Revelation 22

O A kotin kasale on ia pilap en kamaur pot, makelekel due kristal, me u wei san ni mol en Kot o Sippul.

Ni kailan pilap pali karos tukan kamaur mia, me kin wa son en wa eisokriau, me wa saunipon kaukaule; o tan tuka kan men kamaur toun sappa.

O solar men kariala kokolata; a mol en Kot o Sippul me mi lole; o sapwilim a ladu kan pan upa i,

O re pan kilan silan i, o mar a pan mi ni tam ar.

O solar pon ni wasa o kokolata; re solar anane marain en lamp, pil solar marain en katipin, pwe Kaun Kot pan kotin kamaraini ir, o re pan nanmarki kokolata.

A masani on ia: Masan me pun o melel, o Kaun Kot en nen en saukop akan poronedo sapwilim a tounlan, en kasale on sapwilim a ladu kan, me pan wiaui ni ansau koren.

Kilan, I pan madan pwarado, meid pai, me kanekid masan akan en kokop en puk wet!

Nai Ioanes, me roner o kilaner mepukat, o ni ai roner o kilaner, I ap poridier poni mon aluwilu en tounlan, me kasale on ia mepukat.

O a masani on ia: Koe der, nai pil ian uk papa amen o ian ri om saukop akan, o ian ir, me kanekid masan en puk wet, poni Kot!

O a masani on ia: Koe der katene masan en kokop en puk wet, pwe ansau o korendor.

Me so pun, en sapesapuneta, o me samin, en samisamineta, o me pun, en punepuneta, o me saraui en saraui ta.

Kilan, i madan pwarado o ai pwain mi re i, en pwain on amen amen duen ar wiawia kan.

Nai Alpa o Omeka, men Mas o Men mur, Tapi o Imwi.

Re meid pai, me lope ar likau, pwe ren kon on tuka en kamaur, o pedelon on nan wanim en kanim akan!

Liki kiti kan mia, o widinok kan, o nenek kan, o kamela kan, o me poni dikedik en ani, o amen amen me mauki o me wiada likam.

Nai Iesus kadar doer nai tounlan, en kadede on komail mepukat, mon momodisou kan. Nai tapin kadaudok en Dawid, usu ran umpumpul.

Nen o li kamod masani: Kodo! O me pan ron, en inda: Kodo! O me men nim, en kodo, meamen me inon ion, en tunole pil en kamaur sapan.

I kadede on amen amen me ron masan en kokop en puk wet, ma amen pan usai on, Kot pan kotiki on i kampa kan, me intinidier nan puk wet.

O ma amen pan kase son ekis masan en kokop wet, Kot pan kotiki san pwais a nin tukan kamaur o kanim isou, me intinidier nan puk wet.

Me kin kadede mepukat, masanier: Iei I pan madan pwarado. Amen, kotido Main Iesus!

Mak en Kaun Iesus Kristus en mi ren saraui kan karos! Amen.