:
Siumpu’na pebali ma’penduanna Ayub lako Elifas, iamotu moi misa’ apa tae’mo na rannuan diona katuoanna 1 Iatu sunga’ku sanggangmo sia iatu allo katuoangku ka’tumo, ia mannamo torro tu panglamunan kupotaa.
2 Tonganna kaditellean mannamo tu taaku; iatu matangku unta’pai to ussigaganna’.
3 Puang umpamanassa Kalena unnindo’ina’ dio oloMi; mindara tu to senga’ la ussisala’panna’?
4 Belanna Puang untampunni tu paissan penaanna; iamoto natae’ Mieloranni patalo tu tau iato.
5 Minda-minda umpasala sangmanena undaka’ saro bu’tu kadake, la malayu bang matanna tu anakna.
6 Napoparumbasanna’ tau dio lu bangsa, sia akumo to natittudui tau tu lindoku.
7 Maru’gunmo tu matangku napobua’ karossoan, sia mintu’ pa’kaleangku susi bang to bayo-bayo.
8 Iamoto tu napotiramban to bulo lollong, sia iatu to bulituk naposaki inaa to tang kasalan.
9 Moi nasusito iatu to malambu’ umpatontong lalanna, sia minda-minda tu masero limanna la kerangan tu kamatotoranna.
10 Moi susito tontong bangkomi sae-sae! apa tae’ kukabu’tui tu to kinaammi.
11 Iatu alloku lendu’mo, sia pa’tangngarangku tang dipadadimo, sola patiro penaangku.
12 Iatu tau iato mai morai umpopendadi masiangi tu bongi; iatu arrang nasanga mandu mandappi’ na kamalillinan.
13 Iake kukampai tu lino tomate susito banuangku, sia kuballa’ tu inan mamma’ku lan kapittukan,
14 angku ma’kada lako panglamunan, kukua: Kamu tu ambe’ku, sia lako ulli’ kukua: Kamu tu indo’ku sia anak darangku,
15 iake susito umbara nanii tu pa’rannuanangku? Manassa, mindara ma’din untiroi tu pa’rannuanangku.
16 Iatu iannato la male rokko to’ mandalanna lino tomate, ke pada malekan sola rokko to’ litak.