Ayub 6

Apa mebali tu Ayub lako nakua:

A’a, kenna ditimbang melo tu karossoan penaangku, sia kamapa’dirangku dipatorro sola lan timbangan!

Manassa iatu magasanna losong na iatu bungin diong randan tasik; iamoto na iatu kadangku tang ma’rundunan bangmo.

Belanna iatu anak pananna To umpoissan angga maritik untossokmo’, sia namimmi’ penaangku tu ipona; iatu mintu’ mepatirambanna dio mai Puang Matua ma’pampangammo ullaoina’.

Mangoa’raka tu keledai lampung, ke denni riu malunanna, ba’tu unnorronraka tu sapi, ke denni kandena?

Ma’dinraka nakande tau tu apa tang disiai, ba’tu mammi’raka tu mabusanna tallo’?

Manokana’ untoei tu iannato, susi bang to kande kukagi’gi’.

A’a, dennoupa’ nadipalanda’ siamo tu pengkamoyaku sia Napadadi Puang Matua tu apa kurannuan,

dennoupa’ naalai penaanNa Puang Matua ussanggangna’, anNa e’te’i tu limanNa ungka’tu sunga’ku!

Ke susito, iamo kupomatana, ondongpi kupoparannu sia kupolo’dok-lo’dok, lan tu kamasussan, tae’ bang Napasoro’ Puang, belanna tae’ kupeonganni lenni tu kadanNa To masero.

Apara tu kamatotorangku angku ma’dinpa ma’peagi sia apara kuanga’, angku moraipa la umpamalambe’ sunga’?

Susiraka batu tu kamatotorangku sia tambagaraka tu kaleku?

Tang tae’ raka pissan duka tu kaditunduiangku sia tang sumpuraka tu lalan kadirampanangku?

Minda-minda umpadapa kamamasean dio mai sangmanena, iamo tang umpalan penaa ungkasiri’ To umpoissan angga maritik.

Iatu mintu’ siulu’ku tang manappa’ susito salu’-salu’, susito uai saba’ ullempanni randanan;

tu malutu napobua’ uai makko, na iatu ambun makko lollo’mo lan;

ke attunnai mere, pa’de pissan tu uainna; ke pealloanni, marangke tu salinna.

Ma’lekko-lekko tu mai naolanna, lu tama padang pangallaran, anna tae’mo na ditiro.

Tu tolumio’na Tema umpalelei mata, iatu sibaanna tu mai to pallaona Syeba, urrannuanni tu iannato.

Tang dadi tu apa narannuan tau iato, napakenamo apa narannuan, tonna rampomo lako.

Susi dukamokomito lako kaleku; mimane untiroi tu apa mepatiramban, ammi mataku’.

Denraka kuma’kada kumua: Benna’ misa’ apa? Ba’tu kukuaraka: Tunduina’ sia benna’ tu apammi angku pa’papperanni.

Ba’tu kukuaraka: Rampananna’ dio mai limanna to ma’pandasa? Sia kukuaraka: La’bakna’ dio mai limanna to ma’pakario-rio?

Ada’ina’, angku kappa; pokadanna’, umba kunii pusa.

Lendu’ matoto’na tu kada tongan! Apa apara battuananna tu peta’tanmi?

Denraka lan penaammi pasayu kada bang? Sia misanga bangraka angin tu apa nasa’bu’ to ka’tu rannunna?

Moi anna pia biung la mipa’lotereian duka, sia iatu sangmanemi la mipo-balukan.

Apa totemo, sulepokomi mai, dio pentiromi tae’ angku la umpokadangkomi tang tongan.

Tangnga’ meloi, da naden katangmaloloan; ondongpi la mintangnga’ tongan, iatu katonganangku tang tilento.

Denraka kakelokanna tongka’ dililaku? Tang ma’dinraka tu pa’pesa’dingku umpasisengaranni tu kamandasan?