Johannes 5

Salpu ni i adong ma pesta ni halak Jahudi, jadi nangkok ma Jesus tu Jerusalem.

Jadi adong ma di Jerusalem di lambung ni harbangan birubiru paridian sada na margoar Betesda anggo di hata Heber; lima do soposopo disi.

Marpeahan do disi torop halak na hansitan, na mapitung, na sarion, na tiarapon, angka na paimaimahon hagugunsang ni aek i.

Ai surusuruan ni Debata do tuat marombasombas tu bagasan paridian i manggunsang aek i. Asa na parjolo bongot di hagugunsang ni aek i, gabe malum do, manang dia pe sahit na lohot tu ibana.

Alai adong ma disi sahalak naung tolupulu ualu taon lelengna marsahit.

Diida Jesus ibana peak disi, jala diboto ma, naung pola leleng ibana disi, gabe ninna ma mandok ibana: Naeng malum ho?

Jadi didok na marsahit i ma mangalusi Ibana: Iale tuan! Ndang adong parhuaonhu, na manogu ahu tu paridian i di hagugunsang ni aek i; ai mandok ro dope ahu, nunga dijoloani na asing ahu mijur.

Dungi ninna Jesus ma mandok ibana: Hehe ma ho; handit ma lagem, mardalan ma ho!

Jadi pintor hisar ma jolma i, dihindat ma lagena, laos mardalan ma. Alai ari Sabbat do toho na sadari i.

Dungi ninna angka Jahudi i ma mandok na pinamalum i: Ari Sabbat do nuaeng; ndang jadi boanunmu lagem!

Jadi didok ma mangalusi nasida: Halak i na pamalum ahu, i do mandok tu ahu; Hindat ma lagem, mardalan ma ho!

Dungi disungkun nasida ma ibana: Ai ise na mandokhon ho manghindatsa jala mardalan?

Alai ndang ditanda na hansitan i Ibana; ai nunga sumurut Jesus, ala torop halak disi.

Ndang piga dan jumpang Jesus ma ibana di bagas joro, jadi didok ma tu ibana: Atehe, nunga hisar be ho? Unang datdati mangula dosa, asa unang songgop tu ho na umposi!

Gabe laho ma halak ondeng paboahon tu angka Jahudi, Jesus do na pahisar ibana.

Jadi diburui angka Jahudi ma Jesus, ala dibahen songon i di ari Sabbat

Alai dialusi Jesus ma nasida, ninna ma: Na mangula do Damang rasirasa nuaeng; Ahu pe mangula do.

Ala ni i lam disangkapi angka Jahudi mamusa Ibana, ai disegai do ari Sabbat i, tole digoar do Debata Ama na jala dipasobok do dirina dohot Debata.

Gabe dialusi Jesus ma nasida, didok ma: Na tutu situtu do na hudok on tu hamu: Ndang tarpatupa Anak i manang aha sian roharohana, anggo so diida Ibana Ama i mangulahonsa; ai ia i dibahen Ama i, laos i do diula Anak i.

Ai holong do roha ni Ama i di Anak i, dipatuduhon do tu Ibana nasa ulaon ni Ama i; laos patuduhononna ma tu Ibana ulaon na umbalga sian on, asa longang rohamu.

Ai songon panungguli ni Ama i di angka na mate, laho pangoluhon nasida, songon i do Anak i: dipangolu do angka na naeng pangoluonna.

Ai ndang adong diuhumi Ama i manang ise; nunga dipasahat sandok paruhuman i tu Anak i,

asa diparsangapi saluhut halak Anak i, songon parsangap nasida di Ama i. Ia i na so pasanmgaphon Anak i, i ma na so pasangaphon Ama i, na marsuru Ibana.

Na tutu situtu do na hudok on tu hamu: Manang ise na tumangihon hatanghi jala porsea di na marsuru Ahu, nunga sahat tu ibana hangoluan na salelenglelengna; ndang pola be ibana tu paruhuman, nunga taripar ibana sian hamatean tu hangoluan.

Na tutu situtu do na hudok on tu hamu: Na ro ma tingkina jala nunga masa nuaeng, begeon ni angka na mate i ma disi soara ni Anak ni Debata; gabe mangolu ma na umbegesa.

Ai songon Ama i parngolu hian di bagasan dirina, laos songon i do dilehon tu Anak i, asa parngolu Ibana di bagasana dirina.

Jala dilehon do tu Ibana huaso manguhumi, ala Anak ni jolma i Ibana.

Unang longang rohamu ala ni i, ai di na ro tingkina, begeon ni saluhut halak na di angka tanoman i ma soarana.

Dungi ruar be ma: Angka sibahen na denggan hehe tu hangoluan; alai angka siula na jahat hehe tu uhum.

Ndang tarula Ahu agia aha, anggo tung sian diringhu; hombar tu na hubege do panguhumhu, jadi tigor do uhumhi, ala so hulului na pinangido ni rohanghu, na pinangido ni na marsuru Ahu, i do.

Anggo Ahu manghatindanghon diringhu, ndang na sintong panindangionhi.

Adong do na asing na manghatindanghon Ahu jala huboto, na sintong do panindangionna na taringot tu Ahu.

Naung disuru hamu do na manopot si Johannes, gabe na sintong i dihatindanghon ibana.

Alai anggo Ahu, ndang hujalo paninsangion sian jolma; ia hutaringoti pe i, ala ni hamu do, anggiat malua hamu.

Palito na galak jala na marsinondang do ibana; alai na naeng marlas ni roha do hamu sangombas di bagasan sondang na i.

Alai na sumurung do panindangionna di Ahu asa na sian si Johannes; ai angka ulaon na nilehon ni Ama i tu Ahu, sipaujungonhu, ima angka ulaon na huula, i do manghatindanghon Ahu, paboa na disuru Ama i Ahu.

Nang Ama i na marsuru Ahu, dihatindanghon do Ahu. Ndang dung dibege hamu soarana, rupana pe ndang dung diida hamu.

Hatana pe ndang ditiop hamu mian di bagasan roha muna, ai ndang porsea huma di na sinuruna.

Didiori hamu angka surat i, ai diparbaga rohamu, dapot hamu do disi hangoluan na salelenglelengna; jala Surat i do tutu manghatindanghon Ahu.

Alai ndang olo hamu ro manopot Ahu, asa dapotan hangoluan hamu nian.

Ndang adong hujalo hasangapon sian jolma.

Alai nungan hutanda hamu, na so ditiop hamu di bagasan hamu holong ni roha ni Debata.

Ro do Ahu marhitehite goar ni Damang, gabe ndang dijanghon hamu Ahu. Alai molo to na asing marhitehite goarna sandiri, janghonon muna do anggo i.

Songon dia ma antong tarbahen hamu gabe porsea, ai na masijaloan sangap do hamu sama hamu; alai anggo sangap na sian Debata na sasada i, ndang dilului hamu.

Unang dirimpu roha muna, Ahu mangaluhon hamu tu Ama i. Adong go na mangaluhon hamu; i ma si Musa, haposan ni roha muna i.

Ai aut na porsea hamu di di Musa, porsea ma hamu nang di Ahu; ai taringot tu Ahu do disurathon.

Alai molo so porsea hamu di suratna i, tung porsea ma hamu di hatnghi?