Amsal 1
Inde sia tu Sarambu peada’na Salomo, anakna Daud, datu Israel,
la unnappa’ kakinaan sia peada’, la untandai kada kebattuan,
la untarima peada’, tu umpabu’tu tangnga’ kinaa, kamaloloan, sia tonganna sia bulo lollong;
la umpaden kamanarangan lako to tang paissan sia kapaissanan sia pa’timbang melo lako to mangura.
Minda-minda tu kinaa melo ke naperangii anna rangngannipi penaa, sia minda-minda unnampui tangnga’ kinaa, melo ke ullolongampi timbangan melo,
la untandai kada peada’ sia panganderan, kadanna sia ponto bannangna tokinaa.
Ungkataku’ PUANG iamo pamulanna mintu’ kapaissanan: apa iatu to baga ussayu kakinaan sia peada’.
E anakku, perangii tu peada’na ambe’mu sia da mutibei tu pa’pangada’na indo’mu;
belanna iamoto tu la mupotali ballo dao ulummu, sia mupomanik ata lan barokomu.
E anakku, iake nanaranko to kadake, da muturu’i.
Iake ma’kadai tu tau iato mai, nakua: Maiko tamale sola mangodo’ umpatibollo rara, sia la unnaungan to tang kasalan, moi tae’ bannangna;
la taamma’ tuo susi penggauranna lino tomate taampello’ kalebui susito male rokko lamunan,
la taappa’ tu ma’rupa-rupa apa keangga’, iatu banuanta la taponnoi pangrampa;
la ketaaki’ sola, sia misa’ri tu kandu’ diparandanangki’.
E anakku, da mumale sola tau iato mai unnolai tu lalan iato; patoyangi tu lentekmu dio mai batattana;
belanna iatu lette’na tau iato mai ma’dondo lako kakadakean sia matira’ la umpatibollo rara.
Tae’ gai’na tu porro’ ditanan ke natiroi mintu’ apa kepani’;
apa iatu tau iato mai rarana kalena naaungan sia katuoanna kalena naodo’.
Susimo lalannato minda-minda tu ungkabudai saro bu’tu kadake, belanna iamo la ungka’tu sunga’na to unnampui.
Iatu Kakinaan metamba-tamba dio batatta, sia umpakapua gamaranna dio lu tana lapang.
Metambami dio kasitammuan batatta marua’, dio lu lalan tama babangan lan lu kota nanii umpokadai tu uleleanna.
Sangapapira, e to tang paissan, la minii ungkamali’i tu katangpaissanan, sia to pa’tellean umporai ma’telle, sia tobaga ungkabiri’ kapaissanan?
Tibalikkomi lako pa’pakilalangku! Manassa la kutuarangkomi tu penaangku, sia iatu kadangku la kupaissanangkomi.
Belanna manokakomi tongku meoli, sia moi misa’ tau tae’ umpalan penaai tongku angka’ limangku.
Belanna tae’ midampangi tu mintu’ pa’ patudungku, mikanoka tu pa’pakilalangku,
iamoto la kupetaai duka tu kasanggangammi, sia patellena’, ke narampoikomi tu mipomagiangna.
Iake rampomi tu mipomagiangna susi angin bara’, sia kasanggangammi matira’ mengkareke’ susi talimpuru’, sia iake la narampoikomi kapussakan sia kamatakuran,
attu iato la metamba-tamba tu tau iato mai lako kaleku, apa tae’ kula mebali, la na daka’na’, apa tae’ naappa’na’.
Belanna ungkabiri’ kapaissanan, tae’ napilei tu ungkataku’ PUANG,
ungkanoka pa’patudungku, sia ussayu mintu’ pa’pakilalangku,
iamoto la nakande tu bua penggauranna, sia umpedia’i kalena pa’tangngaranna.
Belanna katorokossikanna tu to tang paissan la umpatei, sia katangmatangkinanna tobaga la ussanggangi.
Apa minda-minda umperangiina’, la torro manaman, sia la makarimman dio mai kamandasan megiangan.