Amsal 16

1

Iatu tolino ba’tu pira-pira tu pa’timbangan lan penaanna, apa iatu pebalinna lila bu’tu lu dio ia mai PUANG.

2

Mintu’ tu lalanna simisa’-misa’ tau masero dio pentirona, apa PUANG ussudii tu penaanna.

3

Sorongi tu mintu’ pengkarangammu lako PUANG, iake susimito, la dadi tu tanan penaammu.

4

Mangkamo Napadadi PUANG tu mintu’na la unturu’i tu lalan pa’inaanNa, moi na iatu to tang mekaaluk, la Naparampoi duka allo kamandasan.

5

Minda-minda matampo penaanna Nakagalli PUANG; manassa tae’ nala tilendok dio mai ukungan.

6

Iatu kakelokan napa’dei pa’kaboro’ sia kamarurusan, sia bannang dio kamatakuran lako PUANG, anna toyang tu tau dio mai kakadakean.

7

Iake naalai penaanNa PUANG tu lalanna misa’ tau, Puang Kalena umpasikaeloi ualinna.

8

Iatu polean sidi’, ke naturu’i kamaloloan mandu melo, na iatu polean buda naturu’ kakelokan.

9

Iatu penaanna tolino untangnga’-tangnga’ lalanna, apa PUANG unnato’i tu tengkana.

10

Iatu pangra’ta’Na Puang dio pudukna datu, iake ma’paolai salui tang sala tu pudukna.

11

Iatu petimbang sia timbangan tongan lu dio mai PUANG, mintu’ batu timbangan lan kandu’ panggaraganNa duka.

12

Nakagalli datu umpogau’i tu katangmekaalukan, belanna tete dio kamaloloan nadipabantang tu isungan kapayunganna.

13

Iatu puduk malambu’ naala penaanna mintu’ datu, iatu tau umpokada tonganna nakamasei.

14

Iatu kare’dekan ara’na datu iamo pesuanna kamatean, apa iatu to kinaa iamo ussa’poi.

15

Iatu arrang lindona datu umpaden katuoan salama’, sia iatu kamasokananna butung to gaun ke palauran undi.

16

Losong ia melona tu unnappa’ kakinaan, na iake unnappa’ bulaan, losong diangga’ tu ullolongan tangnga’ kinaa na ullolongan salaka.

17

Iatu patunna to bulo lollong iamotu untoyangan kalena dio mai kakadakean; sia minda-minda ungkaritutui lalanna, iamo ungkanandai katuoanna.

18

Iatu kamatampoan undoloan kasanggangan sia kamadoan penaa undoloan katobangan.

19

Mandu melo, ke napopengkadionganni tau tu penaanna sisola to bongko, na iatu untaa pangrampa sola to matampo.

20

Minda-minda umpalan penaai tu kada iato, la unnappa’ kameloan, ondongpi maupa’ ia tu to umposande’ PUANG.

21

Iatu to kinaa disangai to unnampui tangnga’ kinaa, sia kada mammi’ umpamatoto’ bisara.

22

Iatu tangnga’ kinaa napokalimbuang katuoan to unnampui, apa iatu tobaga umpoukungan kabaganna.

23

Iatu penaanna to kinaa umpopemmanarang pudukna, sia umpamatoto’ bisara sun dipudukna.

24

Iatu kada masokan susito tallo’ enoan, napomatanning penaa sia napopedampi buku.

25

Den tu lalan malolo nasanga tau, apa katampakanna mebaa lako kamatean.

26

Iatu katangdiaranna to mengkarang ussolanni mengkarang, belanna sadangna umparukui.

27

Iatu to bulituk umbo’bok patuang kakadakean, sia dio pudukna susi bang to api ma’durru’.

28

Iatu to kelok penaanna umpabu’tu bang kasipakkan, sia iatu to ma’kada boko’ umpasisarak to massangmane.

29

Iatu to sa’ga’ unnaran padanna rupa tau, sia ussolanni lako lalan tang melo.

30

Minda-minda umpamamma’ matanna morai ma’tangnga’ kelok, sia minda-minda unnammang arena, umpogau’mo kakadakean.

31

Iatu uban iamo misa’ makota mala’bi’, tu dikabu’tui dio lu lalan kamaloloan.

32

Iatu to kalando pesuka’ ussau’ misa’ to lalong, sia minda-minda untaloi penaanna ussau’ to untalo misa’ kota.

33

Iatu pa’ loterei dirogan-rogan diong bantanan, apa iatu ra’ta’na simisa’-misa’ lu dio mai PUANG.

alkitab.me