Bilangan 4

Ma’kadami tu PUANG lako Musa sia lako Harun, Nakua:

Alami tu bilanganna to Kehat dio lu to Lewi, situru’ pa’rapuanna sia rapunna,

randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean lan Tenda Kasitammuan.

Inde sia tu la natoe to Kehat lan Tenda Kasitammuan, iamotu la untu’gun mintu’ apa tarru’ maindan.

Iake la ke’de’mi dio mai to’ tenda, iatu Harun sola anakna la tama inan maindan, anna popengkalaoi tu kulambu pererung, anna samboi tu patti kasa’bian.

Namane ussamboi kuli’ taka’, namane ussamboi sampin lango-lango massang, sia napalakoi kayu pebulle.

La nasamboi duka sampin lango-lango tu meda nanii roti dipennoloan, napatorroi dao piring, dolong-dolong, balubu sia sere’ dipa’bolloan; sia roti dipatontong bang, la torro dao.

Mangkato namane unnampa’i sampin karamisi, sia nasamboi kuli’ taka’, sia napalakoi kayu pebulle.

Sia la naala tu sampin lango-lango, anna samboi tu tongkonan palita tu dipadukku sola palitanna, pesipi’na, inan pa’pa’deanna sia mintu’ pa’minnakanna, tu dipake dio pengkarang iato.

Iatu tongkonan palita sola mintu’ pareananna napatorro dao kuli’ taka’, namane umpadaoi bullean.

Iatu inan pemalaran bulaan la naampa’i sampin lango-lango, namane ussamboi kuli’ taka’, sia napalakoi kayu pebulle.

Mangkato la naala tu mintu’ pareanan kamenomban tu dipake menomba lan inan maindan, anna padaoi sampin lango-lango sia nasamboi kuli’ taka’, sia napadao bullean.

Napa’dii tu au dao tu inan pemalaran namane unnampa’i sampin lango-lango makaseda,

sia la napadao tu mintu’ pareananna, tu dipake lan pentoean iato, iamotu mai peroyan, petossok, pesodok, inan pa’pi’pikan, sia mintu’ pareananna inan pemalaran, anna ampa’i kuli’ taka’ sia napalakoi kayu pebulle.

Iake la ke’de’mi tu tau dio mai to’ tenda sia iake mangkami tu Harun sola anakna ussamboi tu apa maindan sia mintu’ pareanan maindan, namane tama tu to Kehat la umbullei; apa da’ narumbui tu apa maindan iato, kumua da’ namate tu tau iato. Iate pareananna Tenda Kasitammuan sipatu nabulle to Kehat.

Iatu Eleazar, anakna to minaa Harun la untu’gun minna’ dipatama inan palita, dupa busarungngu’, kande dipemalaran kiallo-kiallo sola minna’ dipa’tokkoan; la natu’gun nasang tu mintu’ kema sia mintu’ apa lan, la apa maindan la iatu pareananna.

Ma’kadami tu PUANG lako Musa sia Harun, Nakua:

Kanandai tonganni tu suku pa’rapuanna Kehat, da nadisabu’i dio mai to Lewi.

Apa la mipogau’ te iannate lako tau iato mai, kumua anna marendeng, da’ namate, ke la urreke’i tu apa tarru’ maindan. La tama tu Harun sola anakna umpadulluanni inan, la nanii sipatu pantan mengkarang ba’tu mamulle.

Apa da’ natama tu tau iato mai, naurungan untiroi tu apa maindan, moi sattu’ri, belanna manassa la mate.

Ma’kadami tu PUANG lako Musa, Nakua:

Alami tu bilanganna to Gerson situru’ tu mai rapunna sia pa’rapuanna,

randuk dio mai tallungpulo taunna sia la’bi sae lako limangpulo taunna, la muia’, iamotu pantan sipatu mengkarang la ungkarang pentoean lan Tenda Kasitammuan.

Iamote tu pentoeanna pa’rapuanna to Gerson, tu sipatu la natoe sia la nabulle.

La nabulle tu mintu’ tenda pererungna kema sia iatu Tenda Kasitammuan sia iatu pesambona sia iatu pesambo kuli’ taka’, ussamboi dao mai sia iatu kulambu dio to’ ba’ba Tenda Kasitammuan,

sampin pererungna tarampak sia kulambu babangan tama tarampak, tu untikui kema sia inan pemalaran, situang ulangna sia mintu’ pareanan kamenomban; sia mintu’ tu apa dipake dio, la natoe nasang tau iato.

Situru’ parentana Harun sia anakna la natoe to Gerson tu mintu’ pentoeanna, tu mintu’ la nabullena sia mintu’ la natoena; la mipatiroan nasang tu apa dipatanggunganni, iamotu mai apa la nabulle.

Iamote tu pentoeanna pa’rapuanna to Gerson dio Tenda Kasitammuan sia iatu apa sipatu natoe tau iato mai, napenniroi Itamar, anakna to minaa Harun.

Iatu mai to Merari la muia’ situru’ pa’rapuanna sia rapunna,

randuk dio mai tallungpulo taunna sia la’bi sae lako limangpulo taunna, la muia’, iamotu pantan sipatu mengkarang la ungkarang pentoean, dio Tenda Kasitammuan.

Iamote tu sipatu la natoe tu apa dibulle, tu mintu’ pentoeanna dio Tenda Kasitammuan, iamotu mai papanna kema, pesa’pi’na, lentongna, sia lette’na,

iatu lentongna tarampak tiku lao situang lette’, petangki’ sia ulang, mintu’ tu pareananna sia mintu’ apa dipogau’ dio. La misangai tu mintu’ pareanan, tu sipatu nabulle.

Iamote tu pentoeanna pa’rapuanna to Merari situru’ mintu’ pentoean dio Tenda Kasitammuan tu napenniroi Itamar, anakna to minaa Harun.

Naia’mi Musa sola Harun sola pangulu kasirampunan to Kehat situru’ pa’rapuanna sia rapunna,

randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan.

Iatu mangkanna diia’ situru’ pa’rapuanna, den duangsa’bu pituratu’ llimangpulo.

Iamote tu mintu’ to diia’ dio mai pa’rapuanna to Kehat, iamotu mintu’ to untoe pentoean dio Tenda Kasitammuan, tu mangka naia’ Musa sola Harun unturu’ parentana PUANG tu nalopian Musa.

Iatu mangkanna diia’ dio mai to Gerson situru’ pa’rapuanna sia rapunna,

randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan,

iatu mintu’ mangkanna diia’ situru’ pa’rapuanna sia rapunna, den duangsa’bu annan ratu’ ntallungpulo.

Iamote tu mintu’ to diia’ dio mai pa’rapuanna to Gerson, iamotu mintu’ to untoe pentoean dio Tenda Kasitammuan, tu mangka naia’ Musa sola Harun unturu’ parentaNa PUANG.

Iatu mangkanna diia’ dio mai pa’rapuanna to Merari situru’ pa’rapuanna sia rapunna,

randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan,

iatu mintu’ mangkanna diia’ situru’ pa’rapuanna, den tallungsa’bu nduaratu’.

Iamote tu mintu’ to diia’ dio mai pa’rapuanna to Merari, tu naia’ Musa sola Harun unturu’ parentaNa PUANG nalopian Musa.

Iatu mintu’ mangkanna diia’, tu mangka naia’ Musa sola Harun sola pangulunna to Israel situru’ pa’rapuanna sia rapunna, iamotu to Lewi,

randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la mentoe sia la mamulle dio Tenda Kasitammuan,

iatu mintu’ mangkanna diia’, den karua sa’bunna limaratu’ ngkarua pulona.

Situru’ tu parentaNa PUANG tu nalopian Musa pantan dipasan tu tau apa tu la natoe sia la nabulle, iamotu to mangka diia’, susitu Napepasanan PUANG lako Musa.