Ulaon ni Apostel 11
Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.
Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma:
Bongot do ho hape tu angka halak na so tarsunat, jala rap mangan do ho dohot nasida!
Alai jojor sian mulana ma dipatorang si Petrus na masa i, ninna ma:
Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku.
Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.
Jadi hubege ma soara na mandok tu ahu: Hehe ma ho, Petrus; seseati ma, pangan ma!
Alai ningku ma: Tongka, Tuhan! Ai ndang dung hudai na ramun manang na so ias.
Alai mangalusi ma soara i paduahalihon sian ginjang: Unang ramun dok naung niiasan ni Debata!
Ro di tolu hali do masa songon i dung i ditait ma saluhutna i muse tu ginjang.
Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu.
Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i.
Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus!
Hatahonon ni i do tu ho hata na tau paluahon ho ro di sandok isi ni jabum!
Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i.
Disi ma huingot hata ni Tuhan i na nidokna i: "Aek do dididihon si Johannes, alai Tondi Parbadia do didihononhon tu hamu!"
Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?
Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu!
Alai anggo angka na marserak i hinorhon ni pangaleleon siala si Stepanus, torus ma didalani luat Penisia sahat ro di pulo Siprus dohot Antiokia; alai holan tu Jahudi sambing dope dibaritahon nasida hata i.
Alai adong do tahe deba sian nasida, halak Siprus dohot Kirene, na sahat ro tu Antiokia, gabe dibaritahon Tuhan Jesus disi nang tu halak Junani.
Jadi didongani tangan ni Tuhan i nasida: Jala na nia toropnasida gabe porsea, angka na mandompakkon Tuhan i.
Pola tarbege baritanasida tu huria na di Jerusalem i, gabe disuru nasida ma si Barnabas tu Antiokia.
Tolhas ma ibana tusi, jadi diida ma asi ni roha ni Debata, gabe las ma rohana; laos diapoi ma sasude, asa marsihohot rohanasida mian di Tuhan i.
Ai tung halak na denggan roha do ibana, gok Tondi Parbadia dohot haporseaon, gabe ganda ma torop halak tartogu tu Tuhan i.
Dung i borhat ma ibana laho tu huta Tarsus mangalului si Saulus; jadi dung jumpangsa, ditogihon ma tu Antiokia.
Gabe rap ma nasida mian di huria i sataon lelengna, torop ma halak diajari disi; laos di Antiokia parjolo targoar angka sisean i halak Kristen.
Alai tuat ma uju i angka panurirang sian Jerusalem tu huta Antiokia.
Jadi hehe ma sada sian nasida na margoar Agabus, disurirangkon ma marhitehite Tondi i masa ni haleon potir tu liat portibi on; i ma na songgop uju hinarajahon ni si Klaudius.
Dung i dituptup angka sisean i ma manongos tumpak, marguru tu na tarpatupasa be, tu angka dongan na maringanan di Judea.
Saut ma i dibahen, ditongos ma i tu angka sintua i marhitehite tangan ni si Barnabas dohot si Saulus.