Ayub 37

Siumpu’na kada ma’penna’pa’na Elihu, iamotu kamala’biranNa Puang Matua tu napapayan angge maritik 1

Tonganna, iamorato tu napoma’rundede penaangku, sia lumo’dok diong mai to’ inanna.

2

Perangii, perangii tu gumaluntu’na gamaranNa, iamotu guntu’ tassu’ lan mai sadangNa.

3

Narampanan tu iannato diong nasambo langi’ sia kila’ mellepa’na lako randan langi’.

4

Gumalugu tu gamaranNa dio boko’Na, Napagumaluntu’ tu gamara kamala’biranNa, sia tae’ Napadapai, ke unnonimi tu gamaranNa.

5

Napagumaluntu’ kalle-kallean Puang Matua tu gamaranNa; Napogau’ tu penggauran tarompo’, sia tang talambi’;

6

belanna ma’kada lako ambun makko Nakua: Tobangko rokko lino, sia lako angin bara’ sia uran kamban Nakua: bara’komi!

7

Naca’ tu limanna mintu’ tolino, kumua anna mintu’ tolino, tu panampaNa Puang, untandai tu iannato.

8

Iatu olo’-olo’ male tama pentiongananna sia umbambangan kalena lan lo’ko’na.

9

Iatu angin bara’ tassu’ lan mai pangrampunanna, sia kamadinginan lan mai pa’palumpunanna.

10

Diona penaanNa Puang Matua Napadadi uai makko, iatu marantena uai susito pa’kombong dipati’no’.

11

Napatamai duka uai Puang tu salebu’, namagasa, Napatitale’ tu salebu’Na, nanii palepa’,

12

anna mellepa’ male tiku lao unturu’ parentaNa, la umpalanda’i tu mintu’ apa Napa’pesuan dao lipu daenan;

13

napoukungan padangNa, sia la Napakitan duka kamasokananNa, anNa papatui patunna.

14

E Ayub, tananni talinga tu iannate, bendanmokomi, ammi palan penaai tu tanda kalle-kalleanNa Puang Matua.

15

Mitandairaka, umba Nakua tu Puang Matua umpasanni, sia umba Nakua umpaparrangi tu arrang salebu’Na?

16

Mitandairaka sidi’ umba nakua tikembongna gaun, tu panggaraga memangnganna To sundun kapais-sananNa,

17

kamu tu to nananang allo pakeammi, ke rammanni tu kuli’na padang napobua’ kamalassuan dio mai rampe lo’nalu?

18

Ma’dinrokomika susi Puang umpalumbangi tu mai gaun, anna dadi langi’ maka’da’ susito misa’ sammin dipati’no’?

19

Pokadangkanni apara tu la kipokada lako Puang, belanna tae’ kima’din ussa’bu’ misa’ apa, diona kamalillinanta.

20

La dipokadanoraka Puang, ke la ma’kadana’? Dennoraka misa’ tau ma’kada kumua la morai disabu’i’?

21

Den natang ditiro tu arrang, napamalillin gaun, nadenno anna sumarruk tu angin lendu’ umpamasero langi’.

22

Daa mai rampe daanna lu nanii bu’tu tu arrang bulaan; iatu Puang Matua naputu’ kamala’biran dikabangnga’.

23

Iatu Puang umpoissan angge maritik tu tae’ tatandai, kapua kamatotoranNa sia kamalamburanNa; tu liu kamaloloanNa, tang umpakelok malolona.

24

Iamoto Nakataku’i ma’rupa tau tu Puang, apa iatu to tang ma’perangi moi misa’ tae’ Natiroi Puang.

alkitab.me