Lukas 17
Alai didok Ibana ma tu siseanna i: Ndang tarbahen so ro angka gasip; alai marjea ma na parohonsa!
Dengganan do di ibana ginantungkon losung batu tu rungkungna jala nilonongkon ibana tu laut, unang digasipi sahalak sian angka na metmet on!
Jamoti hamu ma dirimuna! Anggo dung mardosa donganmu, podai ibana; jadi molo dipauba rohana, sesa ma dosana i!
Jala molo tung pitu hali di na sada ari mardosa ibana dompak ho, jala pitu hali ibana mulahulak tu jolom mandok: Jora ma ahu, sesaonmu do!
Dung i ninna angka apostel i ma mandok Tuhan i: Tambai ma haporseaonnami!
Alai ninna Tuhan i ma: Molo adong di hamu haporseaon na sabatu ni siarum, tardok hamu do tu hau galagala an: Maborgat ma ho suanhon ma ho tu laut!, gabe oloanna do hamu!
Alai ise sian hamu paranak somang na maninggala manang marmahan, tagamon ma dohononmuna tu ibana, jumpa muli sian hauma: Haru tu on ma ho hundul mangan?
Nda dohononmuna ma mandok ibana: Pature ma sipanganonki, marhohop ma ho, mangkobasi di ahu, asa mangan minum ahu; dung pe i, asa mangan dohot minum ho!
Tung dohononmu ma mauliate tu anak somangmu, ala dipasaut na niaturhonmu?
Songon i do nang hamu; molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami.
Uju mardalan Ibana dompak Jerusalem, dibolus ma sian tongatonga ni luat Samaria dohot Galilea.
Laho bongot tu sada huta, pajumpang ma Ibana dohot sampulu halak na huliton, na jongjong mandaodao.
Dipagogo nasida ma soaranasida, angka ninna ma: Jesus, Guru! Asi ma roham di hami.
Jadi ninna Ibana ma marnidasa: Laho ma hamu patuduhon dirimuna tu angka malim! Jala di na laho i nasida, gabe ias ma nasida.
Alai mulak do sahalak sian nasida, dung diida, naung gabe malum ibana; dipagogo ma soarana mamuji Debata.
Dipatungkap do dirina tu jolo ni Jesus mandok mauliate. Jala halak Samaria do i.
Alai ninna Jesus ma mangalusi: Nda sampulu nasida naung gabe ias? Didia do na sia nari?
Ndang adong jumpang hape, na olo mulak pasangaphon Debata, dungkon ni halak dagang on?
Laos ninna ma mandok ibana: Hehe ma ho, laho ma! Haporseaonmi do paluahon ho!
Alai disungkun angka Parise do Ibana: Andigan ma songgop harajaon ni Debata? Gabe dialusi ma nasida, ninna ma: Apala gumortap idaon harajaon ni Debata di harorona i.
Jala ndang tardok: Ndi on do! Manang: Ndi an! Ai tung di tongatongamuna do harajaon ni Debata.
Dung i ninna ma mandok siseanna: Na ro ma angka ari, malungun ma rohamuna disi, naeng idaonmuna sada ari ni Anak ni jolma i; alai ndang idaonmuna i.
Jala dohononna ma tu hamu: Dison! Disan do i! Unang topot hamu tusi, unang ihuthon hamu!
Ai songon hilap na sumiksak, laho manorangi sian desa na sada ro di tondongkonna i, suman tusi do pangalho ni Anak ni jolma i di arina i.
Alai ingkon jumolo lan taononna; bolongkonon ni na sansundut on do Ibana.
Songon na masa uju di tingki ni si Noak i, suman tusi do sogot di angka ari ni Anak ni jolma i:
Na mangan minum do nasida, mangoli jala pabolihonsa sahat ro di ari habobongot ni si Noak i tubagasan parau i; jadi ro ma aek na sumar i mangagohon nasida saluhutna.
Songon na masa di angka ari ni si Lot: Mangan minum nasida, manuhor manggadis, manuan jala pauli bagas.
Alai di ari halalaho ni si Lot sian huta Sodom turun ma udan api dohot barerang sian ginjang, mangagohon nasida saluhutna.
Songon i ma masa di na sadari i, di na gabe patar Anak ni jolma i.
Ia halak na di bilut parginjang ni jabuna di na sadari i, jala di jabu i ugasanna, unang ma dialap i, di na mijur ibana; jala halak na di ladang, laos songon i: Unang pola muli ibana!
Ingot hamu ma nioli ni si Lot i!
Agoan hosa ma na naeng paluahon hosana; alai na agoan hosa, i do na pangoluhonsa.
Hudok ma di hamu: Di na saborngin i dua halak ma sapodoman; na sada do jangkononna, na sada nari tulahonna.
Rap manduda ma dua parompuan; na sada do jangkononna, na sada nari tulahonna.
Rap mangula hauma ma dua halak; na sada do jangkononna, na sada nari tulahonna.
Jadi ninna nasida ma mangalusi Ibana: Didia ma i, Tuhan? Gabe didok ma tu nasida: Ia disi bangke, laos tusi do marumbal angka lali!