Amsal 22

Iatu sanga melo losong ia na ia tu kasugiran kapua sia kamaturu-turuan mandu melo na iatu salaka sia bulaan.

Iatuto sugi’ sia tobongko pada-padai sitiro; iatu Totumampana sola nasangi, iamotu PUANG.

Iatu to manarang, ke natiroi tu kamandasan, male umpentilindungan kalena, apa iatu to tang unnampui tangnga’ melo umpatarru’ bang pa’inaanna anna ruai kamandasan.

Iatu napobua kaumpamadiongan penaa, iamotu kamatakuran lako PUANG, iamo kasugiran, kadipangkeran sia katuoan marendeng.

Iatu duri sia poya dio lu lalanna to leko’ penaanna, minda-minda la ungkarimmanni kalena, untoyangan kalena inde to dio mai.

Ada’i tu pia muane situru’ tu sipatunna la napogau’, moi sae lako matuanna, manassa tae’ nala sepang dio mai.

Iatu to sugi’ umparenta to bongko, sia iatu to kaindanan la napotosandang to umpaindanni.

Minda-minda unnambo’ kakelokan, iamo la umpebuai kamandasan, sia iatu tekken kasengkeanna la pa’de bang.

Iatu to masokan pentirona, la dipamasakke, belanna umpa’kamasean kandena lako to kalala’.

Ula’i sun tu to pabe’se, anna pa’de tu kasigagan, anna radan tu kasisalan sia kasisayuan.

Minda-minda ungkabudai ma’penaa masero sia minda-minda ma’puduk masokan, naposangmane datu:

Iatu matanNa PUANG ungkaritutui kapaissanan, apa iatu kadanna to tang maruru’ tang Napopembua.

Ma’kada tu to tukkunan nakua: Den misa’ singa dio to’ batatta, napateina’ minii dio lu tana lapang!

Iatu pudukna bainena tau susi misa’ kalo’tok mandalan; minda-minda tu Nasengkei PUANG, manassa la tobang rokko.

Iake nala’ka’mi kabagan tu penaanna pia muane, manassa pebamba peada’pi la unnalai.

Minda-minda umpandasa tobongko, umpamaupa’ tobongko; naminda-minda umben apa tosugi’, umpakalala’ tosugi’.

Patananni tu talingammu sia perangii tu kadanna to kinaa, sia papatui penaammu tu kapaissanangku.

Belanna melo, ke munanna inaai, sia iake sakka’i mintu’ dio randan pudukmu.

Dikua anna iatu rannummu sande’ lako PUANG, iamoto angku ada’iko allo iate, iko bangsiamo.

Tang mangkamorokoka kusurasan, tu ba’tu pira-pira kada oro’na pa’pangada’ sola pa’pakilala sia kapaissanan,

ammu dipaissanni tu katongananna kada manappa’ ammu ma’din umpebalii kada manappa’ lako tu to ussuako?

Da murampai tu apanna to bongko, belanna kalala’mo, sia da mupakario-rioi tu to makasi-asi lan babangan.

Belanna PUANG la umpebalii tu kara-karana, sia la urrampai tu sunga’na tu to urrampa apanna tau iato mai.

Da musisangmane to sengkean sia da musikalute to arasan,

kumua da mupopa’ biasai tu umpeolai kedona, sia da mutananni poya tu kalemu.

Da musangbilangan tu to umpessala’pan limanna siallu’ sia unnindo’i indanna to senga’.

Tae’ manii apa dio kalemu mupamayaran, ma’apaoi nala iatu kamammaran munii mamma’ naala tau?

Da mupalelei tu katonan dolo, tu napantok nene’ to dolomu.

Iammu tiroi tu misa’ tau malute lan pengkaranganna, manassa la diangka’ untoe pengkaranganna datu, tae’ nala umpentoean to tang mala’bi’.