Acts 2

RAN en pentikos lao leler, irail karos kot pena wasa ta kis.

A madan nil laud eu likamata nil en melimel peidido san nanlan o kadirela im o wasa, re kot pena ia.

A lo siraneran akai likamata kisiniai pwarado sokedi pon amen amen.

Irail karos ap dire kila Nen saraui ap pikikidi padaki wei ni lokaia toror, duen Nen kotin kamasan irail ada.

Men Sus, ol lelapok ko san nan wei karos pan lan kaikairu lerusalem.

Irail lao roner duen mepukat karos, ap pokon penaer o puriamui kila, aki amen amen roner udan a lokaia.

Irail karos poneponeki o puriamuiki indada: Kilan, kaidin mepukat karos men Kalilaa, me kin padapadak?

A daduen, kit kin ron irail amen amen ni udan nil atail?

Men Partien, men Medien, men Elam, o toun Mesopotamien, o Iudaa, o Kapadosien, o Pontus, o Asien,

O Prikien, o Pampilien, o Akipten, o liman Lipien; salon Kirene, o men Rom, me mi wasa et, karos Sus oko o Proselit oko,

Men Kreta o men Arapien, iaduen kitail kin ron kin irail udan nil atail ar katitiki manaman en Kot akan?

Irail karos ari pinidar o ponepondar, indada nan pun arail: Dakot met?

Akai lalaue indada: Irail dire kila wain kap.

A Petrus ianaki ekamen oko ap kotida, kapitie laudeda masani on irail: Ol en Iudaa kan o komail karos, me kauson Ierusalem, komail en asa duen met, o komail ron mas ai padak!

Pwe mepukat kaidin sakaular, duen omail kiki on, pwe apton auer kasilu en ran wet;

Pwe iei mepukat, me lolok ren saukop Ioel:

Kot kotin masanier: Ieteten me pan wiaui ni imwilan ran akan: I pan kamoredi Nen i pon uduk karos. Noumail ol o li akan ap pan deideikop, o noumail manakap akan pan kilekilan kaudial akan, o noumail di ma kan pan auramenda;

A ni ran oko I pil pan kamoredi Nen i pon ai ladu o lidu kan, rap pan deideikop.

O I pan kapwareda manaman akai nanlan pali poa, o kilel akai nin sappa pali pa: Nta, o kisiniai, o adiniai;

A katipin pan wukila rotorotala, a saunipon pan wiala nta mon ran lapalap o linan en Kaun o pan pwarado.

O a pan wiaui ma meamen likwir on mar en Kaun o, a pan dorela.

Ari ol en Israel, komail ron kasoi pot et: Iesus men Nasaret ol amen, me Kot kotin kilele kidar nan pun omail dodok kelail akan o manaman akan, o kilel akan, me Kot kotin wiaki i nan pun omail, duen me komail pein asa;

I lao panalar duen kupur en Kot erpit, komail ap saikikidi pa en me sapun kan, ap pasuredi on ni lopu o kamatalar.

I me Kot kotin kaiasadar, ni a kotin lapwada sal en a matala, pwe a sota kak on, en kolekol i.

Pwe Dawid masanier duen i: I ninar Kaun o potopot mo i; pwe a kotikot ni pali maun i, pwe i ender mokid.

I me monion i peren kida, o lo i popoleki; pil uduk ai pan kamoledi ni kaporopor.

Pwe re sota pan kotin likidmaliela nen i nan wasan mela pil sota kotin mueid on, me sapwilim ar Saraui o pan mor pasan.

Re kotin kasansale on ia er al en maur akan; re pan kotin kadir kin ia la popol mon silan ar.

Ri ai kan mueid on ia, en aima padaki on komail duen sam atail Dawid, me pil matalar o saredier, o sapwilim a sousou mi re atail lao lel ran wet.

A saukop amen, ap mani, me Kot kotin kaula inauki on i me kisan wa men pan kaipokedi pon mol a.

Ari, ni a mamani duen en Iesus a iasada, ap kotin masani, me a sota likidmalielar nan wasan mela, o pil uduk a sota mor pusan.

I lesus, me Kot kotin kaiasadar, kit karos saunkadede en mepukat.

A lao sapwilekidar pali maun en Kot, a kotin aleer san ren sam, en kapwaiada inau duen Nen saraui, ap kotin kamoredi, me komail kin udial o roneron.

Pwe kaidin Dawid, me kotidala nanlan kan, a pein i kotin masani: Kaun o kotin masani on ai Kaun: Mondi ni pali maun i!

I lao wiaki om imwintiti utipan na om akan.

Ari, men Israel karos en asa melel, me Kot kotin kasapwilada i, en Kaun o Kristus i Iesus me komail kalopuelar.

Irail lao ronadar met, ap lel on nan monion arail, re ap indai on Petrus o wanporon tei kan: Ri at oko, da me sen wiada?

Petrus ap masani on irail: Komail kalula, o amen amen en paptais on ni mar en Iesus Kristus, pwe dip omail akan en lapwada. A komail pan tunole Nen saraui.

Pwe nan inau wet on komail o noumail seri kan, o on irail karos men iluwei, mo Kaun, atail Kot, pan kotin molipo.

O pil son en masan toto, me a kadede on irail, o panaui kin irail, masani: Komail en dorela pein komail san nan di sued wet!

Irail me duki on a masan ap paptaisela; ari, ni ran o aramas impan silekid me saulanalar.

Irail dadaurata padak en wanporon akan, o ar minimin pena, o kamadip saraui, o kapakap akan.

Lomwi ap kipadi aramas karos o manaman o kilel akan toto wiauier ren wanporon akan.

O karos me posonla, kin pokopokon o aneki pena kapwa takis.

O netikila ar kapwa kan o nene on irail karos, duen ar samama amen amen.

Irail ari kaukaule wia minimin eu nan im en kaudok o, o pilitiki pena prot nan im ar akan, o re manamana ni popol, o lolepot pena,

Kapikapina Kot o konekon ren aramas karos. A Kaun o kotiki on momodisou, me dorola kan ni ran karos.