Bilangan 13

Ma’kadami tu PUANG lako Musa Nakua:

Suai tu tau la lao umparessa buni tondok Kanaan, tu la Kukamasean to Israel; iamotu simisa’ tau la musua dio mai simisa’ suku nene’ to dolona; mintu’ tau iato iamo arungna.

Attu iato nasuami Musa tu tau iato dio mai padang pangallaran Paran, unturu’ parentanNa PUANG; mintu’ tau iato iamo pangulunna to Israel.

Inde sia tu sanganna: Dio mai suku Ruben, iamotu Syamua, anakna Zakur.

Dio mai suku Simeon, iamotu Safat, anakna Hori.

Dio mai suku Yehuda, iamotu Kaleb, anakna Yefune.

Dio mai suku Isakhar, iamotu Yigal, anakna Yusuf.

Dio mai suku Efraim, iamotu Hosea, anakna Nun.

Dio mai suku Benyamin, iamotu Palti, anakna Rafu.

Dio mai suku Zebulon, iamotu Gadiel, anakna Sodi.

Dio mai suku Yusuf, tu dio mai suku Manasye, iamotu Gadi, anakna Susi.

Dio mai suku Dan, iamotu Amiel, anakna Gemali.

Dio mai suku Asyer, iamotu Setur, anakna Mikhael.

Dio mai suku Naftali, iamotu Nahbi, anakna Wofsi.

Dio mai suku Gad, iamotu Guel, anakna Makhi.

Iamote tu sanganna mintu’ tau, tu nasua Musa male umparessa buni tondok; sia iatu Musa ussangai Yosua tu Hosea, anakna Nun.

Nasuami Musa tu tau iato mai male umparessa buni tondok Kanaan, sia ma’kada lako nakua: Ke’de’komi tama indete Padang lo’na lu, mimale langngan tondok ma’buntu,

sia la mitiro melo, umba nakua tu tondok, sia iatu to ma’tondok lan, ba’tu matoto’i ba’tu malamma’i, ba’tu sidi’ri ba’tu budai bilanganna;

sia ba’tumba nakua tu tondok napa’tondokki, meloraka ba’tu kadakeraka, sia matumbari tu mai kota, nanii torro, kampung tang dibenteng tembo’raka ba’tu kota ditambakukuraka;

sia matumbari tu padangna, malomporaka ba’tu madokoraka, denraka to’ kayu dio, ba’tu tae’? La baranikomi unnala bua kayu sia bura padang mibaai dio mai. Attu iato sirupang bunga’ peanggorosan.

Ke’de’mi tu tau iato mai lao umparessa bunii randuk dio mai padang pangallaran Zin sae lako Rehob, tu nanii randuk lalan diola lako Hamat.

Iatonna ke’de’mo tu tau unnola Padang lo’na lu, rampomi lako Hebron; inde to dio nanii ma’tondok tu bati’na Enak, iamotu Ahiman, Sesai na Talmai. Iatu Hebron pitung taunmo dolona dibangun namane Soan dio Mesir.

Iatonna rampomo tu tau iato mai lako lombok Eskol, nara’ta’mi tu sangbuli bua anggoro’, anna da’dua tau umbullei, sia ba’tu pira-pira bua dalima sola bua ara.

Nasangaimi tu inan iato lombok Eskol, belanna dio tu bua anggoro’ sangbuli, tu mangka nara’ta’ to Israel dio.

Iatonna upu’mo patangpulo allona sulemi tu to umparessa buni tondok.

Ke’de’mi tu tau male anna pellambi’i tu Musa sola Harun sia mintu’ kasirampunanna to Israel dio Kadesh, lan padang pangallaran Paran, anna parampoi tu kareba lako mintu’ kasirampunan sia napa’petiroan tu bua kayu nabaa dio mai tondok iato.

Anna uleleanni lako sia ma’kada nakua: Rampomokan tama tondok, tu minii ussuakan male; manassa tonganna iatu tondok iato nanii sebo pangandu’ sia tani’ enoan, sia iamote tu bua kayunna.

Apa iatu bangsa umpa’tondokki tondok iato matoto’ sia iatu mai kotana ditambakuku sia mandu kapua, sia kitiro duka dio tu mai bati’na Enak.

Iatu Padang lo’na lu nanii ma’tondok to Amalek, iatu padang ma’buntunna nanii ma’tondok to Het, to Yebus sia to Amori, nadio ma’biring tasikna sia dio randan salu Yordan nanii to Kanaan.

Attu iato napabatta’mi Kaleb tu bangsa iato dio olona Musa sia ma’kada nakua: Melo ke ke’de’ki’ lako, da tamataku’ sia la taala tapomana’i, belanna manassa la tatalo.

Apa iatu muane nasisolan ma’kada nakua: Tae’ takullei lako tu bangsa iato, belanna mandu matoto’ ia na kita.

Napalele kadake dukami tu kareba dio lu to Israel diona tu tondok mangka naparessa sia ma’kada nakua: Iatu tondok mangka kiola lendu’ angki paressai, tondok iato unnampello’ to torro lan, sia iatu mintu’ to kitiro dio tu mandu malangka’.

Sia kitiro duka dio tu to kalando kapua, iamotu bati’na Enak, tu sangbilangan to kalando kapua iato; na iatu kami susi bangkan to batik dio pentiroki sia dio pentirona tau iato mai.