Job 39
Tung diboto ho ma tingki ni hije maranak poso? Nunga tung dung dipamanat ho ursa tini laho mangae anakna?
Nunga tung dietongi ho angka bulan hasasangana maranak poso, jala nunga tung diboto ho tingkina mangintubu?
Uju marsinggang nasida laho mangintubu, laho mambolongkon pusokna na niaena i.
Dung i lam margogo ma angka anakna jala magodang di ramba, ruar nasida laos so mulak be tu inana.
Ise ulaning pajalang halode jalang i mardalan guru lomo ni rohana? Jala ise ulaning mangkarhari angka tali tambatan ni halode jalang i?
Nunga pola Hulehon halongonan bahen jabuna, jala tano na niulang bahen ingananna.
Pola diparengkeli angka hariburon na masa di bagasan huta, jala ndang dibege suara songgak ni jolma pandasdas.
Sai diaotaoti do angka dolok mangalului gagatonna jala sai diihutihut do sandok tumbur ni duhutduhut.
Tung tagamon olo badak i pajinahonmu mangoloi ho? Tung tagamon olo ma ibana marudam di lambung ni panggagatan binahenmi?
Tung tagamon tarpampe ho ma tali tompi tu tangkuhuk ni badak asa ditait ninggala? Manang tung tagamon ma ihuthononna ho manisir di angka rura?
Tung tarbahen ho ma marhaposan tusi ala panimbukbuk ni gogona? Manang tung tarpasahat ho ma ulaonmu tusi?
Tung pos ma roham disi boanonna muli gogo ni na niulam, manang papunguonna eme i tu bagasan sopom?
Denggan do nian mamerper anggo habong ni pidong unto; alai nda tung taratup habongna habong ni sibarung.
Hape dipirahon do pirana i tu tano, laos dipasombu do horsik na mohop i mamorpori.
Laos lupa rohana atik tung mabola bahenon ni pat, jala mapisar degeon ni binatang di ladang.
Sai pangaritingon do ibana dompak angka anakna, hira na so ibana nampunasa, ndang dihaborihon rohana atik tung beha mangago hangalutonna i.
Ala naung diunsati Debata habisuhon sian ibana jala ndang marjambar dibahen di panimbangon.
Alai anggo uju dipaspas habongna laho marlojong, diparengkeli do nang hoda ro di jolma parsihundulna.
Tung ho ma huroha naung mangalehon gogo tu hoda? Tung ho ma mamangke tangkuhukna dohot jumbak na janggejanggeon?
Tung tarpaakkathon ho ma i songon sihapor? Pola tarsonggot jolma binahen ni parlongos ni pariheiheonna?
Ia tambirikna sai mangkaishaisi tano i do sian las ni rohana di gogona, tole borhat ditahopi do musu na tang marsinjata.
Eles rohana anggo mida habiaran, jala ndang olo humordit, jala ndang olo lumindak bahenon ni podang.
Patuseok pe nangkat di atasna, sumillamsillam ia mundimundi dohot hujur.
Pangarimason jala pangaritingon do i mangkaishaisi tano i, jala ndang be hatogangan, molo dibege suara ni sangka.
Disi mangkuling sangka i, mariheihe ma i, diteshon ma langkana, sian na dao dope nunga dianggo uap ni parporangan, ro di suara porioho ni partogi dohot suraksurak ni parangan.
Beha do, binahen ni parentam ulaning habang pidong lali tu ginjang, jala meapeap habongna tungkan dangsina?
Beha do, binahen ni parentam ulaning habang pidong raja ualu dompak ginjang, jala dibahen asarna di inganan na timbo sahali?
Dolok batu do diingani, laos meat ibana di punsu ni dolok batu dohot di jaringjingna.
Sian i do diranapi sisoroonna, mansai dao ditatap matana.
Jala angka anakna mudar sambing do disopsop; jala ia disi adong bangke disi do ibana.