Revelation 18

MURIN mepukat i kilaner amen tounlan kodido san lan, me manaman kaualap, o sappa marain kila a linan.

A kotin molipeki kapitie laud masani: A ronk pasan, o ronk pasan, Papilon lapalap, ap id wiala deun tewil akan, o deun nen saut karos, o deun manpir samin, o katantat.

Pwe wei karos nim san wain makar en a nenek, o nanmarki en sappa neneker re a, o saunet en sappa kapwapwakier a kapwa kasampwal akan.

O i roner eu nil san lan masani: Ko wei san i nai aramas akan, pwe komail der ainekida dip ar kan, pwe komail der pukoki kompar akan.

Pwe dip a kan lel oner lan, o Kot kotin tamanda a sued akan.

Depuk on i, duen pein i wiadar! O depuk on i pan ria pak, duen a mau on a wiawia kan; dal o, me a audedar, i dal ota komail aude on i pan riapak!

Duen a kin kalinanda pein i, o kamuei matier, iei due ki on I kalokepa o kasonlolpa, pwe a moneloleki: Nai nanmarki li amen, o i so pan li odi, o i sota pan kilan mesued kot.

I me kompa kan pan lel on i ni ran ota: Mela, o maiei, o lek, o a pan ron kila kisiniai, pwe Kaun Kot me manaman, me kadeikada i;

O nanmarki en sappa kan, me nenek re a, o muei mat san i, re pan maieiki, o weriwereki i ni ar kilan adiniai en a ronala.

O re pan u wasa doo waponki a kamekam indada: Apwal, apwal Papilon, kanim lapalap, Papilon kanim kelail! Ni aur ta ieu kadeik paom pwaida.

O saunet en sappa kan maiei o sanesanki i, pwe sota amen me neti ar kapwa kan.

Kapwa kold, o silper, o takai kasampwal akan, o manaman akan, o likau linen kaselel, o likau tol, o likau silk, o likau waitata, o son en tuka pomau karos, o son en dal karos, me wia kidar ni en elepant, o dal akan, wia kidar tuka kasampwal, o mata pras, o mata, o marmor,

O simet, o potik, o men isis, o me pomau, o pomau en isis, o wain, o le, o plaua kasampwal, o wan wit, o man akan, o man sip, o os akan, o dake pan os, o ladu kan, o nen en aramas akan,

O wan tuka kan, me kaped om kin iauki, rose san uk er, o dipisou linan o kaselel rose san uk er, a solar pan diarokada kokolata.

Saunet en mepukat, me kapwapwadar re a, me pan u wasa doo, wapon kida a kamekam sanesan o mamaiei.

Indinda: Apwal, apwal kanim lapalap, me kapwadeki likau ankotitik, o tol, o waitata, o kapwadeki kold, o takai kasampwal, o manaman!

Pwe ni auer ta ieu kapwa toto pukat olar. O saupal en sop, o ir, me toun sop, o seler akan, o saunet en nan madau, ir uda wasa doo.

O weriwereda, ni ar kilaner adiniai en a isis, indinda: Ia kanim, me rason kanim lapalap wet!

Irail tukatuk en mon wereda, sanesan, mamaiei, indinda: Apwal apwal kanim lapalap! Tou a, me ar sop akan mi nan madau, kapwapwalar, pwe a neti re a mulatokia. Ni auer ta ieu a mokonaidier.

Kaneketeki i lan, o saraui kan, o wanporon kan, o saukop akan, pwe Kot me kotin iki on I komail.

Tounlan roson amen pokada takai due takai lap men iris plaua, ap kasedi on madau, masani: Iduen Papilon kanim lap pan karonk pasan, ap pan solar mia.

Nil en me wia arp akan o kakaul akan, o me peuk kasan plote, o me peuk koronete, pan solar me pan ron re a, o solar saupal, me pan diarok lol om, o nirsok en takai iris plaua solar me pan ron lol om.

O marain en lamp pan solar senser lol om, o nil en ol kamod o li kamod solar me pan ron lol om, pwe noum saunet akan, saumas en sappa, kainok karos pakotaue kilar om widin kan.

O ntan saukop o saraui kan me diarokadar lol om, o ntan karos, me kamekamelar sappa.