Amsal 7

E anakku, karitutui tu mintu’ kadangku sia toe manda’i tu mintu’ pepasanku.

Karitutui tu mintu’ pepasanku, anna melo katuoammu, sia karitutui tu pangadarangku, susi lise’ matammu.

Pemporianni lako rakka’mu, sia sura’i dio papan penaammu.

Pokadai lako kakinaan kumua: Ikomo anak darangku, sia iatu tangnga’ kinaa sangai to matappa’-(mu),

anna ia ungkaritutuiko dio mai bainena to senga’, sia iatu to tang ditandai, tu ma’kada mammi’ bang.

Belanna den pissan kutiroi dao mai pentiroan banuangku, dao mai pentiroan ditaralii,

sia kutiro dio lu mintu’ to tang unnissan ma’tangnga’ melo, anna ta’pai matangku dio lu mintu’ to mangura tu misa’ pia muane tang mandalan tangnga’na,

lumingkami dao batatta sikandappi’ ma’tetukna, tu nanii biasa bendan, sia male ma’palulako banuanna,

iatonna kasisalan tau bongi, iamo tonna makaroenmo, tonna malillinmo sia randuk mapittukmo.

Ta’kala nasitammumo tu misa’ baine susito, tu ma’pakean pa’gau’ sala sia manarang ma’pakena.

Kataa-taa bang sia tang ma’rundunan, sia tang ma’ripi tu lette’na lan banuanna.

Sattu’-sattu’ dio lu batatta, sattu’-sattu’ dio lu tana lapang sia mangodo’ dio lu mintu’ kasitammuan lalan.

Nala’ka’imi tu to mangura iato sia naudung; sia ma’lindo batu ma’kada lako nakua:

Sipato’na’ umbaa pemala’ kasalamaran, angku sundunni tu pangallonangku te allo iate.

Iamoto angku sun la umpessitammuiko, sia undaka’ko angku appa’ko.

Iatu patindoangku kusamboimo parramba’, pesambo paruki’ lenang Mesir.

Iatu inan mamma’ku kupi’pikkimo muru, ahalin sia kayu matappa’.

Maiko tapaliu kamoraianta sae lako melambi’na sia sipamo’le’-mo’le’.

Belanna iatu muaneku tae’ dio banua, malemo lako kalingkan mambela.

Nabaa tu poro’-poro’ doi’, na iapi, ke la melolinni bulan, namane sule.

Nanaran tete dio kamaluteanna ma’kada, sia nasede tete dio kada mammi’na.

Tae’ nalambi’i tangnga’na naturu’mi tu baine iato, butung to sapi dibaa lako pantunuan, sia susi misa’ to baga dipungo,

sae lako natarru’ tinaran tu atena; sia susi manuk-manuk madoi’ male lako ba’tikan, natae’ natandai kumua iatu apa iato la umpatei.

Iamoto, e anakku, perangiina’ sia palan penaai tu kada sun dio pudukku.

Da nasepang tu penaammu lako lalanna, da mulempang unnola lalanna.

Belanna budamo tau mate nabambangan, sia budamo bilanganna tau napatei.

Iatu banuanna butung to lalan lako banuanna tomate, tu solo’ rokko bilik-bilik kamatean.