Bilangan 32

Iatu padang sambalinna lu Yordan, dipamanassammo to Ruben sia to Gad 1

Iatu to Ruben buda tu patuoanna na iatu to Gad mandu pole’ buda, sia natiro tu padang nalili’ Yaezer sia dio Gilead, iamo padang melo nanii patuoan.

2

Saemi tu to Gad sia to Ruben, anna ma’kada lako Musa sia lako to minaa Eleazar sia lako pangulunna kasirampunan, kumua:

3

Iatu Atarot, Dibon, Yaezer, Nimra, Hesbon, Eleale, Sebam, Nebo na Beon,

4

iamotu padang Natalo PUANG dio tingayona kasirampunan to Israel, padang iato melo nanii patuoan, sia iate taummi buda tu patuoanna.

5

Ma’kada pole’omi tu tau nakua: Iake naalakan penaammi, eloranni te padang iate dikamasean taummi napomana’i; da misuakan ullambanni Yordan.

6

Apa ma’kada tu Musa lako to Gad sola tu Ruben, nakua: Sipaturaka tu mai siulu’mi la lao parari, anna kamu la torro indete?

7

Ma’apari mipamanokai tu penaanna to Israel la lamban lian lu lako padang tu Nakamaseanni PUANG?

8

Susi duka tu gau’na tu ambe’mi tongku suai dio mai Kadesh-Barnea la umparessai tu tondok.

9

Iatu tau iato mai la rokko lombok Eskol, anna tiroi tu tondok sia napamanoka tu penaanna to Israel, naurunganni noka male lako padang tu Nakamaseanni PUANG lako.

10

Re’dekmi tu kasengkeanNa PUANG tonna allo iato, anNa umpalao sumpa, Nakua:

11

Manassa tongan, iatu muane ke’de’ dio mai Mesir, randuk dio mai duangpulo taunna ba’tu la’bi tae’ na la untiro tondok, tu mangka Kuallu’ umpalao sumpa lako Abraham, Ishak na Yakub, belanna tae’ namaruru’ unturu’Na’.

12

Sangadinna Kaleb, anakna Yefune, to Kenas, na Yosua, anakna Nun, belanna tau iate maruru’ unturu’ PUANG.

13

Iamoto nadukku tu kasengkeanNa PUANG lako to Israel, Naurunganni umpasalamba salaoi dio padang pangallaran patangpulo taunna, sae lako puranna tu mintu’ osso’ umpogau’ kadake dio pentiroNa PUANG.

14

Tonganna ke’de’mokomi totemo ussonda ambe’mi, pada budanna tu muane kasalan, la umpasalangngan-langnganna kare’dekanNa PUANG lako to Israel.

15

Iake miboko’i tu Puang, manassa la Napatorropa masai lan padang pangallaran sia kamu tu la umparampoi kamandasan te mintu’ bangsa.

16

Apa saemi mengkareke’ nama’kada, nakua: Moraikanni umpabendan bontong domba la nanii patuoangki sia kota la nanii anakki,

17

apa nakami kalenamora la ma’pasakka’ angki madomi’ dio tingayona to Israel, sae lako kisolan tu tau iato lako to’ inanna. Lan attu iato iatu mai anakki la umpa’tondokki tu kota ditambakuku iato, kumua da nalaoi pa’tondokan.

18

Tae’ kila sule lako to’ banuangki, ke tae’pi napantan tu to Israel unnappa’ taa mana’na.

19

Belanna iatu kami tae’ kila unnappa’ taa mana’ sambalinna lu Yordan sia lili’ rampe lakona, ke iami kipotaa mana’ tu rampe matallona Yordan, tu dio kadellekan allo.

20

Ma’kadami tu Musa lako nakua: Iammi pogau’mi te, ke ma’pasakka’komi la parari dio oloNa PUANG,

21

sia mintu’komi tu ma’pasakka’mo dio oloNa PUANG, la ullamban Yordan sae lako Naula’ina Puang dio mai oloNa tu ualinNa,

22

naurungan iatu tondok ditalo dio oloNa PUANG, ammi mane sule, attu iato lessu’mo tu passanammi dio oloNa PUANG sia dio tingayona to Israel, sia iate tondok la mipoapamo dio oloNa PUANG.

23

Apa iake tae’i mipogau’i susito, manassa kasalangkomi lako PUANG, sia la miissan, kumua iatu kasalammi la sule langan botto ulummi.

24

Pabendanangkomi kota anakmi sia bontong patuoammi, sia pogau’i tu apa mangka mipokada.

25

Ma’kadami tu to Gad sia to Ruben lako Musa nakua: La napogau’mo taummi susitu napepasanan puangku.

26

Iatu anakki sia baineki, apangki sia mintu’ patuoangki la torro dio lan kotana Gilead.

27

Apa iatu taummi la lamban dio oloNa PUANG la lao parari, iamotu pantan sakka’mo la parari, susitu napokada puangku.

28

Attu iato napasanmi Musa diona tau iato lako to minaa Eleazar sia lako Yosua, anakna Nun, sia lako pangulunna rapu sukunna to Israel,

29

sia ma’kada tu Musa lako nakua: Iake solakomi to Gad sia to Ruben ullamban Yordan la parari dio oloNa PUANG, iamotu pantan to sakka’mo la parari, sia iake ditalomi tu tondok dio tingayomi, manassa la miben tau iato tu tondok Gilead napotondok.

30

Apa iake tae’i milamban sola tu to sakka’ parari, manassa tau iato la ma’tondok misisolan lan tondok Kanaan.

31

Mebalimi tu to Gad sia to Ruben nakua: Apa tu mangka Napokada PUANG lako taummi, manassa la kipogau’.

32

Kami kalena la sakka’ lamban lako tondok Kanaan dio oloNa PUANG, apa iatu taa mana’ki la sambalinna lu Yordan.

33

Attu iato napa’benganmi Musa lako to Gad sia to Ruben sia lako sangsesena suku Manasye, anakna Yusuf, tu parentana Sihon, datu to Amori, sia parentana Og, datu Basan, sia nataa tu tondok situru’ tu mintu’ kota lan mintu’ lili’na, iamotu mai kotana tondok tiku lao.

34

Iatu to Gad umbangun Dibon, Atarot, Aroër,

35

Atarot-Syofan, Yaezer, Yogbeha,

36

Bet-Nimra na Bet-Haran; sia kota ditambakuku sia bontong domba.

37

Sia iatu to Ruben umbangun Hesbon, Eleale na Kiryataim,

38

Nebo, Baal-Meon, Musabot-Syem na Sibma. Nasangaimi tu mai kota, nabangun.

39

Na iatu anakna Makhir, anakna Manasye, male lako Gilead anna taloi, sia naula’i tu to Amori, ma’tondok dio.

40

Napa’benganmi Musa tu Gilead lako Makhir, anakna Manasye, anna nanii ma’tondok.

41

Na Yair, anakna Manasye, male lako anna taloi tu tondokna tau iato, anna sangai tondokna Yair.

42

Malemi tu Nobah, nataloi tu Kenat sola mintu’ lili’na, nasangaimi sikona sanganna Nobah.

alkitab.me