Bilangan 2

Ma’kadami tu PUANG lako Musa sola Harun Nakua:

Iatu mintu’ to Israel la pantan umpabendan tendana dio to’ banderana situru’ tu mai bate-bate rapunna; la ma’tenda tu tau iato tiku lao sikambela tu Tenda Kasitammuan.

Dio rampe matallona, tu dio kabu’tuan allo, la nanii bendan banderana dio to’ tendana to Yehuda, situru’ tuntunanna. Iatu arung bati’na Yehuda disanga Nahason, anakna Aminadab.

Iatu tuntunan surodadunna, tu mangka diia’, den pitungpulo nna’pa’ sa’bu nnannanratu’na.

Dio sa’dena la nanii ma’tenda tu suku Isakhar. Iatu arung bati’na Isakhar disanga Netaneel, anakna Zuar.

Iatu tuntunan surodadunna, tu mangka diia’, den limangpulo nna’pa sa’bu nna’pa’ratu’.

Sia iatu suku Zebulon: iamotu arung bati’na Zebulon disanga Eliab, anakna Helon.

Iatu tuntunan surodadunna, tu mangka diia’, den limangpulo mpitu sa’bu nna’pa’ratu’.

Iatu mintu’ mangkanna diia’ dio to’ tendana to Yehuda den saratu’ karuapulona nnannan sa’bu nna’pa’ratu’ situru’ tuntunanna. Tau iato mai la ke’de’ dolo.

Iatu bandera dio to’ tendana Ruben la dio rampe lo’na lu situru’ tuntunanna. Iatu arung bati’na Ruben disanga Elizur, anakna Syedeur.

Sia iatu tuntunan surodadunna, tu mangka diia’, den patangpulo nnannan sa’bu llimaratu’.

Dio sa’dena la nanii ma’tenda tu suku Simeon. Iatu arung bati’na Simeon disanga Selumiel, anakna Zurisyadai.

Sia iatu tuntunan surodadunna, tu mangka diia’, den limangpulo ngkasera sa’bu ntalluratu’.

Sia iatu suku Gad; iamotu arung bati’na Gad disanga Elyasaf, anakna Rehuel.

Sia iatu tuntunan surodadunna, tu mangka diia’, den patangpulo llima sa’bu nnannanratu’ llimangpulo.

Iatu mintu’ mangkanna diia’ dio to’ tendana to Ruben, den saratu’ limangpulo mmisa sa’bu nna’pa’ratu’ limangpulo situru’ tuntunanna. Tau iato mai la ma’penduan ke’de’.

Iatu Tenda Kasitammuan, tu natikui to’ tendana to Lewi, la dipake’de’ male dio tangngana to’ tenda iato; susitu to umpabendan tendana, la susi dukato ke’de’ male, pantan dio to’ inanna unturu’ banderana.

Iatu bandera dio to’ tendana Efraim situru’ tuntunanna la dio rampe matampu’. Iatu arung bati’na Efraim disanga Elisama; anakna Amihud.

Sia iatu tuntunan surodadunna, tu mangka diia’, den patangpulo sa’bu llimaratu’.

Dio sa’dena nanii tu suku Manasye. Iatu arung bati’na Manasye disanga Gamaliel, anakna Pedazur.

Sia iatu tuntunan surodadunna, tu mangka diia’, den tallungpulo nduang sa’bu nduaratu’.

Sia iatu suku Benyamin; iatu arung bati’na Benyamin disanga Abidan, anakna Gideoni.

Sia iatu tuntunan surodadunna, tu mangka diia’ den tallungpulo llima sa’bu nna’pa’ratu’.

Iatu mintu’ mangkanna diia’ dio to’ tendana to Efraim, den saratu’ karua sa’bu ssaratu’ situru’ tuntunanna. Tau iato mai la ma’pentallun ke’de’ male.

Iatu bandera dio to’ tendana Dan la dio rampe daanna lu situru’ tuntunanna. Iatu arung bati’na Dan disanga Ahiezer, anakna Amisyadai.

Sia iatu tuntunan surodadunna, tu mangka diia’ den annanpulona ndua sa’bu mpituratu’.

Dio sa’dena nanii ma’tenda suku Asyer. Iatu arung bati’na Asyer disanga Pagiel, anakna Okhran.

Sia iatu tuntunan surodadunna, tu mangka diia’ den patangpulo mmisa sa’bu llimaratu’.

Sia iatu suku Naftali. Iatu arung bati’na Naftali disanga Ahira, anakna Enan.

Sia iatu tuntunan surodadunna, tu mangka diia’ den limangpulo ntallu sa’bu nna’pa’ratu’.

Iatu mintu’ mangkanna diia’ dio to’ tendana to Dan, den saratu’ llimangpulo mpitu sa’bu nnannanratu’. Tau iato mai la ma’katampakanna ke’de’ male situru’ banderana.

Iamote tu mintu’ to diia’ dio mai to Israel unturu’ rapunna; iatu mintu’ mangkanna diia’ dio to’ tenda situru’ tuntunanna, den annan ratu’ ntallu sa’bu limaratu’ limangpulo.

Apa iatu to Lewi tae’ nadipasiia’ to Israel, susitu mangka Napepasanan PUANG lako Musa.

Napogau’mi to Israel susito; susi tongan tu mangka Napepasanan PUANG lako Musa, naturu’mo, iamotu umpabendan tendana unturu’ banderana, sia pantan ke’de’mo male situru’ pa’rapuanna, dio lu rapunna.