Philippians 4
ARI ri ai kompok kan, ai peren o ai linan komail, katenetendi ren Kaun o kompoke pa i kan!
I panaui Ewodia o i panaui Sintike, pwe ira en minimin pena ren Kaun o.
O i pil poeki re omui ai warok melel, sauasa ira, me ian ia er dodok ni ronamau, ianaki Klemens o ai warok tei kan, me arail mar akan mi nan puk en maur.
Komail peren ki Kaun o ansau karos! I pil pan indada: Komail pereperen!
Komail kadek on aramas akan karos, Kaun o me kotin korendor.
Komail der patauki meakot, a komail kasale on Kot meakaros me komail inon ion ni omail kapakap o nidinid ki danke.
O popol en Kot, me lapa san lolekon, pan apapwali monion omail o omail lamelam ren Kristus Iesus.
Pil eu ri ai kan, karos me melel, karos me kon on, karos me pun, karos me min, karos me kaselel, karos me kalok mau, o ma pil eu tiak mau de men kapin, komail ap madamadaua due!
Meakan, me komail padakier o aleer, o ronadar, o kilaner re i, i me komail wia, a Kot en popol ap pan kotikot re omail.
A nai me perenki Kaun o kaualap, pweki ni ansau wet omail apwali ia me tapwendar; ari so, komail apwali ia ansau karos, a ansau kis komail sota kak on
I sota inda mepukat pweki ai samamalar, pwe i kin insenemau in ai samama o ni ai kapwapwa.
I asada duen tiak en samama o duen tiak en kapwapwa. Nai koiokki meakaros o son karos, i kak metier o men manadar, o muei met o tutupok.
I kak on meakaros, pweki ime katin ia da.
Ari so, me mau omail apwali ia la ni ai paiolar akan.
A komail men Pilipi pil asaer, me sota momodisou apapwali ia ni meakaros dueta komail san ni tapin ronamau, ni ai ko wei san Masetonien.
Pwe komail kisakis don ia pan riapak ni ai samamalar nan Tesalonik.
Kaidin kisakis, me i kin rapaki, a i kin rapaki wa, pwen kalaudela noumail kis in likau.
Pwe me mi re i itar on ia, op il laud san. Muei met mi re i, ni ai aleer omail kisakis ren Epaprotitus. Meakan ras on pomau eu o mairon mau eu, me kon on Kot.
A ai Kot pan kotin kaitar omail samama duen a kapwapwa ni linan ren Kristus Iesus.
A linan en ko on Kot o Sam atail kokolata! Amen.
Ai ranamau on saraui kan karos ren Kristus Iesus. Ri atail akan, me mi re i, kin ranamau won komail.
Saraui kan karos kin ranamau won komail, pil toun im en Sisa mon karos.
Mak en atail Kaun Iesus Kristus en mi ren nen omail! Amen.