Amsal 13

Misa’ pia kinaa unturu’ bang peada’na ambe’na, apa misa’ to pa’tellean tang umperangii peta’tan.

Mintu’ tau pantan la ungkande apa melo dio mai buangan kadanna, apa iatu kamoraianna to tang maruru’ lu lako kamasa’garan.

Minda-minda tu ungkampai melo lilana, iamo ungkanannangi katuoanna, apa minda-minda umpatitape-tape pudukna, iamo sikampa kasanggangan.

Iatu penaanna to tukkunan maduang, apa moi misa’ tae’ nakabu’tui, apa iatu penaanna to birisan dipedia’i tongan.

Iatu to malambu’ ungkabiri’ kada buttok, apa iatu to tang mekaaluk nasikabiri’i tau sia la kasirisan.

Iatu kamaloloan ungkaritutui to tang sayuan, apa iatu katangmekaalukan umbambangan tokadake gau’na rokko kasanggangan.

Den tu tau unna’ga tosugi’ kalena, na moi misa’ apa tae’ naampui; sia den duka tau unna’ga tobongko kalena, apa unnampui ianan buda.

Iatu la’bak penaanna tau, iamotu kasugiranna, apa iatu tobongko tang urrangi pa’pakua.

Iatu arrangna to malambu’ la marorrong melo, apa iatu palitanna to tang mekaaluk la dipa’dei.

Bannang dio kamatampoan anna bu’tu kasigagan, apa iatu to umperangii pa’patudu, unnampui kakinaan.

Iatu ianan tang dima’pu’i, madoi’ poppong, apa minda-minda tu limanna kalena mangrampun, la sugi’.

Iatu kapa’rannuanan dipadapa umpa’dikki penaa, apa ianna sundunmo tu lalan inaa, iamo kayu katuoan.

Minda-minda tae’ nadampangi tu kada iato, manassa la dipapakkanni; apa minda-minda ungkataku’i tu pepasan iato, iamo la unnappa’i tu poleanna.

Iatu pangadaranna to kinaa iamo misa’ kalimbuang katuoan, la umpatilendok tau dio mai poya kamatean.

Iatu pakita penaa melo umpabu’tu kamaturu-turuan, apa iatu lalanna to tang maruru’ masussa diola.

Minda-minda tu matarru’, umpogau’ mintu’ apa sikambi’ pa’timbangan, apa iatu to baga umpasombo kabaganna.

Iatu to dikomba-kombai tang mekaaluk la tobang rokko kamandasan, apa iatu pesua maruru’ umpaden kamanamanan.

Kamakario-rioan sia siri’ la urrampoi tu to untumpu peada’, apa iatu to umpalan penaa pa’pakilala la dipakala’bi’.

Ianna sundunmo tu lalan inaa, napomanaman penaa, apa umpatoyang kale dio mai kakadakean napomagalli to baga.

Minda-minda sikabiasa to kinaa, manassa la kinaa; apa minda-minda tu sikadamak tobaga, manassa la mengkadake.

Iatu kakadakean unnula’ tokadake gau’na, apa lako to malambu’ la Napakkan Puang kameloan.

Iatu to melo la untampean mana’ lanto mimi’na, apa iatu iananna tokadake gau’na untayan to malambu’.

Iatu buakan pa’lakna tobongko ma’din umpabu’tu kande sebo, apa iatu iannato sipissan-pissan pa’de napobua’ katangmalamburan.

Minda-minda tu unnanna pebambana, ungkabiri’ anakna; apa minda-minda tu ungkamasei anakna, naada’ tonna mangura.

Iatu to malambu’ la kumande sadia’na, apa iatu tambukna to tang mekaaluk la lo’bang.