Markus 1
On ma mula ni barita na uli ni Jesus Kristus.
Hombar tu na tarsurat di panurirang Jesaya: "Husuru ma suruanki, patujolo ni bohim, sipature sidalananmi!"
"Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i!"
Di halongonan do si Johannes mandidihon jala manjamitahon pandidion hamubaon ni roha, laho pasesahon dosa.
Jadi ruar ma sude pangisi ni tano Judea ro di sude halak Jerusalem manopot ibana jala dipandidihon do nasida di batang aek Jordan, dung ditopoti be dosana.
Ianggo si Johannes i, imbulu ni unto do ulosna jala hulingkuling do hohosna, angka sihapor dohot situak ni loba do sipanganonna.
On do jamitana; Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuna.
Aek do hudidihon tu hamu; alai Tondi Parbadia do didihononna tu hamu.
Uju i ma ro Jesus sian Nasaret, na di luat Galilea, jadi tardidi ma Ibana di aek Jordan, dididi si Johannes.
Di na hehe Ibana sian aek i, pintor diida si Johannes ma mungkap langit, jadi songgop ma Tondi i songon darapati tu Ibana.
Jala masa ma soara sian ginjang i, na mandok: Ho do Anak haholongan ni rohangku; lomo do rohangku di Ho!
Dung i mamintor ditogihon Tondi i ma Ibana tu halongonan.
Asa di halongonan ma Ibana leleng ni opatpulu ari diunjuni sibolis i; rap dohot angka binatang do Ibana disi, dung i ro ma angka surusuruan marhobasi di Ibana.
Alai dung dihurungkon si Johannes, ro ma Jesus tu luat Galilea manjamitahon barita na uli ni Debata.
Ninna do: Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma barita na uli i!
Dung i di na mardalani Ibana di topi ni tao Galilea, diida ma si Simon dohot si Andreas, dongan saama ni si Simon, na sumampakkon jalana tu tao i, ai panjala do nasida.
Jadi didok Jesus ma tu nasida: Ihuthon hamu Ahu; bahenonku do hamu sijala jolma!
Pintor ditadingkon nasida ma jala i, laos mangihuthon Ibana.
Jadi dung dumao otik didalani sian i, diida ma si Jakobus, anak ni si Sebedeus, dohot si Johannes, donganna saama i, di bagasan parau do nang nasida patureturehon jalanasida.
Dung i manigor dijou ma nasida, gabe ditadingkon nasida ma amanasida, si Sebedeus na di parau i rap dohot angka anak gajianna, laos ro do nasida mangihuthon Ibana.
Dung i dibongoti nasida ma huta Kapernaum, jadi manigor tu parguruan ma Ibana di ari Sabbat, laho mangajari.
Gabe longang do rohanasida umbege podana, ai na marsahala do pangajarionna di nasida, ndada songon angka sibotosurat.
Jala tongon ma adong di parguruannasida sada halak partondi na hodar na mangangguhi.
Ninna do: O Jesus, na sian Nasaret; marhua Ho tu hami! Na ro do Ho hape mangago hami! Hutanda do Ho; na badia ni Debata do Ho!
Alai disonggahi Jesus do ibana, didok ma: Sip ho! Ruar ma ho sian ibana!
Gabe disarat tondi na hodar i ma ibana, pola gogo soarana manjoujou, laho ruar sian ibana.
Jadi longang ma rohanasida saluhutna, pola masisungkunan nasida, angka didok ma: Na beha do on? Poda na imbaru do on! Ai gari angka tondi na hodar dipaksa mardongan sahala, gabe dioloi do Ibana.
Dung i pintor sar ma baritana tu sandok luat Galilea i.
Dung ruar sian parguruan i, manigor dibongoti nasida ma jabu ni si Simon dohot si Andreas raphon si Jakobus dohot si Johannes.
Alai na peak do simatua boru ni si Simon i panepaneon, jadi manigor ditaringothon ma i tu Ibana.
Jadi didapothon ma ibana, dijama ma tanganna pahehehon; dung i ditadingkon panepane i ma ibana, jadi dihobasi ma di nasida.
Alai dung bot, dung sundut mata ni ari, masiboan na marsahitna be ma halak tu jolona, ro di na sinonggopan ni angka sibolis.
Gabe sude nasida na sahuta i marpungu di jolo ruma i.
Jadi torop do angka na hansitan na marragamragam sahitna dipamalum jala torop sibolis dipabali; alai ndang diloas angka sibolis i paboahon, naung ditanda nasida Ibana.
Dung i manogotna i, borngin situtu dope, hehe ma Ibana tu balian, laho martangiang tu na lungun.
Jadi diihuthon si Simon dohot angka donganna ma Ibana tusi.
Jadi dung jumpangsa, didok nasida ma mandok Ibana: Sude halak mangalului Ho!
Alai didok Ibana ma tu nasida: Beta ma hita tu na asing, tu angka lumban na humaliang an, asa dohot disi Ahu marjamita. Ai ala ni i do umbahen na ro ahu!
Laos laho ma Ibana marjamita tu parguruannasida na di liat Galilea jala dipabali angka sibolis.
Jadi ro ma sada halak na huliton tu jolona, dielehelek jala disomba ma Ibana huhut mandok: Molo na olo Ho, tarpamalum Ho do ahu!
Jadi asi ma rohana, disurdukkon ma tanganna, dijama ma ibana, laos didok ma: Na olo do Ahu; ias ma ho!
Jadi pintor longkang ma hulit i sian ibana, gabe ias ma dagingna.
Dung i gogo ma ibana dipopai jala manigor dipalaho ma.
Ninna ma mandok ibana: Jaga ho; so tung dipaboa ho i tu manang ise! Alai laho ma ho, patuduhon ma dirim tu malim, dung i pelehon ma na pinatikkon ni si Musa, ala naung malum ho, bahen panindangion tu nasida!
Alai dung laho ibana, dipungka ma pararathonsa, dipasar ma hata i, pola so tarbahen Ibana be bongot tu huta i di na patar; jadi di ruar, di inganan na sumoding nama Ibana. Laos ro do halak sian desa na ualu i manopot Ibana.