Lukas 22
Alai na jonok nama ari raya mangan roti na so niasoman, na margoar Paska.
Jala sai dipingkiri angka sintua ni malim dohot angka sibotosurat dalan mamusa Ibana, ai dihabiari nasida do natorop i.
Alai dibongoti sibolis i do si Judas na margoar Iskariot, sahalak sian na sampuludua i.
Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida.
Jadi sian las ni rohanasida marpadan ma nasida, mangalehon hepeng tu ibana.
Dioloi si Judas ma i, jadi dilului ma tingki na une pasahathon Ibana, so sian pamotoan ni natorop i.
Dung i jumpang ma arina mangan roti na so niasoman, laos disi do somal dipotong birubiru Paska.
Jadi disuru Jesus ma si Petrus dohot si Johannes, ninna ma: Laho ma hamu paturehon birubiru Paska sipanganonta i.
Gabe ninna nasida ma mandok Ibana: Tu dia ma dohononmu hami paturehonsa?
Dung i ninna Ibana ma mandok nasida: Disi bongot hamu tu huta i, pajumpang ma hamu dohot sada halak siboan partuaehan; ihuthon hamu ma ibana tu bagasan jabu na binongotanna.
Dok hamu ma tu nampuna bagas i: Tona ni Guru i tu ho: Didia do inganannami, asa mangan Paska i Ahu rap dohot angka siseanku?
Dung i patuduhononna ma tu hamu bilut parginjang sada na lumbang, naung hinembangan; disi ma pature hamu!
Jadi laho ma nasida; jumpang nasida ma songon na pinaboana i tu nasida, jala dipature ma Paska i.
Asa dung dapot tingkina, hundul ma Ibana rap dohot angka apostel.
Dung i ninna ma mandok nasida: Mansai masihol rohangku, naeng mangan birubiru Paska on Ahu rap dohot hamu, tagan so songgop dope sitaononki.
Ai hudok ma di hamu: Na so tupa panganonku be i, ia so dapot hagogokna i di harajaon ni Debata!
Jala dibuat Ibana ma panginuman, dipasupasu ma, laos ninna ma: Buat hamu ma on, sagihon hamu ma i sama hamu!
Ai hudok ma di hamu: Na so tupa be inumonku parbue ni hau anggur, paima songgop harajaon ni Debata!
Jala dihindat ma roti, dipasupasu ma, diponggoli jala diparlehon ma tu nasida, huhut ma didok: Dagingku do on, na nilehon humongkop hamu; ula hamu ma i, bahen parningotan di Ahu!
Songon i do dihindat nang panginuman, dung sun nasida na mangan i, didok ma: Ia panginuman on, padan na imbaru do i, marhitehite mudarhu, na durus humongkop hamu!
Tangan ni na manjehehon Ahu do hape rap dohot Ahu di atas meja on!
Tong do nian langka ni Anak ni jolma i, songon naung diaturhon tu Ibana; alai marjea do halak na manjehehon Ibana!
Gabe dipungka nasida ma masitangkasan, manang ise nasida ulaning na olo mangulahon i.
Jala tubu ma parbadaon di nasida, manang ise nasida rajumon na sumangap.
Gabe ninna Jesus ma mandok nasida: Angka raja ni angka sipelebegu do manggomgom, jala na ulibasa do digoar angka na sangapnasida.
Alai unang ma songon i anggo di hamu! Na sumangap na di hamu, gabe songon naposo, jala na manguluhon suman ma tu pangoloi!
Ai ise do na sumangap, na hundul marsipanganon manang na marhobas i? Nda na hundul i? Alai di tongatongamuna do anggo Ahu songon parhobas.
Alai hamu do na manahan di lambungku, di na tarunjun i Ahu.
Anggo Ahu, huturpukhon pe tu hamu Harajaon i, songon naung diturpukkon Damang i tu Ahu.
Asa mangan jala minum hamu di mejangki di harajaonki, mangkunduli habangsa laho manguhumi halak Israel na sampuludua marga i.
O Simon, Simon nunga dipangido sibolis i, naeng segeonna hamu songon dahanon.
Alai Ahu do manangiangkon ho, unang mintop haporsaonmi. Jala dung mulak sogot roham, pargogoi ma roha ni angka hahaanggim!
Alai ninna si Petrus ma mandok Ibana: Tuhan, na hobas do ahu mandongani Ho tu hurungan, nang tu hamatean pe!
Alai ninna Ibana ma: Hudok ma tu ho, Petrus: Ndang martatahuak manuk saborngin on, so jolo tolu hali soadahononmu, na so tinandam Ahu.
Laos ninna ma mandok nasida: Uju husuru hamu, so marhajut, so marhandehande, so marsipatu pe, dung do hamu hurangan? Jadi didok nasida ma: Ndang dung!
Gabe ninna ma mandok nasida: Alai anggo nuaeng, na marhajut, diboan ma i, songon i nang handehande. Jala na so umpeop i, digadis ma mandarna, manuhor podang!
Ai hudok ma di hamu: Ingkon saut na tarsurat taringot tu Ahu na mandok: "Tarrajum do Ibana tu angka parjahat!" Ai nasa na taringot tu Ahu, jumpang ma nuaeng.
Gabe didok nasida ma: Tuhan, adong do dua podang dison. Jadi didok ma tu nasida: Sae ma i!
Dung i laho ma Ibana tu balian, tu dolok Jetun, songon na somal; jala diihuthon angka siseanna Ibana.
Asa dung sahat Ibana tusi, ninna ma mandok nasida: Martangiang ma hamu, asa unang bongot hamu tu bagasan pangunjunan!
Anggo Ibana dipapulik ma dirina sian nasida, arga tuk dangguron batu, marsinggang ma Ibana martangiang songon on:
Amang, aut olo ma Ho nian pasalpuhon siinumon on sian Ahu! Alai unang ma rohangku saut, roham ma!
Alai diida Ibana ma surusuruan sian banua ginjang i, na margogoihon Ibana.
Jala di parungkilonna i, lam digogo ma martangiang; jadi songon mudar na himpal do madekdek hodokna i tu tano.
Jala hehe ma Ibana sian na martangiang i, mandapothon siseanna; jadi tarpodom ma nasida didapot, dibahen arsak ni rohanasida.
Gabe ninna ma mandok nasida: Boasa ma tung modom hamu? Hehe ma hamu martangiang, asa unang hamu bongot tu pangunjunan!
Mandok i dope Ibana, nunga ro torop halak, niuluhon ni sada sian na sampuludua i, ia goarna si Judas, na manjonohi Jesus mangumma Ibana.
Alai ninna Jesus ma mandok ibana: O Judas, pangummaon do hape dibahen ho, pasahathon Anak ni jolma i?
Alai diida angka dongan ni Jesus ma na naeng masa i, gabe didok ma: Tuhan, tampulhononnami ma podang i?
Jala sahalak sian nasida manampul naposo ni sintua ni malim, gabe digotap pinggolna siamun.
Alai ro ma alus ni Jesus: Sae ma i! Dijama ma pinggol i, dipamalum ma halak i.
Gabe ninna Jesus ma mandok angka sintua ni malim, angka sigomgom joro i dohot angka panungganei, naung manahopi Ibana: Hira dompak halak panamun hamu ro, mantat podang dohot lombutlombut.
Ariari do Ahu rap dohot hamu di joro i; ndang dung dilaluhon hamu tanganmuna dompak Ahu. Alai on do tingkimuna dohot huaso ni haholomon i.
Dung ditangkup, diboan nasida ma Ibana manogihon tu bagasan jabu ni sintua ni malim i. Alai mandaodao ma si Petrus mangihuthon.
Dipagalak nasida ma api di pogu ni alaman i jala rap hundul ma disi, gabe ro ma si Petrus juguk tu tongatonganasida.
Dung i diida naposo boruboru sahalak ma ibana juguk mardonokkon api i, dinolnol ma ibana, ninna ma: Dongan ni Halak an do on, tahe!
Alai disoadahon do Jesus, didok ma: Ndang hutanda Ibana, inang!
Dung i satongkin nari, diida sahalak na asing ma ibana jala ninna ma: Sada sian nasida i do ho! Alai didok si Petrus ma: Ndang na tutu i, amang!
Dung salpu hirahira sajom, diondolhon sahalak na asing muse, mandok: Tongon do, dohot do halak on donganna najolo, jala halak Galilea do i.
Alai didok si Petrus ma: Ndang huboto na nidokmi, amang! Mandok i dope ibana, mamintor martatahuak ma manuk.
Jadi humusor ma Tuhan i, dibereng ma si Petrus, gabe diingot si Petrus ma hata ni Tuhan i, i ma na nidokna i tu ibana: Andorang so martatahuak manuk i annon, nunga tolu hali Ahu soadahononmu!
Jala ruar ma ibana, tumatangis gogogogo.
Alai anggo angka baoa na maniop Jesus, dipauruuru jala dilasahi do Ibana.
Dibulang nasida do Ibana gabe disungkun: Manurirangi ma Ho: Ise i na mamastap Ho?
Jala lan dope na asing dihatahon nasida tu Ibana laho mangaleai.
Jadi disi torang ari, marpungu ma rapot ni sintua ni bangso i, i ma angka sintua ni malim rap dohot sibotosurat; ditogu nasida ma Ibana tu harungguannasida. Ninna nasida ma: Anggo Kristus i do Ho, paboa ma i di hami!
Gabe ninna Ibana ma mandok nasida: Nang hupaboa i tu hamu, tong do so porsea hamu!
Alai molo manungkun Ahu, ndang tagamon alusanmuna Ahu.
Alai olat ni on ma hundul Anak ni jolma i tu siamun ni Hagogoon ni Debata.
Gabe saluhut nasida mandok: Asa Anak ni Debata do Ho? Jadi didok Ibana ma tu nasida: Songon na nidokmuna: Ahu ma i tutu!
Dung i ninna nasida ma: Pola luluanta dope sitindangi? Ai nunga apala hita umbegesa dihatahon Ibana.