Hebrews 4

KITAIL ari kanakanaion pein kitail, pwe inau pan pedelon on nan a moleilei mimieta, pwe amen re omail ender diarokada duen amen, me sota konodier.

Pwe ronamau pil lolok don kitail er dueta on irail; a arail ron masan o sota kadepa on irail, aki a sota doleki poson ren me ronadar akan.

A kitail me posonlar, pan pedelon on nan moleilei o, duen a kotin masanier: I kaular ni ai makar: Re sota pan pedelon on nan ai moleilei. Ari so, wiawia kan unsokalar ni a kotin kapikadar sappa,

Pwe ekis wasa a kotin masanier duen ran kaisu: Kot kotin moleilei san a wiawia kan karos ni ran kaisu.

O wasa et a pil kotin masani: Irail sota pan pedelon on nan ai moleilei.

Ari, a kak ren akai en pedelon on nan moleilei o; a irail, me aleer ronamau mas o, sota pedelon on, pweki ar sopeik.

Kot ap pil kotin kileledier ran eu: Ran wet! Ni a kotin masanier ren Dawid murin ansau warai, duen a masan moa: Ran wet, ma komail pan ron kapitie, komail der kapitakaila monion omail.

Pwe ma Iosua kamoleilei ir ala, a sota pan kotin katitiki duen eu ran.

Ari kamol en sapat pan sapwilim en Kot akan mia.

Pwe i, me pedelon on nan a moleilei, a pein pil moleileila san a wiawia kan, dueta Kot san sapwilim a kan.

Kitail ari kaporisoki pein kitail, en pedelon on nan moleilei o, pwe amen ender lodi on son en sopeik ota.

Pwe masan en Kot me maur, o manaman, o kon san kodlas au riau, o kin til won, lao a kasare pasan maur o nen, pil kokon akan o kanan en ti o; o kadeikada lamelam o inon en monion o,

O sota man me maur kot me rir san i, pwe meakaros me sansal o kadiarokada mon silan i. Kitail en kapunala pein kitail re a.

Ari, pweki atail samero lapalap kasampwal Iesus, Sapwilim en Kot, me kotidala nanlan, kitail en dadaurata lamalam.

Pwe atail samero lapalap kaidin i amen, me sota kin kotin pam atail luet akan. A i amen me soneson ni son karos dueta kitaill ap sota dip a.

lei me kitail en aima kodon mol en mak, pwe kitail en tunole kalanan o mak, pwen sauas patail ni ansau me mau on.