Rom 3

Asa dia nama hasurungan ni Jahudi? Tu aha ma hasea parsunaton i?

Sandok godang do i. Parjolo: Hasahatan ni angka pandok ni Debata do nasida.

Ai beha nama, ia so porsea na deba? Tung tarbahen nasida na so porsea i ma manegai haburjuon ni Debata Sihaposan i?

Dao ma i! On do tahe: Parsintong do ia Debata, alai pargabus do nasa jolma, songon na tarsurat i: "Asa pintor ho di angka pandohanmu jala monang di panguhumonmi!"

Alai beha ma dohononta? Ia dipajongjong hageduhonta hatigoran ni Debata, nda na geduk ma Debata, molo dipalalu rimasna? Santabi di Debata!

Dao ma i! Ai aut i, songon dia ma taruhum Debata portibi on?

Alai molo lam timbul hasintongan ni Debata binahen ni gabushu paganda hasangaponna boasa uhumon dope ahu songon pardosa?

Nda tagonan ma taula na roa, asa ro na denggan, songon pandok ni na deba magarehei hita; songon i do hatanta, ninna. Patut ma antong hona uhum angka sisongon i!

Asa boha ma? Marhasurungan do hami? Ndangana, ai nunga hupatorang: Rap ginomgoman ni dosa do saluhutna, halak Jahudi nang halak Junani.

Hombar tu na tarsurat i: "Ndang adong na tigor nanggo sada!"

"Ndang adong na marroha, na usouso di Debata."

"Saluhut nasida nunga manimbil, tung sange do nasida marroha mago; ndang adong sibahen na denggan nanggo sada."

"Tanoman na ngangang do aruarunasida, na paotootohon do dilanasida; bisa ni ulok dari do ditoru ni bibirnasida."

"Gok burabura dohot hata podu pamangannasida."

"Hirtap do patnasida mandurushon mudar."

"Hamagoan dohot haporsuhon do di dalannasida."

"Ia dalan hadameon i ndang diboto."

"Ndang marhabiaran di Debata rohanasida."

Alai taboto do: Tu na ginomgoman ni patik i do nasa hata ni patik i, asa mangkohom nasa jolma jala marutang tu Debata sandok manisia.

Ai ndang dapotan hatigoran jolma nanggo sada di adopan ni Debata, anggo sian na mangulahon patik i. Ai dihorhon patik i do panandaon di dosa.

Alai nunga gabe patar nuaeng hatigoran ni Debata, so sian patik i, songon naung dihatindangkon patik i nang angka panurirang pe.

I ma hatigoran ni Debata na marhitehite haporseaon di Jesus Kristus sahat tu saluhut angka na porsea.

Ai ndang adong imbar ni i: Tung saluhut do nasida mardosa jala ndang dapot pujion ni Debata nasida.

Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus.

Ibana do dipadiri Debata bahen habangsa parasian marhite sian haporseaon di mudarna i, asa dipapatar Debata disi hatigoranna, ala naung dibolus matana angka dosa najolo marhite lambas ni rohana.

Ai naeng papataron ni Debata hatigoranna apala nuaeng, asa pintor Ibana jala dipintori na marhaporseaon di Jesus.

Asa adong dope sipangasahononhon? Nunga gotap anggo i! Binahen ni patik dia do? Binahen ni angka parulaon i do? Nda tung, binahen ni patik haporseaon i do.

Asa on do dijujur rohanta: Haporseaon i do mamintori jolma, ndada na mangulahon patik.

Ai holan Jahudi do nampuna Debata? Nda dohot sipelebegu i? I do antong; dohot do sipelebegu i!

Ai sada do Debata na mamintori na tarsunat sian haporseaonnasida, songon i nang na so tarsunat i, ala ni haporseaonnasida.

Asa na mangarumpakkon patik do hita binahen ni haporseaon i? Dao ma i! Na pajongjongkon patik i do hita.