Markus 5
Dung i sahat ma nasida tu bariba ni tao i, tu luat ni halak Gadara.
Jadi di na ruar Ibana sian parau i, pintor ro ma mandapothon Ibana sahalak na ro sian parbandaan, na manjujung tondi na hodar.
Di parbandaan do ibana maringanan, jala ndang adong na tuk tumali ibana, nang pe dirantei.
Ai nunga jotjot dirantei tanganna dohot patna, alai ditostosi do angka rante na di tanganna dohot na di patna i; ndang tarpatunduk jolma ibana.
Jala manongtong arian dohot borngin di parbandaan nama ibana manang di angka dolokdolok mangangguhangguk huhut mambalbalhon batu tu dagingna.
Di na tinatapna i Jesus sian na dao, ro ma ibana marlojong jala marsinggang tu jolona.
Laos marsoara na gogo ma ibana manjoujou, ninna ma: Marhua Ho tu ahu, Jesus, Anak ni Debata na tumimbul! Huelehelek Ho marhitehite Debata: Unang ahu arsahi!
Ai nunga didok tu ibana: Ruar ma ho, tondi na hodar, sian halak on!
Dung i disungkun ma ibana: Ai ise goarmu? Gabe didok ma mangalusi: Loksa do goarhu, ai torop do hami.
Jala mansai dielehelek ma Ibana, anggiat unang nasida dipabali sian na saluat i.
Alai adong ma disi, di robean i babi sapunguan na balga, na manjampali.
Jadi dielehelek nasida ma Ibana, ninna ma: Suru ma hami tu bagasan babi an, asa i hubongoti hami!
Dioloi ma nasida, gabe ruar ma angka tondi na hodar i, dibongoti ma angka babi i, jadi mardobur ma na sapunguan i sian tolping i tu tao i; hirahira duaribu do toropna, gabe mate mogap ma di tao i.
Alai na maporus do angka parmahan i, dibaritahon ma i tu angka na di huta dohot na di angka ladang. Jadi ro ma angka i manangkasi na masa i.
Jala ro ma nasida tu Jesus, jadi mabiar ma nasida marnida na sinonggopan ni sibolis nasailaonna i, hasandaran ni na saloksa i, ai nunga hundul ibana marulos jala marroha.
Jala dipajojor angka na marnidasa ma tu na ro i, naung masa tu hasonggopan ni sibolis i dohot na taringot tu babi i,
gabe pintor dielehelek ma Ibana, asa sumurut sian luatnasida.
Jadi laho mambongoti parau i Jesus, diparhurajai hasandaran ni angka sibolis i ma Ibana, asa dongananna Ibana nian.
Alai ndang diloas, didok ma tu ibana: Muli ma ho tu angka sisolhotmu, pajojor ma tu nasida godang ni na binahen ni Tuhan i tu ho dohot pangasina di ho!
Dung i laho ma ibana dipaboaboa ma di Sisampuluhuta i godang ni sude na binahen ni Jesus tu ibana, gabe longang ma saluhutna.
Jadi dung marparau Jesus muse tu bariba i, dirongomi natorop i Ibana na di topi tao i dope.
Jala ro ma sintua ni parguruan i sahalak, na margoar si Jairus; jadi disi diida Jesus, marsinggang ma ibana tu lambung patna.
Diparhurajai ma Ibana, ninna huhut: Na matemate ne do nuaeng borungku; sai ro ma Ho jolo mangampehon tanganmu tu ibana, asa malua jala mangolu!
Jadi hehe ma Ibana, didongani ma, jala torop ma halak mangihuthon, pola disosak nasida Ibana.
Dung i adong ma disi parompuan sada na marsahithon bulan, leleng ni sampuludua taon.
Nunga tung godang ditaon binahen ni torop pandaoni jala sude artana dipasuda tusi; laos so marniula, lam tu pasangna tahe sahitna i.
Jadi dung dibege barita ni Jesus, ro ma ibana rap dohot natorop i sian pudi, dijama ma ulosna.
Ai ninna rohana do: Asal hujama nanggo ulosna i, malum do hilalaonku.
Jadi pintor montok ma mudar i; laos dihilala do di dagingna, naung malua ibana sian na niaena i.
Ia Jesus mamintor diboto do, naung adong hagogoon ruar sian Ibana, jadi dipahusor ma dirina di tongatonga ni natorop i, ninna ma: Ise i na manjama uloshi?
Gabe didok angka siseanna ma mandok Ibana: Diida Ho do panosak ni natorop on di Ho, gabe didok Ho dope: Ise manjama Ahu?
Alai dibereng ma humaliang mananda na mambahensa.
Gabe ro ma parompuan i, angka dotdot ma ibana dibahen biar ni rohana, marningot naung masa tu ibana i; laos marsinggang ma ibana tu jolona, sintong ma dipaboa saluhutna i.
Alai didok ma tu ibana: Dipalua haporseaonmi do ho, inang! Mardame ma ho laho! Sai malua ma ho sian parniaeanmi!
Mangkatahon i dope Ibana, nunga ro angka na sian bagas ni sintua i mandok: Nunga mate borumi; aha be lojaanmu Guru i!
Alai diparhamuda Jesus do hata ni na ro i, didok ma tu sintua i: Unang ho mabiar, asal ma porsea!
Jadi ndang diloas manang ise mangihuthon Ibana, dungkon ni si Petrus, Jakobus dohot Johannes, dongan saama ni si Jakobus i.
Sahat ma nasida tu bagas ni sintua i, jala diberengi Ibana ma na gaor i, i ma angka na tumatangis jala gogo mangandungi.
Dibongoti ma, didok ma tu nasida: Boasa songon i gaor hamu jala tumatangis? Ndang na mate si betet i: na tarpodom do i!
Jadi diparengkeli nasida ma Ibana. Alai diparuar ma nasida saluhutna, diarahon ma ama dohot ina ni dakdanak i dohot donganna hian, dibongoti ma bilut hapeahan ni dakdanak i.
Dung i ditangkup ma tangan ni dakdanak i, didok ma tu ibana: Talita kumi! Astuanna: O Butet! Ahu mandokkon ho hehe!
Dung i mamintor hehe ma boruboru i laos mardalandalan. Marumur sampuludua taon do ibana, gabe tarhalomong situtu ma nasida.
Alai gomos ma nasida dipopai, unang diboto manang ise i; laos didokkon ma lehononna mangan.