna gonop ari.
Nunga merus sibukku dohot sisikku dibahen ibana, jala maropuk angka holiholingku dibahen.
Nunga dipagukguk humaliang ahu rasun dohot hangaluton.
Nunga dipahundul ibana ahu tu bagasan haholoman songon halak naung mate di na robi.
Nunga ditungkum ibana ahu humaliang, gabe ndang tarbahen ahu ruar, dipaborat do rantengku sian tombaga.
Tung sura mangangguhi ahu manang joujou, ndang tagamon tolhas tangiangki.
Nunga dipolpol ibana angka dalanku marhitehite batu na nidakdak, jala dipalegotlegot angka dalanku.
Nunga gabe gompul na mangarop ibana di ahu, gabe singa tahe di pangaropan.
Nunga dipasimbil angka dalanku jala di parsurage ahu jala dibahen do ahu tarpunjung.
Nunga disintak ibana siorna, jala dipatindang ahu hira salamat di sumbia.
Nunga disiorhon angka anak ni parnangkatanna masuk tu bagasan piapiangku.
Nunga tung gabe sieleseleson ahu di sandok bangsongki, ende alingnasida manipat ari.
Nunga dipamahap ibana ahu marhitehite angka na paet, tung dipainumhon tu ahu raru.
Nunga ibana mangaropangi angka iponku marhitehite batu loting, jala dihungkupi ahu dohot sirabun.
Nunga dipaholang ibana rohangku sian hadameon, gabe lupa ahu di na denggan.
Jadi ningku ma: Nunga tung mago nalom dohot arop ni rohangku maradophon Jahowa!
Sai ingot ma dangolhon dohot pangaleleon na tu ahu ro di raru dohot rasun!
Sai paingotingot ma tutu, asa tung sabam rohangku di bagasan.
I ma antong parateatehononku, ala ni do umbahen marpangkirimon ahu.
Asiasi ni Jahowa sambing do umbahen so haru sun siap hami, ai ndang marpansohotan asi ni rohana i.
Mulak rata do i tahe ganup sogot, godang ma tutu habonaronmu!
Jahowa do parjambaranku, ninna tondingku, dibahen i marhaposan tu ibana ma ahu.
Pardengganbasa do Jahowa mida angka na marhaposan tu ibana, mida tondi ni na mangalului ibana.
Martua ma manang ise na hohom mangkalungunhon hatuaon ni Jahowa.
Denggan do di baoa i, molo diusung augana tagan di haposoonna.
Punjung ma ibana hundul, jala hohom, molo dung dipampe Tuhan i tu ibana.
Denggan nian dibahen pamanganna tu orbuk, anggiat adong sihirimon.
Denggan nian ditarehon hurumna tu na mamastap, maradu mahap rohana di haurahon.
Ai ndang olo Tuhan i mangambolongkon halak ro di salelenglelengna.
Ai ia dung dipajimput manang ise, marpangulahi ma rohana hombar tu godang ni asi ni rohana.
Ai ndada sian lomo ni rohana ibana pasipalhon manang mangarsahi jolma manisia.
Molo pinajepoljepol luhut angka na tarhurung di tano on.
Molo pinapeolpeol uhum tu baoa i di adopan ni na tumimbul.
Molo niruparupaan jolma di parsalisianna, tung so tatapon ni Tuhan i ma i?
Tung ise ma na guru dokna manjadi, molo so Tuhan i martona?
Tung so sian pamangan ni na tumimbul ruar hinamago dohot tua?
Boasa sai marmungutmungut i jolma na mangolu i? Dompak dosana ma nian marmungutmungut be.
Denggan ma hita mandiordiori angka dalanta jala itasulingkit, jala mulak hita tu Jahowa.
Denggan ma itapahehe rohanta rap dohot tanganta tu Debata na di banua ginjang i!
Nunga marbalik hami jala manggunturi, umbahen so tarbahen marpangulahi roham.
Nunga dilungkuphon ho rimasmu tu hami, jala nunga dilele ho hami, nunga dibunu ho hami ndang maralangalang.
Nunga martabuni ho di bagasan ombun, ndang tartondong tangiang.
Nunga rapanrapan dohot biasbias hami dibahen ho di tongatonga ni angka bangso.
Luhut angka musunami pangangang babana be dompak hami.
Hasonggoton dohot godung manjadi jambarnami, tole muse hasiapon dohot hapansingon.
Hira batang aek do mabaor sian matangku, ala ni hapansingon ni boru ni bangsongku.
Sai mabakbak do iluilu ni matangku, ndang marpansadian, ndang marhasonangan.
Paima manatap manonggor Jahowa sian banuaginjang.
Matangku paholso rohangku taringot tu saluhut boru ni hutangku.
Sai dipaburuburu musungku do ahu songon pidong, soada paralaan.
Nunga direndephon nasida ngolungku di bagasan godung, lam ditompashon dope batu tu ahu.
Nunga pola disalpui aek ulungku, pola hudok: Tos ma annon hosangki.
Jadi hupajoujou ma goarmu, ale Jahowa, sian godung apala na bagas i.
Ditangihon ho do soarangku, unang tung padao pinggolmu sian hoihoingki dohot sian angguhanggukki.
Jonok do ho di ari uju na joujou ahu tu ho, nimmu do: Unang ho mabiar!
Nunga dihasuhuthon ho, ale Tuhan, bada tu tondingku; nunga dipalua ho ngolungku.
Nunga diida ho ale Jahowa pangarupaon na tu ahu; sai patingkos ma uhum tu ahu.
Nunga diida ho saluhut partubolonnasida, saluhut sangkapnasida dompak ahu.
Nunga dibege ho eleselesnasida, ale Jahowa, saluhut tahi ni rohanasida dompak ahu.
Pangkuling ni bibir ni angka alongku dohot tubutubu ni rohanasida mangalo ahu manipat ari.
Sai tatap ma parhundul dohot parhehenasida; ahu do gabe ende aling di nasida.
Baloshon ma tu nasida partubolan, ale Jahowa, hombar tu pambahenan ni tangannasida!
Sai lehon ma tu nasida hatangkangon ni roha, jala harom ma jambarnasida!
Lele ma nasida di bagasan rimasmu, jala pansingkon nasida sian toru ni langit ni Jahowa!