Jakobus 3
Ale angka donganku, unang deak hamu gabe guru; ai taboto do, dumokdok do uhum sijaloonta.
Ai saluhut hita jotjot marsala; molo adong na so sala di hata, i ma halak na rimpas, na tarbahen mangarantei saluhut dagingna i.
Molo tabahen rante tu baba ni angka hoda, asa dioloi hita, tatogutogu do sandok dagingna i.
Angka hopal i pe, atik pe na sai balga jala nionjar ni angka alogo na gogo, dipatongontongon do marhitehite amudi na metmet tungkan lomo ni roha ni juaramudi i.
Songon i do nang dila i: Ruas na metmet do i, alai godang do hatahatana; metmet pe api i, digalahi do tombak na sai balga!
Api do nang dila i, portibi hageduhon; songon i do pangalaho ni dila di tongatonga ni angka ruas ni dagingta, dipahodar do sandok daging i jala dipagalak do panggulmiton ni ngolunta i, dung galak dibahen na roko.
Ai nasa ragam ni binatang, angka pidong, ulok ro di dengke tarpatunduk do, gabe tunduk dibahen hajolmaon.
Alai ndang tarpatunduk jolma anggo dila i; panjahati na so marpansadian do i, gok bisa hamatean.
I do ulaulanta mamuji Tuhan i, Amanta; laos i do tapangke mambuburahon jolma, na tinompa marguru tu rupa ni Debata.
Sian sada pamangan do ruar pamujion dohot pamuraion. Ale angka donganku, ndang tama masa songon i!
Tung adong ma baba ni mual sada, na marbullakkon na tonggi dohot na paet?
Ale angka donganku, tung tarparbuehon antajau ma unte, manang tubu antajau sian hau anggur? Ndang tarpapuas mual na ansim tapian na uli.
Ise hamu na bisuk jala na pantas marroha? Sian denggan ni parangena ma dipataridahon ibana angka ulaonna marhitehite halambohon ni habisuhon!
Alai molo ditiop hamu pangiburuon na paet dohot hatongkaron di bagasan rohamuna, unang ma puji hamu dirimuna maralohon hasintongan, huhut margabus!
Ndada i habisuhon na ro sian ginjang; na sian tano do i, sian roha ni jolma, sian sibolis.
Ai ia disi pangiburuon dohot hatongkaron, disi ma hagaoron dohot sandok ulaon hajahaton.
Alai anggo habisuhon na sian ginjang i, sandok na bontor do i, olo mardame, lambok, pangoloi, gok asi ni roha dohot parbue hadengganon, dao sian hagangguon nang pangansion.
Alai di bagasan dame do disaburhon parbue hatigoran di angka na mangulahon dame i.