Poda 4
Sai tangihon ma, hamu ale angka anaha, pangajaran ni sada ama, jala ringkoti hamu ma gumuruhon pangantusion.
Ai poda na denggan do na hulehon tu hamu, unang tung tadingkon hamu patikku.
Ai ahu pe, siminik ni damang do ahu, hasudungan jala anak sasada ni dainang.
Jadi dipodai ibana ahu, jala didok do mandok ahu: Sai parateatehon ma angka hatangki, jala radoti angka tonangku, asa mangolu ho!
Sai eahi hapistaran, eahi ma tutu pangantusion; unang tung halupahon, jala unang tundali angka hata ni pamanganku.
Unang tung tadingkon angka i, asa diramoti ho; sai haholongi ma angka i, asa dijaga nasida ho.
Parmulaan ni hapistaran, on do: Tuhori hapistaran i, jala tuhorhon sandok na niomom tumuhor pangantusion!
Sai parhamaol ma i, asa dipatimbul ho, marmulia do ho bahenonna, molo marparsigantungan tusi ho.
Lehononna do tu ulum bulangbulang hasoloan, tumpal na jagar situtu basabasahononna tu ho.
Sai tangihon, ale anaha, jala jangkon ma angka hatangki, asa tamba di ho angka taon ni ngolum.
Di bagasan dalan hapistaran ahu mangajari ho, huiringiring ho mardalan di angka lapang hatigoran.
Molo mardalan ho disi, ndang tagamon hagogotan langkalangkam, jala molo marlojong ho, ndang tagamon tartuktuk.
Marsitiopan tu pangajaran ma ho, unang parsitading i; sai tiopi ma i, ai i do hangoluanmu.
Unang paihut dalan ni angka parjahat, jala unang mardalani ho di dalan ni parjahat.
Tung palua dirim sian i, unang bolus sian i, paholang dirim sian i jala pasiding.
Ai ndang tarpodom nasida, nda jolo manjahati, ndang tarnono matanasida, nda jolo targasip dibahen manang ise.
Ai roti hajahaton do dipangan nasida, jala anggur pangarupaon diinum nasida.
Alai anggo lapang ni halak partigor tudos tu buha siang ari, lam tu tiurna do, sahat ro di hos ni ari.
Ia dalan ni halak parjahat tudos tu na holom marimpotimpot, ndang diboto nasida partuktuhannasida i.
Ale anaha, sai parateatehon ma angka hatangki, tarehon ma pinggolmu tumangihon angka hatangki.
Unang tung sirpang angka i sian matam, sai momosi ma di tongatonga ni roham.
Ai hangoluan do i di angka na jumpangan disi, jala gabe hahisaron di sandok dagingna.
Sian saluhut sijagaon i, gumodang ma jaga roham, ai sian i do ruar angka mual hangoluan.
Paholang ma sian ho ansiansi ni pamangan, jala padao sian ho bibir sijubajabi.
Sai manulus tu jolo ma matami mamereng, jala langkop ni matam manuju tigor tu jolom.
Sai timbangi ma pangalangka ni patmu, asa tung marsihohot saluhut dalanmu.
Unang manimbil ho tu siamun manang tu hambirang, sai paholang ma patmu sian hajahaton.