:
1 KATAMAN kin irail ren peiki on monsap o me manaman akan, o ren apwali wiawia mau karos.
2 Der lalaue amen, der akamai, a en kamantik, o opampap on aramas akan karos.
3 Pwe kitail pil pweipwei mas o, o sopeik, o salonala, o papa son en inon o madon sued akan, kokoa me sued, o peirin, pakailok, o kailonki amen amen.
4 A kalanan o limpok en Kot atail Saundor lao pwarado,
5 A kotin dore kitail la kaidin pweki pein atail wiawia pun, a pein a kupur ki paptais en kaipwi kap o kawilia kap ren Nen saraui.
6 Me a kotin kupura don kitail kaualap ren Iesus Kristus atail Saundor.
7 Pwe kitail en pun kila a mak, pwen sosoki maur soutuk duen at kaporopor.
8 Melel padak pot et o i men, koe en nantion kaweweda, pwe irail, me posonla Kot, en kadoke kin ir wiawia mau, mepukat me mau o kon on aramas akan.
9 A liki san peidok mal akan, o padok en tiak kan, o akamai, o akamai ki kapun, pwe mepukat sota kadepa o me mal.
10 Aramas likin panau amen, panaui pan mepak de ria pak ap muei san i.
11 Pwe koe asa, me i me sapun o kin wia dip, a kadeikada pein i.
12 I lao kadar won uk Artemas de Tikikus, koe madan don ia, Nikopolis, pwe i kileledier me i pan kauson wasa o ni ansaun kapau.
13 Saunkawewe Senas o Apolos kadara don ia madan. Sauasa ira, pwe ira de anane meakot.
14 O naitail akan en porisok o koiokki on wiawia mau, pwe ren der so wa ’rail.
15 Karos, me mi re i, kin ranamau won uk. Ranamau won karos, me kin pok on kit ni poson. Mak o en mi re omail karos!