Acts 24

A MURIN ran limau samero lapalap Ananias kotido ianaki saumas akai, o saunlokaia men, me ad a Tertulus; irail weiwei loke Paulus ren kopina.

A lao wisikedo, Tertulus ap pikikidi weiweiloke i indada:

Kit asaer duen muein popol re omui o duen kamau toto kan on toun wei wet, pweki omui kalanan main Peliks. O i me s e kapikapina kin komui ansau o wasa karos.

A i sota men kapanai komui, iet eta me i poeki re omui: Komui en kotin mani kit duen omui kalanan.

Pwe se diaradar, me ol men et me morsued o me kin kapeida Sus akan karos, me mi sappa, o i me saumas en pwin likam en Nasaret,

Me pil son kasaminela im en kaudok o, i me se koledi i, pwen kadeikada, duen at kapun o.

A monsap Lisias kotin pwarado, kotiki san i nan pa at ki a manaman lapalap,

Masani on me weiweiloke i, en poto don re omui, a komui lao kalekalelapok re irail, kom pan pein mani duen meakan, me se pan kila i.

A Sus oko pil weiweiloke Paulus indada: Mepukat melel!

A kopina lao olol on Paulus, en kaparok, a ap kotin sapen masani: Ni ai asaer, me komui saunkapun pan toun wei wet saunpar toto, i peren kida, ai pan indinda duen pein nai.

Pwe komui pan mani, me pon naul ria pon eta, me i kodalan Ierusalem pwen kaudok.

A irail sota diar ia da lokaia on amen nan im en kaudok, de kapeida aramas oko nan sinakoke kan de nan kanim o.

O re pil sota kak kadede, me re pan kin ia la met.

A iet eta, me i men kadede on komui, ni ai kin kamelele karos, me intinidier nan saukop akan o kapun o, i kin kaudoki on Kot en sam ai kan duen tiak en ir, me re kaadaneki pwin likam.

O i kaporoporeki Kot me irail pil kamelele me melar akan pan maureda, me pun o me sapun kan.

A i me i kin sosonki pein nai, pwe lol i en pun mon Kot o aramas akan.

A murin par toto i kodon wa don toun sap wet kisakis eu o wiadar mairon.

I ansau, me re diar ia makelekeladar nan im en kaudok o sota weriwer de moromoron.

A ir pukat Sus akai nan Asien menda re sota mi met mo ’mui, kadede nai, ma re diar me sued kot re i?

De mepukat en pein kasansaleda sapun da, me re diar re i ni ai mi mon kapun o.

A iet eta lepen lokaia, me i kida ni ai udar nan pun ar indada: En me melar akan ar pan maureda, i pan pakadeikki ran wet re omail.

A Peliks lao ereki mepukat, pwe a mani mau duen al pot et, ap kasau ir wei masani: Kaun Lisias lao kotido, i ap pan kaimwisokela omail kapun.

I ap masani on kaun en kolekol Paulus o kasaladokela i, o ender inapwiedi ian a kan, en kodon papa i.

A murin ran akai Peliks pwarado, a paud Drusila ian i, iei li en Sus amen, ap molipedo Paulus o karone i duen lamalam en Kristus.

A ni a kapakaparok duen pun, o makelekel, o kadeik, me pan wiaui, Peliks ap masapwe kadar o sapen: U kowei ansau wet, i lao pisokalar, i pan eker uk do.

A pil kaporoporeki, me Paulus pan kotiki on i moni, pwen lapwada i; i me a purepure ekeker kido i o kasokasoi on i.

A murin par riau Porsius Pestus sapwiladar wiliandi Peliks. A Pelisk men konekon ren Sus oko, ap sota lapwada Paulus.