Acts 27

A LAO kileledier, me se pan serokelan Italien, re kasilaki Paulus, o akai me salidi, kaun en saunpei amen, me ad a Iulius, kisan pwin en Aukustus.

Kit ari kereda pon sop en Adramitien pot, me pan supi on kanim en Asien akan, me mi pon oror, ap tan wei. Ari, Aristarkus, men Masetonien amen san Tesalonik ian kit.

Mandan ran o se leler Sidon. A Iulius me kadek on Paulus, ap mueid on i, en kotila ren kompokepa ko pwen kasarloleit.

Kit ari maselar san wasa o, ap tanatan pananen Sipern, aki an me u don kit.

Kit tanatan kotela lepen sed en Silisia o Pampilien, se ap lel on Mira en Lisia,

I wasa kaun en saunpei o diarada sop en Aleksandrien pot, me pan maselan Italien, i ari kasau on kit poa.

A kit pwapwand kokola, pon toto meid apwal on kit lel on Knidus, pwe an me kawela; kit ari tanatan pananen Kreta, tan won Salmone.

A meid apwal at dauli wasa o; kit ari lel on sap eu, me ad a Kapitau mau koren ion kanim Lasaa.

A ansau lao daulier o a apwalar on sailok sili, aki ran en kaisesol daulier, Paulus ap kotin panaui o

Masani on irail: Ol oko, i asaer me sailok wet pan suedela a pan apwal kaualap, kaidin on audepan sop o sop eta, pwe pil on maur atail.

A kaun en saunpei o liki saunilil o saumas en sop o san masan en Paulus.

A kapitau me sota non mau on sop en mimieta ni ansaun kapau. Koren ion karos ari men samala san wasa o, o re son, ma re sota kak on lel Poniks, pwen mimita wasa o ni ansaun kapau, I kapitau en Kreta eu, me mi ni pali air o pali apan.

A an lao udo san pali air, re ap kiki on, me re pan pwaida, ap apiada paipun ko tanala liman Kreta.

A madan melimel udo san Kreta, me ad a alepip en kisinian.

A an lao kapeila sop o, o sop solar kak on, kit ap nenenla o peila.

Ni at tanala pananen dake tikitik eu, me ad a Klauda, me tar kis, a se solar kak on koledi pot o.

Irail apiada i, pwen kak piradi on ni sop o, ap lilidi, pwe re masak re de serada nan Sirte, ap punipunidok sili.

Kit lao punipunidok sili kaualap, manda ap kamararadar sop o.

A ni ran kasilu irail kase kila pein pa arail kapwa en sop o.

Kadekadeo ran totola sota katipin o sota usu, o melimel kalaimun u don kit, ap solar at kaporopor en pitila.

A kit lao kaisesol warailar, Paulus ap pwarada nan pun arail masani: Ol oko mak eta, komail en peiki on ia er o so masel san Kreta, pwe kitail ender lel don kaupatail.

A met i panaui komail, en kaporopor mau, pwe sota me pan mela, sop eta me pan ola.

Pwe tounlan en Kot, me sapwilim a nai, o me i kin papa, me kotida imp ai pon,

Kotin masani: Paulus, koe der masak, koe pan wisike won ren Sisa. A kilan, Kot me kotiki on uk er karos me ian uk.

Ari ol oko komail kaporopor mau, pwe i kin poson Kot, me a masan pan pwaida.

A kitail pan serada nin dake eu.

A lao pon naul pa pon lar, kit peipei sili nan sed Adria. Ni ailep en pon toun sop o kasauiada, me se koren ion sap eu.

A irail lao kasedi men son, re ap diaradar, me nap rieisok, o re kaila ekis wasa o kasedi men son, re ap diaradar, me nap eisoklimau.

A re masak, se de serada pon mut, rap kasedi paipon paieu san in murin sop, ap mauki en ran pasan,

A toun sop o lao men pitila san nin sop o, o re apiedi pot apot nan sed, dene re pan kasedi paipon kai ni mon sop o,

Paulus ap masani on kaun o sounpei kan: Ma mepukat sota pan mimieta pon sop o, komail sota pan kak dorela.

Saunpei kan ap leke san pot o kasela o ari.

A lao pan ran pasan, Paulus ap panaui irail, ren mana, masani: Nan a pon naul pa pon lar, me komail kin auiaui o kaisesol o sota mana.

Nai ari panauki komail, en mana, pwe i me komail pil pan piti kila. Pwe sota pit en mon pit pan pupedi san amen komail.

A lao masanier met, ap ale prot, danke Kot mo ’rail karos. I lao pilitiki pasan ap sak.

Irail karos ap kaporopor maular o pil mana.

A kit karos me mi nan sop o, me riepuki isiakan wonumen.

Irail lao medier, rap kamaradar sop o, kasedi on nan madau korn.

A lao wasa ran pasan, re sasa sap o, A re diaradar kapitau me mad mia; i wasa re lamedar en walan sop ia, ma re pan kak on.

Irail lao leke san paipon ko, rap kase ir ala nan madau, o lapwada padil akan, o apiadar p serok en moa ni an o, ap tanala ni oror.

Irail lao lel on mad eu, sop o serada o solar mokid. Mon sop o tenela, a muri ola nan iluk kan.

Saunpei ko ap men kamela me salidi kan, pwe amen de pan pitila san.

A kaun en saunpei o men dorela Paulus, ap sota mueid on irail me re men wia o masani: Me asa pampap, en lusedi on nan madau pap won sap o.

A me tei kan pon tenap de kisan sop o. A ap pwaida, me irail karos dorelar o lel on sap o.