Job 32
Dung i mansohot ma sitolu halak i masisualan dohot si Job, ala sai dipintori ibana dirina.
Jadi marpiarpiar ma rimas ni si Elihu, anak ni si Barakel, marga Bus i, marompu tu si Ram; marsigorgor rimasna mida si Job, ala sai dipintori dirina moradophon Debata.
Marro ni rimas ibana huhut mida alealena sitolu halak i, ala so haalusan nasida si Job, hape ditorui do ibana.
Ai nunga ngolngolan hian si Elihu naeng mandok hatana tu si Job, ala tumua sitolu halak i sian ibana.
Alai dung diida si Elihu, ndang haalusan sitolu halak i si Jobi, tarrimas situtu ma ibana.
Dung i ro ma hata ni si Elihu, anak ni si Barakel, marga Bus i mangalusi: Bajar dope nian anggo ahu, alai nunga pola ubanon ia hamu; dibahen i alang rohangku jala mabiar ahu papatarhon parbinotoanku tu hamu.
Ai ninna rohangku do: Angka na tuatua ma jumolo mandok hatana, jala halak siginjang umur pabotohon habisuhon.
Alai tongon tahe, Tondi na di bagasan jolma na gale i dohot pangombushon ni Nasunhinagogo i marrohaihon jolma i.
Ndada sai tardok halak siginjang umur pangalapan bisuk, jala ndada sai tardok halak na tuatua umboto manimbang uhum.
Ala ni umbahen hudok: Tangihon hamu ma ahu, asa dohot ahu pabotohon parbinotoan ni rohangku.
Ida ma nunga sanga ngolngolan ahu paimaima hatamuna, sai hupatangitangi sipaingotmuna paima sun dirisik hamu hata na humona dohononmuna.
Sai ditimbangi rohangku do nian hatamuna, hape ida ma, ndang adong sian hamu nanggo sahalak patundukkon si Job, manang na torang mangalusi hatahatana.
Dibahen i unang ma tung dok hamu: Nunga jumpang hami habisuhon, Debata do na manorui ibana, ndada jolma.
Alai tahe, ndada ahu pininggil ni hatahatana, jadi ndada alusanku ibana hombar tu hatamuna i.
Nunga tung tarhatotong anggo nasida, ndang be tarbahensa maralus, nunga tung jut nasida mandok hatana.
Tung sai ngolngolan ahu, umbahen na so mangkuling nasida, ala sai tarhatotong boti nasida jongjong, jala ndang diboto be maralus?
Antong ahu ma huhut mandok alushu, ahu pe naeng papatarhon pingkiran ni rohangku.
Ai nunga gok hata ahu huhilala, sai disosak Tondi na di bagasan rohangku do ahu.
Ida ma, tudoshon anggur na so binungka do andorangku, tudoshon tuhukan bobak na imbaru do naeng mapuntas.
Dibahen i naeng mangkuling ahu asa lumbang huhilala, naeng bungkaonku pamanganku, huhut mangalusi.
Dao ma sian ahu anggo tung marnida bohi mandingkani manang ise.
Ai ndang huboto marsipalensem, atik tung beha tompu ahu ripurhonon ni Sitompa ahu.