Psalmen 35
Badai, ale Jahowa, angka na mambadai ahu, musu i angka na mamusui ahu.
Sintak ma lombulombu na bidang dohot na metmet, jala hehe ma Ho mangurupi ahu.
Hitir i ma hujur, jala ambat angka na mangalele ahu, dok ma tu rohangku: Ahu do hatuaonmi.
Ingkon maila jala murak ma nian sogot angka na mangalotongi hosangki, sai sumurut tu pudi jala tarjimput ma angka na marsangkapi hamagoanku.
Ingkon sobokkon rapanrapan ma nasida maradophon alogo, jala suruan ni Jahowa ma mamonsa nasida.
Sai gabe haholomon dohot hamororon ma dalannasida i, jala suruan ni Jahowa mangalotongi nasida.
Ai buni do ditaon nasida jorgongna dompak ahu soada alana, dihali do sada godung padapot hosangku nian, soada alana.
Sai ro ma tu ibana hadodobur, so pangkirimanna, jala jorgongna, na tinaonna i buni padapot ibana, mardobur ma ibana tubagasan.
Asa marolopolop rohangku mida Jahowa, jala marhinsa mida hatuaon na sian Ibana.
Ingkon sude angka holiholingku mandok: Ale Jahowa, ise ma songon Ho, na paluahon na dangol sian na gumogo sian ibana, nang na dangol dohot na pogos sian na mandobo ibana!
Hehe do angka sitindangi hajahaton, na so hupabotoboto do diusousoi tu ahu.
Najat do dibahen nasida tu ahu balos ni na denggan; tarduru do hosangku dibahen.
Ianggo ahu nian, hori do abithu jumpa marsahit nasida, hupapeak do rohangku marpuasa, jala mulak tu ampuanku do tangiangku.
Sobokkon aleale, sobokkon dahahang ibana pangalahongku hubahen, tungki jala donda do pangalangkangku, songon na marhinamagohon ina.
Hape marlas ni roha jala marpungupungu do nasida di hadadapothon, marpungupungu pallampusung, angka na so hutanda tumahi ahu, sai marlesanlesan do nasida, ndang marpansohotan.
Udur do nasida dohot angka simanggoanggo patungoripon dompak ahu.
Ale Tuhan, sadia leleng on do paidaidaonmu? Sai paulak ma hosangku sian hamagoan binahennasida, sian anak ni singa hosangku na tarpunjung.
Pujionku ma Ho di luhutan na balga, jala baritahononku ma Ho di hatorapan.
Sai unang ma marlas ni roha angka musungku pangansi mida ahu, angka na mangkasomorhon ahu, soada dalanna, angka na masihidopan.
Ai ndada hadameon dihatahata nasida, sai ditubutubui do hata sipaotooto dompak angka partobok isi ni tano i.
Jala sai dipangangang do babanasida dompak ahu, angka ninna do: E, debai, e, debai! Ndi nunga tung huida hami!
Diida Ho do i, ale Jahowa, unang sai sip Ho! Unang mandaodao Ho sian ahu, ale Tuhan!
Sai ngot ma Ho jala tarsunggul mangaluluhon uhum di ahu di parbadaankon, ale Debatangku jala Tuhanku.
Sai uhumi ma ahu hombar tu hatigoranmu, ale Jahowa, Debatangku, asa unang marlas ni roha nasida mida ahu.
Asa unang angka didok di bagasan rohanasida: E, debai, i ma lomo ni rohanami! Unang tardok nasida; nunga hupolgaki hami ibana.
Ingkon maila ma nian jala murak saluhut angka na mangkalashon hinamagongki, maruloshon hailaon dohot haurahon ma angka na manggakgak dompak ahu.
Sai marolopolop jala marlas ni roha ma angka na mangkalomohon hatigoranki, angka na tongtong mandok: Timbul do Jahowa, na lomo roha di hasonangan ni naposona!
Jala sai paboaboaon ni dilangku do hatigoranmi, sipatsipat ni ari pujionna Ho.