James 5

A KOMAIL kapwapwa kan, sanesanki o weriwereki, kampamail pan lel on komail!

Omail kapwa kan olar, o man en mot kanalar omail likau kan.

Omail kold o silper mirelar, ari, ar mir me pan kadede on komail, o pan war pasan uduk omail due kisiniai. Nan komail nakier kapwa ni imwin ran akan.

Komail war, pwain en toun dodok, me kop penaer dipisou en sap omail, me komail kulia saner, kin weriwer; o likwir en saundolun akan lel on karona en Kaun Sepaot.

Komail ipuepuarok kier me sued nin sappa, dender on, komail kamue matier monion omail rason man wi, me pan kamela.

Komail kadeikada o kamela me pun o, a a sota palian komail er.

Ari ri ai ko, komail kononama lao lel en atail Kaun a pan kotin pwarado. Kilan, saumat amen kin auiaui wa mau en sap o, o a kin kanonama lao katau en mas o mur moredier.

Komail ari pil kanonama eta, katene monion omail, pwe en atail Kaun a pwarado me korendor.

Ri ai ko, komail der pilipil en pan moli ki amen amen, pwe komail ender pakadeikada. Kilan, saunkadeik o mi pan wanim.

Ri ai ko, ni omail kalokoloko kanonama komail alale san saukop akan, me kokopeki ni mar en Kaun o.

Kilan, kitail kin kapina me dadauratar. Komail roner duen kanonama en lop, o kilaner imwin Kaun O, pwe Kaun o kin kupukupura o kapunlol kaualap.

Ri ai ko, komail kalaka, pwe komail der kaula; der kaukila lan de sappa, o der wia eu son en kaula; a omail sapen en ei ta, o omail so en so, pwe komail de lodi on kadeik o.

Ma amen re omail kamekam, a en kapakap, a ma amen insenemau, a en kauleki psalm.

Ma amen mi re omail me somau, en ukado saunkoa en momodisou kan, pwe irail en kapakapa kin i, murin ar keie kin i le ni mar en Kaun o.

Ari, kapakap poson pan kamaureda me somau o, o Kaun o pan kakelada i, o ma a wiaer dip kai, re pan sapedokalar san.

I me komail en weok pena dip omail o kapakapaki amen amen, pwe komail en kelail la. Kapakap melel en me pun amen kin kareda me toto.

Elias aramas amen dueta kitail, a kapakapaki katau ender moredi, ari solar katau moredi on sappa ni par silu o saunipon wonu.

O a kotin pur on kapakap, nanlan ap kamoredier katau, o sap kapareda wa kan.

Ri ai ko, meamen mi re omail, me salonala ni melel, o amen kasapaledo i,

I en asa, me kasapaledo me dipan amen san ni a salonala, a kamaureda san mela nen eu, me a pan pwain kidi dip toto.