Ester 2

Undinnato, tonna meremo tu kare’dekan ara’na datu Ahasweros, nakilalaimi datu tu Wasti sia iatu apa napogau’ sia iatu apa mangkamo dira’ta’ la dipogau’ lako kalena.

Ma’kadami tu mintu’ to mase’ponna datu tu umparakai datu, nakua: Melo ke didakaranni puangku tu ba’tu pira-pira baine mangura, tu anak dara, maballo pantarisanna.

Iamoto la naangka’ puangku tu ba’tu pira-pira to diala parea lan mintu’ propinsi kadatuanna puangku, tu la urrampun mintu’ anak dara, maballo pantarisanna tama kota benteng Susan lan banua baine, tu napenniroi Hegai, to mase’ponna datu, tu to ma’kampa baine. Indeto dinii umbenni tu apa napake umballoi kalena.

Iatu anak dara tu maballona natiro puangku, iamo la dadi datu baine ussonda Wasti. Iate pa’timbangan iate nakalo’ penaanna datu, napogau’mi susito.

Denmi lan kota benteng misa’ to Yahudi, disanga Mordekhai, anakna Yair, anakna Simei, anakna Kish, to Benyamin,

tu dipalele dio mai Yerusalem sola mintu’ to dipali’, tu dipalele unturu’ Yekhonya, datu Yehuda, tu napali’ Nebukadnezar, datu Babel.

Iatu Mordekhai iamo ambe’ passarakna Hadasa, tu Ester pa’gantiananna, baine anakna pa’amberanna, belanna tae’mo indo’ ambe’na tu pia iato; na iatu anak dara iato melo garaganna sia maballo pantarisanna. Iatonna matemo tu indo’ ambe’na, naala anakmo Mordekhai.

Iatonna kaleleammo tu parenta sia atoranna datu, na dirampunmo tu mai anak dara lan kota benteng Susan, tu napenniroi Hegai, ia duka tu Ester, dipatamamo tongkonan layukna datu napenniroi Hegai, toma’kampa baine.

Nakala’mi matanna Hegai tu anak dara iato, naalami penaanna, iamoto napamadomi’ umbenni tu apa napake umballoi kalena sia dipasakkaran kande marasa na pitu tu baine la umparakai, tu mandu sielle’ lan mai banuanna datu, napalelemi tu Ester sola tu baine umparakai lako inan mandu melo lan banua baine iato.

Iatu Ester tae’ napokadai tu bangsana sia iatu rapu nanii bu’tu, belanna napasan Mordekhai, kumua da napa’petandanni.

Kiallo-kiallo messule-sule bang lendu’ tu Mordekhai dio tingayo tarampak banua baine la unnissanni diona tu kamalaga’-lagaranna Ester sia iatu apa la dadi lako kalena.

Iake nalambi’ attunna tu misa’ anak dara tama umpennoloi datu Ahasweros ke ganna’mi sangpulo dua bulanna dinii umpogauranni tu atoran susi biasanna lako baine, – belanna iatu attunna dinii umpake apa umballoi kalena diatoranni susite: annan bulanna diballoi minna’ muru na annan bulanna diballoi minna’ busarungngu’ sia ma’rupa-rupa apa diballoan baine –,

na iake tamami tu anak dara umpennoloi datu, dibenmi tu apa naporai la nabaa lan mai banua baine lako tongkonan layukna datu.

Tamami ke bongi, namasiang sulemi tama banua baine ma’penduan, tu napenniroi Saasgas, to mase’ponna datu, to ma’kampa gundi’. Tae’ nama’din umpennoloi pole datu, sangadinna iapi ke datu umporai, natambai tu sanganna.

Iatonna lambi’mi attunna tu Ester, anakna Abihail, pa’amberanna Mordekhai, tu unnala anakmo Ester, la tamamo umpennoloi datu, moi misa’ tae’ tu nakamorai sangadinna iapi tu apa napokada Hegai, to mase’ponna datu, to ma’kampa baine. Naalami penaanna mintu’ to untiroi tu Ester.

Susimoto tu Ester dipopennolo lako datu Ahasweros tama tongkonan layukna datu, tonna bulan ma’pessangpulo – iamotu bulan Tebet –, taun ma’pempitu kadatuanna.

Mandumi nakamali’ datu tu Ester na iatu baine senga’, naurunganni nakamasei sia napakaboro’ datu losong na iatu mintu’ anak dara senga’, iamoto napasarongi datu makota kadatuan, anna tokkoi datu baine, ussonda Wasti.

Napadenammi datu misa’ pa’maruasan kapua tu mintu’ arungna sia to diala parea, iamotu pa’maruasan diona Ester, sia tae’ napopamaya’ simai tu propinsi sia untaa-taa pamengan sitinaya kakapuanna misa’ datu.

Iatonna ma’penduanna dirampun tu mintu’ anak dara, iatu Mordekhai ma’dokko lan babangan datu.

Apa tae’ napa’peissananni Ester tu rapunna sia bangsana, susitu napasan Mordekhai lako kalena, belanna tontong natoe manda’ Ester tu mintu’ kadanna Mordekhai, susitonna diopa kalena.

Den sangallo tonna unno’ko’ tu Mordekhai lan babangan datu, mapallami nasa’ding tu Bigtan sola Teresh, to mase’ponna datu sola duai, iamoto naala bilangan toma’kampa ba’ba, sia morai la umpata’pai lima tu datu, Ahasweros.

Apa kaissanan te apa iate lako Mordekhai, anna pokadai lako datu baine Ester, anna Ester umpokadai lako datu tete dio sanganna Mordekhai.

Iatonna diparessamo tu kara-kara iato, dilolongammi kumua tonganmo susito; disulami tu tau sola duai. Disura’mi te apa iate lan sura’ ossoranna datu dio olona datu.