Job 18

Dung i ninna si Bildad sian Sua ma mangalusi:

Sadia leleng on sai palagelageonmuna hatahata? Sai olo ma hamu parrohaon, dung pe i asa mangkatai hita!

Boasa tung dietong roham hami songon pinahan? Boasa tung songon na maoto hami di roham?

Tung ho sandiri do tahe marsuragehon roham di bagasan dibahen gusarmu; tung tagamon tarulang ma tano on ala ho, manang tung munsat dolok batu sian ingananna?

Tongon tahe, ingkon mintop do palito ni halak parjahat, jala unang be marsinondang nalanala ni apina.

Hatiuron i pe, ingkon gabe haholomon di bagasan undungundungna, jala palitona ingkon mintop di atasna.

Ingkon lam targogot langkalangka ni hagogoonna, jala sangkapsangkapna manginona tu ibana sandiri.

Ai patna sandiri padapot ibana di bagasan aring, jala mardalani ibana di bagasan tali na rundut.

Sai na taralit do tambihulna di bagasan jorgong, jala lingkup tu ibana rambang.

Marsibuni di bagasan tano aringna ditaon, jala bostangna di dalan na bolon.

Angka hinamago manonggoti ibana humaliang, jala dihampungi angka bogas ni patna.

Hisapan hinamagona i pasudasuda ibana, jala ngomngom di lambungna hamagoan i.

Nunga suda dipangan uraturat ni dagingna, nunga pola suda tahe angka ruasna dipangan anak buhabaju ni hamatean.

Tarsarat do ibana sian undungundungna, haposan ni rohana hian, jala ingkon langkahononna mandapothon raja ni hasonggoton.

Halak na pulik marga na ma maringan di bagasan undungundungna, ala so adong tadingtadinganna; tung disirsirhon do barerang tu ingananna i.

Malos do angka uratna sian toru, jala ditultuli dangkana sian ginjang.

Pesan do baritana sian tano on, jala ndang be targoar ibana di angka alaman.

Dionjarhon halak do ibana sian hatiuron tu haholomon, pola dipabali ibana sian tano on.

Ndang teba di ibana anak manang pahompu di tongatonga ni bangsona, tung na so adong pasipasina tinggal di ingananna.

Tung tarsonggot situtu do halak di pudina mida ari hinamagona, jala panonditnonditon disi halak na robi.

Sai songon i do parsorion ni isi ni jabu ni halak pargeduk, jala songon i do inganan ni halak angka na so tumanda Debata.