Lukas 13

Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida.

Jadi ninna Jesus ma mangalusi nasida: Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?

Hudok ma di hamu: Ndang; anggo so muba rohamuna, laos songon i do hamu mago muse!

Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem?

Hudok ma di hamu: Nda tung; anggo so muba rohamuna, laos songon i do hamu mago muse!

Dung i dihatahon ma umpama on: Adong ma di sada halak hau ara na sinuanna tu porlak anggurna; jadi ro ma ibana mangalului parbuena, hape ndang adong jumpangsa.

Gabe ninna ma mandok siula porlak anggurna: Nunga pola patolutaonhon ahu ro mangalului parbue di hau ara on, laos so jumpang. Taba ma i; aha pola magopo tano i bahenonna!

Alai didok i ma mangalusi: Tuannami, loas ma i disi sataon on, asa sanga hupangkur humaliang bonana, mambahen napa tusi,

anggiat olo marparbue tu jolo on; alai anggo soada, tabaon ma!

Dung i mangajari ma Ibana di sada parguruan jumpa ari Sabbat.

Jadi adong ma disi sada parompuan, naung martondi sibahen marsahit leleng ni sampulu ualu taon; suhung do dagingna jala ndang tarbahensa dirgak.

Dijou Jesus ma ibana jumonok, dung diida; jala ninna ma mandok ibana: Malua ma ho, inang, sian parsahitonmi!

Laos diampehon ma tanganna tu ibana, jadi pintor dipadirgak parompuan i ma dirina jala dipuji ma Debata.

Alai ia sintua ni parguruan i, sogo ma rohana, ala na pamalum sahit Jesus jumpa ari Sabbat, jala ro ma hatana tu natorop i: Onom do ari di na patut mulaulaon hita; disi ma hamu ro, asa dipamalum sahitmuna, unang ma di ari Sabbat!

Alai ninna Tuhan i ma mangalusi ibana: E ho pangansi! Nda ganup hamu mangkarhari horbona manang halodena sian panggagatan di ari Sabbat manogihonsa marsobur?

Ia on, sada boru ni si Abraham, naung nirahutan ni sibolis sampulu ualu taon lelengna, ndang patut harharan ihotihotna di ari Sabbat?

Dung didok Ibana i, muruk ma sude alona i. Jala marlas ni roha ma sude natorop i siala saluhut pambahenna na marmulia i.

Alai didok ma: Tudos tu aha ma harajaon ni Debata, tu aha ma pasumanonku?

Tudos ma i tu batu ni siarum, na jinomput ni sada halak, laho manaburhonsa tu porlakna; jadi tubu ma gabe hau, jala ro do angka pidong na martongatonga langit marasar tu rantingna.

Diulahi mandok: Tu aha ma patudosonku harajaon ni Debata?

Tudos ma i tu itak naung niasoman, na binuat ni sada parompuan pasaorhonsa tu itak tolu ampang, paima asom saluhutna.

Jadi dibolus Ibana ma angka huta dohot sosor laho mangajari, uju di pardalanan mandapothon huta Jerusalem.

Jala adong ma na mandok tu Ibana: Tuhan, otik do ulaning na saut malua?

Alai ninna Ibana ma mandok nasida: Marungkil ma hamu, asa masuk sian pintu na gogot i; ai hudok ma tu hamu: Torop do na marsangkap naeng masuk nian, alai ndang tarbahensa.

Alai dung hehe nampuna jabu i jala disordak pintu i, disi ma jongjong hamu di balian manuktuhi pintu i, mandok: Tuhan, ungkap di hami! Jala dohononna ma: Ndang huboto hamu, manang sian dia!

Dohononmuna ma disi: Na rap mangan jala minum do hami dohot Ho, jala diajari Ho do hami di angka alamannami.

Dung i dohononna ma: Hudok ma di hamu: Ndang huboto hamu, manang sian dia. Sumurut ma hamu sian Ahu, hamu sudena, siula hageduhon!

Disi ma masa angguhangguk dohot na patungoripon, di na idaonmuna di bagasan harajaon ni Debata si Abraham, si Isak dohot si Jakkob ro di panurirang saluhutna; alai pinabali tu balian do anggo hamu!

Disi ma ro angka na sian purba dohot sian pastima, sian utara dohot sian dangsina, gabe hundul ma marsipanganon di harajaon ni Debata.

Angka naung parpudi hian tupa gabe parjolo; jala angka naung parjolo hian, tupa gabe parpudi.

Uju i didapothon deba Parise ma Ibana mandok: Hehe ma ho, borhat ma sian on, ai na naeng bunuon ni si Herodes do Ho!

Gabe ninna ma mandok nasida: Laho ma hamu, dok hamu ma tu antuasu i: Hupabali angka tondi na hodar jala hupamalum angka sahit sadari on dohot marsogot, jala marujung ma langkangku patoluna.

Alai ingkon mardalan Ahu sadari on, nang marsogot ro di ari na mangihut tusi; ai na so bolas mate panurirang, anggo di balian ni huta Jerusalem.

Jerusalem, Jerusalem! Dibunu ho do angka panurirang i jala didangguri ho do angka na sinuru manopot ho! Jotjotna i naeng papunguonku do nian ianakhonmu, sobokkon pidong na papunguhon anakna tu toru ni habonghabongna; alai ndang dung olo hamu!

Tarulang ma sogot bagasmuna. Alai hudok ma tu hamu: Na so tupa idaonmuna be Ahu, paima dohononmuna: Pinasupasu ma na ro marhitehite Goar ni Tuhan!