Bilangan 22

Attu iato ke’de’mi tu to Israel, anna ma’tenda dio padang Moab, sambalinna lu salu Yordan, sipatu Yerikho.

Iatonna tiromi Balak, anakna muane Zipor, tu mintu’ apa napogau’ to Israel lako to Amori,

tiramban tonganmi tu Moab diona bangsa iato, belanna buda tongan, sia mataku’ tu Moab napobua’ to Israel.

Ma’kadami tu Moab lako pekaamberanna Midian, nakua: Totemo iatu to buda iato la ungkande pu’pu’ mintu’ tondokta, susito misa’ sapi ungkande pu’pu’ riu dio padang. Iatonna attu iato iatu Balak, anakna Zipor, undatui Moab.

Nasuami tu sumbungan puduk lako Bileam, anakna Beor, lako Petor, tu dio biring salu, lu lako tondok sangbangsana la untambai nakua: Inde sia tu misa’ bangsa tassu’ dio mai Mesir manassa tongan ussitutu’i mintu’ tondok lao, anna ma’tenda ussitingoanna’.

Iamoto maimokomi, ammi tampakanna’ ropu te bangsa iate, belanna mandu matoto’ na aku; dennoupa’ angku taloi sia urrambai lan mai tondok iate. Belanna kuissan kumua: minda-minda tu mipassakke, masakke-sakke tu tau iato sia minda-minda mitampakki ropu, maropu tu tau iato.

Pakalan malemi tu pekaamberanna Moab sia Midian umbaa saro disaroan to pakita-kita; iatonna rampomo lako Bileam, naparampomi tu kadanna Balak lako.

Ma’kadami tu Bileam lako tau iato mai nakua: Ma’bongikomi indete bongi iate, angku pebaliikomi susitu la Napokadanna’ PUANG. Torromi tu arungna Moab sola Bileam.

Saemi tu Puang Matua lako Bileam Nama’kada, Nakua: Mindara te mai muane musolan?

Mebalimi tu Bileam lako Puang Matua, nakua: Balak, anakna Zipor, datu Moab, umparampo kada lako kaleku nakua:

Manassa den misa’ bangsa tassu’ lan mai Mesir ussitutu’imo mintu’ tondok lao; iamoto maimokomi, ammi tampakanna’ ropu; dennoupa’ angku bela siai urrarii sia la kurambai.

Ma’kadami tu Puang Matua lako Bileam, Nakua: Da’ mumale sola tau iato, da mutampakki ropu tu bangsa iato, belanna to dipamasakke tu tau iato.

Millikmi tu Bileam tonna melambi’, anna ma’kada lako arungna Balak, nakua: Sulemokomi lako tondokmi, belanna tae’ Napasiolai PUANG, ke maleki’ sola.

Malemi tu mintu’ arungna Moab, rampo lako Balak, nama’kada nakua: Iatu Bileam tae’ napasiolai, ke saekan sola.

Apa iatu Balak ussua pole’ arung, mandu buda sia mala’bi’ na iatu dolona.

Iatonna rampomo lako Bileam ma’kadami nakua: Susite tu kadanna Balak, anakna Zipor, nakua: Da’ mididampa sae umpellambi’ina’,

belanna la kusaroi la’da’komi; mintu’ apa tu mipokada, la kupogau’; maimokomi sia tampakanna’ ropu te bangsa iate.

Mebalimi tu Bileam sia ma’kada lako to mase’ponna Balak nakua: Moi nabenna’ Balak ponno banuanna tu salaka sia bulaan, tae’ duka kuma’din ullendai parentaNa PUANG, Kapenombangku, la umpogau’ misa’ apa bitti’ ba’tu misa’ apa kapua.

Iamoto torro dukakomi indete bongi iate, angku issanni, ba’tu apa la Napokada pole’ PUANG lako kaleku.

Rampomi tu Puang Matua lako Bileam to bongi iato, anNa ma’kada lako kalena, Nakua: Belanna saemo te mai muane untambaiko, millikmoko, ammu male sola, apa ia manna tu kada la Kupokadangko, tu la maturu’.

Millikmi tu Bileam tonna melambi’, nalapikki tu keledai birangna, anna male sola arungna Moab.

Apa iatu kasengkeanNa Puang Matua dukkumo, tonna male tu Bileam, na iatu Malaeka’Na PUANG bendanmo dio lalan la unneai; iatu Bileam messake dao keledai birangna, nada’dua taunna nasolan.

Iatonna tiromi keledai birang tu Malaeka’Na PUANG dio lalan sitangke pa’dang tinonok, sumepangmi dio mai lalan lako to’ pa’lak; nabambami Bileam tu keledai birang la napasule lako lalan naolai.

Mangkato bendanomi tu Malaeka’Na PUANG dio lalan mabo’bok dio alla’na pa’lak anggoro’, tu nanii tembo’ patomali.

Iatonna tiromi keledai birang tu Malaeka’Na PUANG, umpasi’pinmi kalena lako tembo’, anna tirimpi’ tu lette’na Bileam tama tembo’; nabamba pole’omi tu keledainna.

Dolo pole’omi tu Malaeka’Na PUANG anna bendan dio to’ lalan si’pi’, tu tae’mo inan nanii sumepang kanan ba’tu kairi.

Iatonna tiromi keledai birang tu Malaeka’Na PUANG, unno’pakmi diongna lu Bileam. Re’dekmi tu ara’na Bileam nabambai tekken tu keledai birang iato.

Nabungka’mi PUANG tu sadangna keledai birang iato, anna ma’kada lako Bileam nakua: Apamora tu kupogau’ lako kalemi ammi bambana’ totemo pentallun?

Ma’kadami tu Bileam lako keledai birang iato nakua: Belanna mupopaningoanna’; kengku toe pa’dang, manassa kupateiko.

Apa ma’kada tu keledai birang iato lako Bileam nakua: Tae’raka angku keledai birangmi, tu miposakean tempon tuomi sae lako allo iate? Denmoraka kuma’gau’ susito lako kalemi? Mebalimi Bileam nakua: Tae’.

Attu iato Napamillikki PUANG tu matanna Bileam; natiromi tu Malaeka’Na PUANG sitangke pa’dang tinonok bendan dio lalan, anna malinguntu’ lumbang sae rokko padang.

Ma’kadami tu Malaeka’Na PUANG lako, nakua: Ma’apai mubambai totemo tu keledai birangmu pentallun? Manassa tassu’Na’ la unneako, belanna iate lalan iate mebaa lako kasanggangan dio oloKu.

Iatonna tiroNa’ tu keledai birang, pentallun ussepangiNa’; ianna tae’ nasepangiNa’, manassako Kupatei, apa iatu keledai birang iato la Kupatuo.

Ma’kadami tu Bileam lako Malaeka’Na PUANG, nakua: Kasalammo’, belanna tae’ kutandai, kumua Kamu tu bendan dio lalan unneana’, na totemo, iake kadakei dio pentiroMi, melo ke sulemo’.

Apa ma’kada tu Malaeka’Na PUANG lako Bileam, Nakua: Maleko sola te muane iate, apa ia manna tu kada, la Kupokadangko, la mupokada. Malemi tu Bileam sola tu mai arungna Balak.

Iatonna rangimi Balak, kumua la saemo tu Bileam, malemi umpessitammui sae lako kotana Moab, lan lili’na Arnon, dio tampak passaparanna lili’na.

Ma’kadami tu Balak lako Bileam nakua: Tae’raka angku tonganni umpesuangkomi? Ma’apai natae’ misae lako kaleku? Misangaraka tae’ kubelai ussaroikomi?

Apa mebali tu Bileam lako Balak nakua: Manassa, saemo’ lako kalemi totemo. Ma’dinra’ka la umpokada misa’ kada? Iatu kada la Napatama Puang Matua pudukku, iamo la kupokada.

Malemi tu Bileam sola Balak, anna rampo lako Kiryat-Huzot.

Napemalaranmi Balak tu sapi sia domba, anna pa’peai tu duku’na lako Bileam sia iatu mai arung nasisolan dio.

Masiang pole’ to nasolammi Balak tu Bileam, nasuai kendek langngan inan madoanna Baal. Na inde to nanii untiro nasangi sae lako tampakna tu bangsa iato.