Joel 3

(4:1) "Ai ida ma, di angka ari dohot tingki sogot, molo mulak hutogihon angka na tarbuang sian Juda dohot Jerusalem.

(4:2) Jadi papunguonhu ma saluhut angka bangso parbegu jala patuatonhu nasida tu rura Josapat, asa maruhum ahu disi dohot nasida taringot tu bangsonghu dohot taringot tu Israel partalianhu, na marseraka binahen nasida tu tongtonga ni angka bangso parbegu, jala dibagi nasida tanongKi.

(4:3) Jala marruji nasida taringot tu bangsongKi; dilehon nasida do sada dakdanak baoa ali ni sada boruboru sibabijalang, jala digadishon nasida do sada boruboru ala ni anggur, gabe disobur nasida.

(4:4) Jala hamu pe, ale Tirus dohot Sidon rodi sude partalpahan ni Palistim, tung aha ma saritamuna di Ahu? Naeng pasudolonmuna tu Ahu pambahenan manang naeng pasuangonmuna manang aha tu Ahu? Tibu, magira ma pasuangonHu pambahenanmuna tu ulumuna.

(4:5) Angka dipambuat hamu do perakHu dohot serengKu, jala diboan hamu do angka arta hasudungan ni rohangKu tu bagasan joromuna.

(4:6) Jala digadishon hamu do angka anak ni Juda dohot Jerusalem tu halak Gorik asa paholanghon nasida sian partalpahannasida.

(4:7) Ida ma, padaratonHu ma nasida sian tano panggadisannasida i, jala pasuangonHu pambahenanmuna tu ulumuna.

(4:8) GadisonHu ma anakmuna dohot borumuna tu tangan ni halak Juda, jala nasida muse manggadis tu halak Saba, tu bangso na holang, ai Jahowa do na mandok."

(4:9) Tingtinghon hamu ma i di tongatonga ni angka bangso parbegu, parbadiai hamu ma hamusuon; pahehe hamu ma angka ulubalang, ro be nangkok nasa baoa sialo musu.

(4:10) Patopahon hamu ma panggumuna gabe podang, jala sasabimuna gabe hujur. Dohonon ni gale i ma: "Ulubalang do ahu."

(4:11) Hapogan ma sude hamu angka bangso parbegu humaliang ro marpungu. Tusi ma patuat angka ulubalangMu, ale Jahowa.

(4:12) Borhat ma jala nangkok angka bangso parbegu tu rura Josapat, ai disi do Ahu marhabangsa taho manguhum nasa bangso parbegu i humaliang.

(4:13) Tole, sabihon ma sasabi i, ai nunga matoras sigotilon i, ro ma hamu mangaluntak, ai nunga gok panggilingan, nunga pola binsat angka tong dibahen godang ni hajahatonnasida.

(4:14) Marhoronhoron nasida di rura panimpulan ni ulum, ai jonok nama ari ni Jahowa di rura panimpulan.

(4:15) Mangholom do mata ni ari dohot bulan, jala ditiop angka bintang sinondangna.

(4:16) Dung i patungoromon ma Jahowa sian Sion, jala pangioranNa soaraNa sian Jeruasalem, pola humuntal langit dohot tano on. Alai Jahowa do haporusan ni bangsoNa jala partanobatoan di halak Israel.

(4:17) Asa tung ditanda hamu Ahu do Jahowa, Debatamuna i, na maringan di Sion, di dolok habadionHi; jadi gabe habadiaon ma Jerusalem, jala ndang be mamolus sian i halak sileban.

(4:18) Ai di ari na sasada i manetehi ma aek ni anggur sian angka dolok, jala mabaor susu sian dolokdolok, jala saluhut sunge di Juda marisi aek, jala ruar sada mual sian bagas ni Jahowa, asa dipabornok rura Sittim.

(4:19) Alai anggo Misir gabe tano bangkal-bangkal jala Edom gabe halongonan na hasang ala ni hajungkatonna tu anak ni Juda, na nidurushonnasida mudar na so marpipot di tanonasida.

(4:20) Alai anggo Juda siinganan do rodi salelenglelengna, jala hot Jerusalem marsundutsundut.

(4:21) Jala marhasunan bahenonHu mudarnasida, na so marhasunan na sailaon, jadi Jahowa ma maringan di Sion,