Bilangan 29

Lan bulan ma’pempitu, ke allo bunga’na bulan iato la mipogau’ tu misa’ kasirampunan masero sia da’ mitoe pengkarangan dakaran kande; allo iato la minii kumalasi-lasi.

Sia la miparandan tu pemala’ ditunu pu’pu’, la dipobau busarungngu’ lako PUANG, iamotu misa’ anak sapi laki, misa’ domba laki sia pitu domba sisangtaunmo, tu tae’ tattanna;

sia dipasisola kande dipemalaran, iamotu ta’pung manisak dipasigerok minna’ tallung taan sangpulona tu sapi laki, duang taan sangpulona tu domba laki,

sia sangtaa sangpulona, ke misa’oi tu pitu domba.

Sia misa’ bembe’ laki diposuru’ pengkalossoran, la umpadenangkomi kadiseroian kasalan.

Senga’ iatu pemala’ ditunu pu’pu’ ke bulanoi sia kande dipemalaran dipasisola sia pemala’ ditunu pu’pu’ kiallo-kiallo, dipasisola kande dipemalaran, sia dipasisola pemala’ pantedok situru’ atoranna, dipobau busarungngu’, iamotu misa’ pemala’ pantunu lako PUANG.

Iake allo ma’pessangpulo lan te bulan ma’pempitu la mipogau’ tu kasirampunan masero sia la umpamadiongkomi penaammi sia da mipogau’ misa’ pentoean.

Allo iato la mipennoloan lako PUANG tu misa’ pemala’ pantunu pu’pu’, la dipobau busarungngu’, iamotu misa’ anak sapi laki, misa’ domba laki sia pitu domba sisangtaunmo, tu tae’ tattanna;

sia dipasisola kande dipemalaran, iamotu ta’pung manisak dipasigerok minna’, tallung taan sangpulona tu sapi laki, duang taan sangpulona tu misa’ domba laki,

sia sangtaa sangpulona, ke misa’oi tu pitu domba.

Sia misa’ bembe’ laki diposuru’ pengkalossoran; senga’pi tu suru’ pengkalossoran tu umpaden kadiseroian kasalan sia pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

Sia iake allo ma’pessangpulo lima lan bulan ma’pempitu la mipogau’ tu kasirampunan masero sia da’ mitoe pengkarangan dakaran kande. Lan pitung allo minii umpakaraya allo kapua la umpakala’bi’ PUANG.

La mipennoloan tu pemala’ ditunu pu’pu’, tu pemala’ pantunu, la dipobau busarungngu’ lako PUANG, iamotu sangpulo tallu anak sapi laki, da’dua domba laki sia sangpulo a’pa’ domba sisangtaunmo tu tae’ tattanna.

Sia dipasisola kande dipemalaran, iamotu ta’pung manisak dipasigerok minna’, tallung taan sangpulona, ke misa’oi tu sangpulo tallu sapi laki, duang taan sangpulona ke misa’oi tu da’dua domba laki,

sia sangtaa sangpulona ke misa’oi tu sangpulo a’pa’ domba.

Sia misa’ bembe’ laki diposuru’ pengkalossoran, senga’pi ia tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iake allo ma’penduan sangpulo dua sapi laki mangura, da’dua domba laki sia sangpulo a’pa’ domba sisangtaunmo, tu tae’ tattanna,

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki la diposuru’ pengkalossoran, senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iake allo ma’pentallun sangpulo sapi laki, da’dua domba laki sia sangpulo a’pa’ domba, sisangtaunmo, tu tae’ tattanna;

sia dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iake allo ma’penna’pa’ sangpulo sapi laki sia da’dua domba laki sia sangpulo a’pa’ domba sisangtaunmo, tu tae’ tattanna,

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran; senga’pi ia tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iake allo ma’pellima kasera sapi laki sia da’dua domba laki sia sangpulo a’pa’ domba sisangtaunmo, tu tae’ tattanna,

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

Iake allo ma’pennannan karua tu sapi laki sia da’dua domba laki sia sangpulo a’pa’ domba sisangtaunmo, tu tae’ tattanna:

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

Iake allo ma’pempitu, pitu tu sapi laki sia da’dua domba laki sia sangpulo a’pa’ domba sisangtaunmo, tu tae’ tattanna;

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iake allo ma’pengkarua la mipogau’ tu misa’ kasirampunan umpakaraya allo kapua sia da’ mitoe pengkarangan dakaran kande.

Allo iato la mipennoloan tu pemala’ ditunu pu’pu’, iamotu pemala’ pantunu, dipobau busarungngu’ lako PUANG, iamotu misa’ sapi laki, misa’ domba laki sia pitu domba sisangtaunmo, tu tae’ tattanna;

dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

Sia misa’ bembe’ laki diposuru’ pengkalossoran, senga’pi tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

Iamote tu la miparandanan PUANG, ke allo kapuami dipopemala’ ditunu pu’pu’mi sia dipokande dipemalarammi sia dipopemala’ pantedokmi sia dipopemala’ kasalamarammi; senga’pi iatu pemala’ pangallonammi sia pemala’ tanning penaammi.

Napokadami Musa lako to Israel mintu’ tu apa mangka Napepasanan PUANG lako Musa.