Bilangan 11

Den pissan ma’parapo’mi tu to buda dio pa’peranginNa PUANG diona kamandasanna. Iatonna rangii PUANG, re’dekmi tu ara’Na, nadukku tu api Naparampo PUANG dio lu tau iato mai sia umpamampu’ biring to’ tenda.

Sumarromi tu to buda lako Musa, namassambayang tu Musa lako PUANG, napa’de tu api.

Nasangaimi Tabera tu inan iato, belanna iatu apinNa PUANG dukku dio lu tau iato mai.

Iatu to merrau tu dio lu tau iato mai narampoi kabarakan; naparanduk dukaomi tu to Israel sumarro sia ma’kada nakua: Mindara la umbenki’ duku’ anta kandei?

Takilalai tu mintu’ bale tang dialli, tu takande dio Mesir sia mintu’ katimun, lau, kanda, lassuna rarang sia lassuna pute.

Apa totemo madongkongmoki’, moi misa’ apa tae’ bang tatiro, sa’bari te manna tatiro.

Iatu manna susi lise’ katumba’ sia ditiro susito lite busarungngu’.

Iatu tau lu lako lu dio mai la urrurukki tu manna, anna rissoi lan pangrissoan, ba’tu nalambuk lan issong sia nanasu lan kurin ba’tu nagaragai pa’ranggina. Iatu kandeanna susito deppa digoreng minna’.

Ianna bongi, ke ta’paoi damo’ dio to’ tenda, saeomi tu manna dao mai.

Iatonna rangimi Musa tu to buda pantan tumangi’ dio pa’rapuanna, sia pantan dio to’ ba’ba tendana, ma’lulu-lulu tonganmi tu kasengkeanNa PUANG, anna kadake dio pentirona Musa.

Ma’kadami tu Musa lako PUANG Nakua: Ma’apai Mipamasussai te taumMi sia ma’apai natae’ kuappa’ kamaturu-turuan dio pentiroMi, amMi papassannina’ te tanggunganna mintu’ bangsa iate?

Akuraka untambukki te bangsa iate, ba’tu akuraka undadianni, amMi ma’kadara lako kaleku kumua: Kayunni diong riammu, susi misa’ to mantaranak ungkayun pia ma’susu, sia baai lako tondok tu Miallu’ umpalao sumpa lako nene’ to dolona?

Umba la kunii unnala duku’ la kubenni te mintu’ bangsa iate? Belanna sumarro tu tau iato moi lako kaleku nakua: Benkan duku’ la kikande.

Iate aku misa-misa tae’ kubelai untanggungi te mintu’ bangsa iate. Manassa lendu’ tongan ia magasanna lako kaleku.

Iake Mipatanggungina’ susito, la’biran Mipateina’, ke unnappa’na’ kamaturu-turuan dio pentiroMi, anna da kutiroi tu kamandasangku.

Ma’kadami tu PUANG lako Musa, Nakua: Rampunni lako Kaleku tu pekaamberan to Israel pitungpulo, tu mutandai kumua iamo pekaamberan sia pangulunna to buda; solanni lako Tenda Kasitammuan, ammu bendan sola tu tau iato mai.

La songlo’Na’ sia la sipa’kadaki’ inde to dio, angKu alai pira tu Penaa ta’pa dio kalemu, angKu patorroi dao tau iato mai, kumua ammi tanggungi sola tu tanggunganna bangsa iate, da naiko manna misa-misa untanggungi.

Apa la mupokada lako bangsa iate kumua: Pamaseroi tu kalemi sae lako masiang, ammi kandei tu duku’, belanna ma’paropo’komi dio pa’peranginNa PUANG, mikua: Mindara la umpakandekan duku’ angki kandei? Manassa melo kami tu katuoangki dio Mesir. – Iamoto la Nabenkomi PUANG tu duku’, ammi kandei.

Tangia manna sangallo ba’tu duang allo la minii ungkandei, tangia manna limang allo, ba’tu sangpulo allona, ba’tu duangpulo allona,

sangadinna la sipeupu’ sangbulan, naurungan tassu’ lan mai illongmi, ammi bossa ungkandei. Belanna mipamatuna tu PUANG, tu misisolan sia sumarrokomi dio oloNa, mikua: Ma’apai angki tassu’ lan mai Mesir?

Ma’kadami tu Musa nakua: Annanratu’ sa’bunna tu muane lumingka dio mai te bangsa iate, tu kusisolan, amMi ma’kada kumua: La Kuben duku’ tu tau iato mai, anna kandei sipeupu’ sangbulan!

La padaraka budanna to tu domba sia sapi la ditunuanni, anna silasa nakande? Ba’tu mintu’raka bale lan mai tasik dialanni, anna silasa nakande?

Apa ma’kada tu PUANG lako Musa, Nakua: La kondi’raka limanNa PUANG? Totemo la mitiro, ba’tu landa’raka tu kadangKu lako kalemu, ba’tu tae’.

Tassu’mi tu Musa, anna parampoi tu mintu’ kadanNa PUANG lako to buda, anna rampunni tu muane pitungpulo dio mai pekaamberanna bangsa iato, sia nasua bendan dio Tenda Kasitammuan tiku lao.

Songlo’mi tu PUANG lan gaun, anNa ma’kada lako Musa sia Naala PUANG tu Penaa pira ta’pa dio Musa, anNa patorroi dao tu tau pitungpulo iamotu pekaamberan. IatonNa torromo dao tu Penaa, ma’nubua’mi tu tau iato, apa undinna to tae’mo.

Apa da’dua tau torro dio to’ tenda, misa’ disanga Eldad na misa’ disanga Medad. IatonNa ta’paimi Penaa – belanna naala bilangan dio mai to disura’ sanganna, apa tae’ namale lako Tenda Kasitammuan – ma’nubua’mi dio to’ tenda.

Ma’dondomi tu misa’ to mangura sae umpokadanni Musa nakua: Iatu Eldad sola Medad ma’nubua’ dio to’ tenda.

Mebalimi tu Yosua, anakna Nun, iamotu to mase’ponna Musa tempon dio mai manguranna, anna ma’kada nakua: O puangku Musa, gagai tu tau iato.

Apa ma’kada tu Musa lako nakua: Mubirisan maro’ra umpoissan apangku? Dennoupa’ na iatu mintu’ taunNa PUANG mendadi nabi, belanna PUANG ungkamasei Penaanna ta’pa dao lu tau iato!

Mangkato sulemi tu Musa lako to’ tenda, nasolan pekaamberanna to Israel.

Attu iato saemi tu misa’ angin Naparampo PUANG, tu ussarrin puyo diong mai tasik, napatisambo’i dao lu to’ tenda, anna lan kalingkan sangallo nanii tiku lao tu to’ tenda dio lu mintu’ biringna, agi-agi duang siku kambanna diong mai padang.

Ke’de’mi tu to buda anna rampunni tu puyo sipeupu’ sangallo sangbongi sia sipeupu’pa allo sidampi’na to; iatu to tang pira dio urrampun sangpulo ome’: sia malona’ tongan nanii unnamparanni tu puyo dio salian tiku lao to’ tenda.

Iatu duku’ iato dio bangsia alla’ isinna tau iato mai, tonna tae’pa nakemai, re’dekmi tu ara’Na PUANG lako bangsa iato, anNa parampoi kamandasan kapua.

Nasangaimi tau tu inan iato Kibrot-Taawa, belanna inde to dio dinii ullamunni tu mintu’ to barak.

Ke’de’mi tu bangsa iato dio mai Kibrot-Taawa lako Hazerot, anna torro dio Hazerot.